دِيُوٌأًنَ سٌأًحُلّ بِلّأً مًيُنَأًءٍ لّنَأًصَرّ أًلّسٌۂلّيُ [الأرشيف]

ناصر السهلي

03-17-2013, 09:39 PM

؛؛‘‘؛؛

بسم الله الرحمن الرحيم
أعضاء مشاعرهم وزواره
السلام عليكم ورحمة الله وبركاته
هُنا ســ/ـأضع ديواني بين أيديكم

سٌأًحُلّ بِلّأً مًيُنَأًءٍ

يحمل بعض قصائدي فهي من روحي
سـ/ـأهبُها لـكم
متمنياً أن تصل إلى ذائقتكم ,,

إكليل من الـورد لكُل منْ مر هُنا

http://www.albrens.com/vb/uploaded/27878_1232921329.gif
؛؛‘‘؛؛

ناصر السهلي

03-17-2013, 10:57 PM

سٌأًحُلّ بِلّأً مًيُنَأًءٍ

http://www9.0zz0.com/2013/03/17/22/781015097.jpg

راحت أيامنا وراحت ليالينا
.............والعمر صار يمضي غصب واجباري

ضاعت أحلامنا وماتت أمانينا
.....................وانتهى حبنا ما عاد له طاري

تعبت أقدامنا وتاهت خطاوينا
..................... والصبر ملني من ياخذ بثاري

يا حبيبي ترى تشهد عبارينا
................... من عيوني بكيت الدمع لك جاري

من تغلى يخلى ما سأل فينا
.....................والهوى صار سلعة بايع وشاري

وأشهد إني كما ساحل بلا مينا
......................... لا مراكب تمره خالي عاري

أخوكم وتلميذكم / ناصر السهلي

ناصر السهلي

03-17-2013, 11:10 PM

http://1.bp.blogspot.com/_u68B2ePNO40/S0qqfBhs_8I/AAAAAAAAAOE/yacQM75EZh8/s320/%D8%B1%D9%81%D9%82%D8%A9.jpg

بعض البشر لو غاب ماهوب مفقود =وبعض البشر لو غاب لحظه فقدته
بعض البشر لو غاب حاضروموجود=ولوغاب عن عيني بقلبي وجدته
بعض البشر لو غاب ما عنه منشود =وبعض البشر لو غاب عني نشدته
وبعض البشر لو غاب نقص بلا زود=وبعض البشر لو غاب جيته وقصدته
وبعض البشر عرفه فشيله ومنقود=وبعض البشر عرفه حشى مانقدته
بعض البشر لو غاب لا بد مايعود =يحفظ مواثيق الغلا لاوعدته
بعض البشر لو غاب نار وبارود=تسهر عيوني وليلها ما رقدته
بعض البشر لا صار جاحد ومجحود =فرقاه عندي عيد وربي حمدته
بعض البشر طيب وله فعل مشهود =شيء سمعنا به وشيء شهدته
وبعض البشر مدري نواياهم السود=ومن راح منهم غاب بابي وصدته
وكل البشر اصناف واشواك وورود =واحرص على بذرا زرعته حصدته

أخوكم وتلميذكم / ناصر السهلي ,,

ناصر السهلي

03-17-2013, 11:18 PM

من صد عنك لا ترجى العشم فيه=واللي يبيع رخيص ببلاش بيعه
خله مع الايام تقدر تربيه =ياخذ دروسه من فعايل صنيعه
واللي يجيب الهرج لك لو يوديه=سوالفه بين الشفا والبديعه
وراعي المصالح ياسعد لا تخاويه=خلك عزيز(ن) دوم نفسك رفيعه
واللي ضعيف العقل بالك تحاكيه=يشن هجماته عليكم سريعه
واللي عليك اخطاء فلا عاد ترجيه=( اما يطيع الوقت والا نطيعه )
هذاك مثل الشق ولاني مسميه =يفرح اذا جتك المصايب شنيعه
واللي يبي خوتك حذرى تخليه=خله عزيز ولا تجيه القطيعه
خلك مع العاقل ولا انته موصيه=صندوق سرك حافظه في الوديعه
قلته وانا عندي علوم و مشاريه=يازين حسن الخلق وحسن الطبيعه
يا وقتنا اللي كاثرات بلاويه =وان ضاق بي ففجوج ربي وسيعه

اخوكم وتلميذكم / ناصر السهلي

ناصر السهلي

03-17-2013, 11:45 PM

هذه قصيدة في أحد المسابقات الشعرية وكانت المسابقة التي طرحت مجارات
لقصيدة الامير / محمد بن أحمد السديري رحمه الله
وتشرفت أن أكون أحد الذين جاروا هذا الشاعر العلم رغم تقصير حرفي وشعري
قصيدة الامير محمد بن أحمد السديري

حنت خلوج وقلت كفي عن النوح = يا ناق ما بك ما يعادل خلاجي
يا ناق أنا قلبي من الود مجروح= وجر الموده بين الاضلاع لاجي
على الذي من بدت البيض مملوح= حي بغاراته لقلبي يفاجي
عبث سلب عقلي على غير مصلوح= عكشن رموشه شرعن بالحجاجي
حبه بمكنون الحشا جاحني جوح= حبن شكاه عقاب ولد العواجي
أغليه لو إنه خطير على الروح= عيني تبي شوفه وقلبي يراجي
وعليه جاوبت الحمامه على الدوح= واللي جرى لي جارين للخفاجي

قصيدة بعنوان ياذيب

http://upload.m0dy.net/2010/m0dy.net-568181_1274017767.jpg

يا ذيب ياللي تقنب بعالي الصوح=جر العوى والله يسهل خراجي
ياذيب جرحي بين الاضلاع مفتوح=وجرح المحبه ما ذكر له علاجي
اللي سباني في الهوى شاحني شوح= وأنا من أسبابه تعكر مزاجي
اللي سلب عقلي فلاهوب مسموح=من عقب صاف الماء شربت الهماجي
لا والله الا في الهوى صرت مذبوح=وقلبي تكسر مثل كسر الزجاجي
حبه تمكن في الحشا وشيد صروح=عيني تخيله كل ليله واناجي
اناجي طيفه بين ضحكات ومزوح=ولا حاصلن وصله ولا لي ملاجي
ترا الخطأ بين المحبين مدموح=الوصل لا يقطع وهذا احتجاجي
سر الهوى بين المخاليق مفضوح=والحب ما يجلب بسوق الحراجي

اخوكم وتلميذكم / ناصر السهلي ,,

ناصر السهلي

03-18-2013, 12:01 AM

وراء كل قصيدة صادقة المعاني ..قصة أصدق .. لي صديق يحب متابعة الشعر ومايستجد منه
وكان دائماً يسألني عن جديدي من القصائد , رغم إنشغاله ببعض الأعمال الخاصه به , كالبناء والعقارات وما إلى ذلك
وفي أحد الأيام تكرر منه السؤال عن جديد القصائد .. فكانت هذه المتواضعة ..
أضعها بين أيديكم :

يا الأحمري ناشدتني وش جديدي= وعلى سؤالك بختصر بعض الأبيات
إن كان تنشدني عن أخر قصيدي= ما عاد لي رغبه على فايتاً فات
أمشي مع العالم وكني وحيدي= عايش ولكن عايش ضمن الأموات
على الذي حبه جرى في وريدي= وخلاني عرضه للعرب والتشمات
مجروح قلبي والدواء ما يفيدي= ومكن بي العله ولا لي مداوات
شفي وشفي ظبي الفريدي = ومنها تجرعت القهر عشر مرات
الحظ عاثر يوم حظي عنيدي = وأنا أحمد الله كلبوها سلامات
وأنا سمحت من الهوى والعديدي= وأقرأ عليها الفاتحة والتحيات
خلك على سعر البلك والحديدي= وخلك على شغلك وسو العمارات
وجمع أجاراتك وكون رصيدي= وخلك مع التجار وأهل العقارات
وخلك طليق الوجه ورايك سديدي= وخلك مع الأجواد راعي علاقات
وخلك مع الأيام صلف وشديدي= واللي يغامر فايزاً بالملذات
ولا عاد تنشدني عن أخر جديدي= أرسلت لك بالمختصر عدة أبيات

اخكم وتلميذكم / ناصر السهلي ,,

ناصر السهلي

03-18-2013, 12:21 AM

http://www.shbab2.com/vb/photos/2/1348961856_560.gif

أنا وأنتِ وش بيدنا = خذلنا الوقت ما قدر

خذلنا الوقت وأبعدنا = وصرنا بعاد عن أكثر

رجيت الحظ يسعدنا = ولكن للأسف قصر

تعذبنا وتوجدنا = على حلم الهوى نسهر

حرام الوقت يهددنا = على وصلك ويتعثر

عيون الناس تنشدنا = عن اللي صار وتغير

تراك أقصاهم الأدنا= وحبك داخلي يكبر

اخوكم وتلميذكم / ناصر السهلي ,,,

ناصر السهلي

03-18-2013, 12:32 AM

http://t2.gstatic.com/images?q=tbn:ANd9GcTWi-5gHxnQNZdoPQF4b0WkXBDqdSkxC-u_PKrqZjTUClvOlwyGUGcYKvF3MQ

في غيابك تايه بعالم فضيع= عايش (ن ) مابين كذبه والخداع

لا تضيعني بعالمهم وأضيع = ويصبح العنوان دربي للضياع

الوداعه يحتفظ فيها الوديع = يحفظ أسرار الهوى وقت الوداع

وأنت غالي في عيوني وما أبيع= والهوى سلعة ولا ظني تباع

مرخص روحي وأنا لأجلك مطيع= وإطلب عيوني وكل أمرك مطاع

آه من دنيا تقلب للجميع = تشبه أمواجاً تلاطم بالشراع

في وجودك تصبح الدنيا ربيع = ( إنما الدنيا جعلها الله متاع )

اخوكم وتلميذكم / ناصر السهلي ,,,

ناصر السهلي

03-18-2013, 12:43 AM

http://up.arab-x.com/July09/QMD20328.jpg

كان العلاقة كلها نت وإعجاب= خل العلاقة مالها أي قيمه

سديت باب الغي من قبلك أبواب= أعز نفسي وأتحاشى الشتيمه

بيت الوفا والعز مبني بالأطناب= يلقى المسير كل قدر وحشيمه

بعض المواقف تجبر الشخص يرتاب= في موقف فيه العواقب وخيمه

لو كنت شاعر وأملك إسلوب جذاب= الفكر راقي والنوايا سليمه

ومن لا يحسب للمواقيف بحساب= يشوف ضيم الوقت وهذا خصيمه

الله من دنيا تقلب كما الداب= إما عطتك الخير والا الهضيمه

أصبحت أنا والحزن خلان وأصحاب= ونار الغلا والشوق تحرق هشيمه

وأصبحت أنا ما بين طالب وطلاب= جتني كريمه وإتركتني كريمه

غلاب يا درب المحبين غلاب= كلاً يدور فرصته والغنيمه

اخوكم وتلميذكم / ناصر السهلي ,,,

ناصر السهلي

03-18-2013, 12:54 AM

http://t2.gstatic.com/images?q=tbn:ANd9GcSJrOW0Lx0BtejhrQw7PPnSkGeYSV5O9 L7pyUS2ETiMX6AseCpL

كفاني ما جرى منك كفاني= كفاني منك وجروحي عميقه

حقيقة ما تصورتك أناني= ولكن للأسف هذه الحقيقة

تجاهلني وكنك ما تراني= نسيت الحب وعهوداً وثيقه

رماني حظي العاثر رماني= على حبك تقاسمنا طريقة

تقاسمنا الدقايق والثواني = وتمنينا نتلاقى لو دقيقة

وتقاسمنا السوالف والمعاني= حبيبه كنتِ عندي والصديقة

وتقاسمنا الليالي والأماني= ورسمنا حلم بأوراق عتيقه

وتقاسمنا القصايد والأغاني= وتبادلنا مشاعرنا الرقيقه

وتقاسمنا الأماكن والمباني = وزرعنا الحب بورود الحديقة

وتقاسمنا الشواطي والمواني= ومراكب حبنا صارت غريقه

عطيتك كل ما أملك وجاني= جناية غدر في كل الخليقه

كفاني روح ما جاني كفاني= كفاني ومن تغلى في حريقة

اخوكم وتلميذكم / ناصر السهلي ,,,

ناصر السهلي

03-18-2013, 10:43 PM

http://t1.gstatic.com/images?q=tbn:ANd9GcS7G6AL_W9qcRyCraA0vLIaG80NRpE3x FvFWQH2xd1XMQ7uTWIlv9cV2DiG

يا حليلك يا حليلك =قوم يالله شد حيلك

استلم حزنك وليلك=كم حسبت من الدقيقة

كم حسبت من الثواني=والدقايق في الزماني

أنت مجرم وأنت جاني=ساطي بكل الخليقه

آه يا قلبي المولع=من فرقاك كم تولع

وأنت يالغالي تدلع =تحسب إن هذه طريقة

إمتعمد بالتجافي= قاطع ما أنته بوافي

تحسب إن العلم خافي=عندي إثبات الحقيقه

أخلفوك أهل النوايا=مستمع كل الحكايا

ما دريت إنك عنايا=لين حلقي نشف ريقه

وهقوك ووهقوني= ضيعوك وضيعوني

في طريقك هملوني=حسبي من خان برفيقه

شفت منهم المضره=ذايقاًحلوه ومره

حالتي ماظن تسره=لو ترى جروحي عميقه

ما تعذر ما تجمل= بس طالعني وتأمل

يكفي والله ما تحمل =خل مشاعرنا رقيقه

لا تعذر تتصلبي=ما بقى شي بقلبي

رافعاً كفي لربي =ينقذ الروح الغريقة

انتهيتي يا غناتي= انتهيتي من حياتي

اطوي صفحة ذكرياتي =وأشعلي فيها حريقه

إخوكم وتلميذكم / ناصر السهلي ,,

ناصر السهلي

03-18-2013, 10:51 PM

http://www.koko555.com/up/download.php?img=9277

ياحليلك جيت تسأل=عن جروحي والزمان ؟
نظرتي نظرة تأمل=كيف ذاك الحب هان ؟
كنت أنا وانت نكمل=بعضنا في كل شان !
كنت في قلبي تجول=من مكان إليا مكان؟
كنت في روحي مخول=بالمشاعر واللسان
كنت في عيني المدلل=كنت ماضي فعل كان
للأسف وأنته تطول=في غيابك ما تبان ؟
واتصالك غير الأول=والرسائل والحنان ؟
للأسف كل شي تحول=ما على الدنيا ضمان
والصراحه ماتجمل=خاين وطبعك جبان !
بإختصار ولا تهول=كل شي(ن) فيك شان !
روح مافينا نتحمل=روح ما عندك أمان!

اخوكم وتلميذكم / ناصر السهلي ,,

ناصر السهلي

03-18-2013, 10:59 PM

يا بن علي راعي الهوى=جرحه على وقته يزيـد
لويت حظـي و التـواء=حسبي على الحظ العنيد
مافاد بـي طـب ودواء=والطب فينـي مايفيـد
والذيب لامنـه عـوى=يقنب بصوتاً من بعيـد
بنت رفيعـة مستـوى=تملك عقارات ورصيـد
ما تستمع للـي غـوى=متميزه بعقلـن رشيـد
فيها الحلا ومنها ارتواء=متوصفه عنـق وجيـد
كنـه جبينـه لاضـوى=بدراً يضوي كـل بيـد
في عينها جيش وقـوى=تضرب بقلباً من حديـد
لا من تبسم لـي نـوى=ذبحي من ظبي الفريـد
ما شفتها في أهل الهوى=متفرده عن كـل غيـد
هي مهرة مـا تنقـوى=في هجرها وش تستفيد
غلاها في القلب احتوى=مابين شريـان ووريـد
اما نعيش عيشة سواء=والا بتم انعـي وحيـد
في أبو ظبي قلبي انكوى=وغنيت له طرق القصيد
يا مسندي مالـك لـواء=الحب يبقـى مـا يبيـد
أرسلت لك بالمحتـوى=قصة غرامي في البريـد

أخوكم وتلميذكم / ناصر السهلي ,,

ناصر السهلي

03-18-2013, 11:08 PM

http://sphotos-a.ak.fbcdn.net/hphotos-ak-snc6/c0.0.696.332.72597864769/p843x403/252688_463993220326383_2074833193_n.jpg

ياطير يالي بالجناحيـن طايـر=تطير إذا ضاقت عليك الوسيعـه
يا طير يالي ما سكنت العمايـر=ما تسكن الا في الجبال الرفيعه
وأنا بمحلي تايه الفكـر حايـر=واكابد الضيقه وحالي شنيعـه
يا طير متضايق وأهل العبايـر=الدمع فوق الخد عيني تضيعـه
يا طير خلي ساكناً في الضماير=حبه طبع في القلب وهذه طبيعه
يا طير خلي ذايـر منـي ذايـر=ما هيب عاداته يحب القطيعـه
خلي تغير مدري وشلون صاير=وأنا على حبه حفظت الوديعـه
يا طير قلـه لا تـدور الدوايـر=كم عاذلاً يهرج ولا نيب أطيعـه
يا طير قله يحتفـظ بالسرايـر=أخاف عذالـي بسـره تذيعـه
يا طير قله شفت منه العزايـر=الصبر دونه كيف أنا بأستطيعه
وإن كان يبغاني بسوق البشاير=والله لأضمن له حيـاة فضيعـه
وإن كان بايعني فلا هي خساير=من باعني برخيص ببلاش أبيعه
والحب سلطاناً وله حكم جايـر=ياليت حكمه ناخـذه بالشريعـه

أخوكم وتلميذكم / ناصر السهلي ,,

ناصر السهلي

03-18-2013, 11:17 PM

http://marebpress.net/userimages/Image/panorama/ghg.jpg

يابوي أنا حالي من الحب قاضي=وإن ما لحقتوني خذيتوا عزايـا
أسهر ودمع العين بالخد فاضـي=أخاف كثر الدمع يسبب عمايـا
على الذي خده كما البرق ناضي=وجه حسينـاً صافيـاً كالمرايـا
يا من يخالطها سمار وبياضـي=وتلحظ بعيناً فيها سهم المنايـا
متوشحاً بالزين وفيه متقاضـي=متعففه بالزين ولبـس العبايـا
لو خيروني غيرها ما تعاضـي=هي لذة الدنيا وروحـي ومنايـا
لاشك ممنوعه بحظر افتراضـي=ولانيب محتالاً ولا لـي نوايـا
والله لولا إني على السر احاضي=إن كان عذالـي تباشـر عنايـا
حبه طبع بالقلب حاضر وماضي=وحبه سكن بين الضلوع الحنايا
مرباعه بقلبي بخضر الفياضـي=ياليت أهلهـا لابتـي واقربايـا
تضيق بي دنياي وسبع الاراضي=لو غبتي عن عيني وتظلم سمايا

أخوكم وتلميذكم / ناصر السهلي ,,

ناصر السهلي

03-18-2013, 11:26 PM

http://up.z7mh.com/upfiles/ebe01745.png

قلبي سمح منك ولا نيب ملـزوم=أطلب وصالاً من قلوباً شحيحـه
كم ليلة مرت وأنا جافـي النـوم=أسهر وعينك بالكرى مستريحـه
وأنا أدري إنه ماجرالي ومقسوم=لكن قلبي مـا يطيـع النصيحـه
والحب واضح له قوانين وسلوم=ماهوب عذروباً ولاهو فضيحـه
ياقوم ياسيد الغناديـر يـا قـوم=ضاري على نزع القلوب الجريحه
بصارحك باللي على بالي اليـوم=وأقولها كلمة وخذهـا صريحـه
ودعتك الله روح لا تكثر اللـوم=من عافنـا عفنـاه والله يبيحـه

أخوكم وتلميذكم / ناصر السهلي ,,,

ناصر السهلي

03-18-2013, 11:42 PM

http://www.mobile-review.com/articles/2006/image/nokia-openstudio-ny/ny-nseries-134.jpg

عودت نفسي على صـدك وهجرانـك=ماعاد تفرق معي لو رقمـك الغيتـه
راهنت قلبي على بعـدك و نسيانـك=باب التعارف على شـرواك صكيتـه
هذاك أول وأنا اغلـى مـن اخوانـك=واليوم كني غريـب الـدار لاجيتـه
ماهوب حقاً على من حبـك وصانـك=درب الجفاء ياوليف الـروح جازيتـه
ثمن كلامك شوف ما يحكمه وجدانك =راجع كلامـاً تقولـه مـا تماريتـه
بكـرة تنـدم اذا خـلـوك خـلانـك =وتعيش وحدك علـى جرحـاً تجنيتـه
قال المثل من يخون أحبابهم خانـك =اصون قلبي عـن امثالـك وعزيتـه

أخوكم وتلميذكم / ناصر السهلي ,,

ناصر السهلي

03-18-2013, 11:51 PM

http://www.l-7oob.com/up-pic/uploads/l-7oob_13082549552.jpg

بعض الغلا يبقى ما ماتت عروقه =وبعض الغلا يموت لحظة غيابـه
وبعض الغلا دائم جروح محروقـه =وبعض الغلا بلسم جروحن تشابـه
وبعض الغلا مراً ما ودك تذوقـه =وبعض الغلا حالي بلـذة شرابـه
بعض الغلا جنه وتحفظ حقوقـه =وبعض الغلا موت وجحيماً عذابه
بعض الغلا شوفه شفاقه وبوقـه =وبعض الغلا تقنب سوات الذيابه
بعض الغلا يجبرك تمشي طروقه =وبعض الغلا خسران تحسب حسابه
وبعض الغلا تتعب تخيط فتوقـه =وبعض الغلا ضافي وساتر ثيابـه
بعض الغلا بيبان سـر مغلوقـه =والرابح اللي في الغلا سـد بابـه

أخوكم وتلميذكم / ناصر السهلي ,,

ناصر السهلي

03-18-2013, 11:58 PM

http://www.albrens.com/vb/uploaded/30567_1245371778.jpg

ليش تجرحنـي وتـروح
وتزيدنـي هـم وجـروح
يعني ما تعـرف غـلاك
غلاك ما يبغـى وضـوح
ليش الزعل ليش العنـاد
والقلب يحمـل لـك وداد
خلاص ناوي في البعـاد
أرجوك لحظـه لا تـروح
لحظـه ثوانـي وانتظـر
خلاص نـاوي مـا تمـر
هـذه زهـورك والعمـر
خذها معـك عنـي وروح
روحي وعيشي في هنـا
يحق لك مـن هـو أنـا
بشيـل جرحـك والعنـا
وأعيش في ذكرى وجروح
روحي وزيدي با الجفـاء
ما دام ما عنـدك وفـاء
القلب مـا جـاه اكتفـى
خيبتي ظنـي والطمـوح

اخوكم وتلميذكم / ناصر السهلي ,,

ناصر السهلي

03-19-2013, 12:12 AM

http://up.arab-x.com/Sep09/5Iw15482.jpg

؛؛‘‘؛؛
ياحبيبي حياتي لاتضيعها ..
ما دامها في يدينك صونها صونها ..
هذه أمانه وإذا جيت أسري ودعها ..
ضمها فوق صدرك ضمها بهونها ..
ما كل هرجه تجيني فيك أبسمعها..
أصد عنها ما أبي أذاني يوحونها ..
والضحكة اللي بوجهك ما تصنعها..
أنتِ سببها وغايتها ومضمونها ...
أنتِ دواء علة جروحي ومواجعها ..
لا تسأليني جروحي منك وشلونها ..
صورتك محتفظ فيها وأطالعها ...
في كل لحظه عيوني بس يشوفونها ..
لا شك هذه حياتي بين أصابعها ...
والموت كله مابين الرمش وعيونها ..
ضاقت علي المدينه مع شوارعها..!
لو غبتي عني دقيقة يختفي لونها ..!

أخوكم وتلميذكم / ناصر السهلي

ناصر السهلي

03-19-2013, 12:23 AM

http://www.elaphblog.com/Blog/kashakeel/album/%D8%AF%D9%8A%D8%A7%D9%86%D8%A9/%D8%B1%D9%85%D8%B6%D8%A7%D9%86%D9%8A%D8%A7%D8%AA/%D8%AC%D9%84%D8%B3%D8%A7%D8%AA/%D9%85%D9%82%D8%A7%D8%A8%D8%B1.jpg

الموت حق وكلنـا فـي مسيـره =حقاً ويمشي به صغيري وكبيري
والعمر محدود بنهايـة مصيـره=وكلن له أيامـه ولا يستخيـري
يا الله يا عالـم خفـي السريـره=تجبر صوابي يوم قلبي كسيـري
أبكي من الفرقى على اختي منيره=وأهل دمعي لين حـرق نظيـري
قالوا توفت قلت يـا الله الخيـره=يا الله عسانا في عوضها بخيري
وإن باح سدي فالمشاعر كسيـره=وقامت تكسر عبرتي في ضميري
وصرت أتوجد والجوارح خطيـره=مافاد بي طبي وجرحي خطيـري
وقمت أتذكر كل لحظـه يسيـره=مرت بنا ما بين لمـح النظيـري
ياما إكتبت لي من دروس كثيـره=وياما أضحكتني يوم توي صغيري
عزوني فيهـا لابتـي والعشيـره=وأنا أتصبر خوف عقلي يطيـري
واليوم بين أهل المقابر قصيـره=في منزلن يسكن غنـي وفقيـري
في رحمة المعبود ما لجي لغيـره=سامع دبيب النمل يومه يسيـري
ونهاية المخلوق حفـرة صغيـرة=ومكفن بقماش هـذا المصيـري
يارب يا المعبـود ترحـم منيـره=وبجنة الفردوس تلقى البشيـري

الله يرحمك ويغفر لك يااختي ويجعل الجنه مثواك

ناصر السهلي

03-19-2013, 10:50 AM

http://kashakeel.elaphblog.com/Blog/kashakeel/album/%D8%AF%D9%8A%D8%A7%D9%86%D8%A9/%D8%B1%D9%85%D8%B6%D8%A7%D9%86%D9%8A%D8%A7%D8%AA/%D8%AC%D9%84%D8%B3%D8%A7%D8%AA/%D9%85%D9%82%D8%A7%D8%A8%D8%B1.jpg

آه يا قلب ياللي من عنا الوقت صابـر=لا تغرك حيـاةً توهـم الـلي حضاهـا
لا تغـرك تراهـا فانيـه لـو تكابـر=لا تهمك ترى الدنيا وسيعـاَ فضاهـا
والله إني يا قلبي سامحاً وأنت خابـر=سامح من هواها لـو يقفـي نضاهـا
لو جمعتوا دموعي كان تملىء المحابر=تبكي العين في وقـت قديـم مضاهـا
أكثر الناس شفها تحت ذيـك المقابـر=( كم شخصاً يموت وحاجته ماقضاها )
كم عزيزاً علينا فـارق الـدار عابـر=سنة الله علينا حكمتـه فـي قضاهـا
واهني المطوع يتعلـي فـي المنابـر=يذكر الله ويدعي كل نفـس برضاهـا
من بغى الخير والجنه بدينـه يثابـر=لا يضيع فروضاَ ما تعـوض عضاهـا
يا ولي العباد وجابـراً فـوق جابـر=إغفر الذنب وعذني من جهنم لاضاهـا

اخوكم وتميذكم / ناصر السهلي ,,

ناصر السهلي

03-19-2013, 11:08 AM

http://t1.gstatic.com/images?q=tbn:ANd9GcRcNsp5XzxQpGh5uL_NBiMuPjnWUUg1C Pc4QHuXd6LuAXOhNtF6

انتهينا وانتهى كل الغرام=وانتهى ذاك الغلا لحظة سكوت
المشاعر لو تبعثر يا حرام=امتعلق مثل سلك العنكبوت
والغياب إن طال يتبعه الملام=ماتعوض كل فرصه لو تفوت
مهتني بالنوم وعيني ماتنام=ساهر على حبك وأعد من البيوت
لاتامن الضحكة وهي خلف اللثام=لا تنخدع نظرتك في لبس البشوت
انتهينا لا اتصال ولا كلام=لا تدز من الرسائل والكروت
أشهد إن النور جلاي الظلام=وأشهدن ماحداً قبل يومه يموت
رزقي على المعبود خلاق الانام=اللي خلق في البحر ياقوت وحوت

اخوكم وتلميذكم / ناصر السهلي ,,

ناصر السهلي

03-21-2013, 02:42 PM

http://1.bp.blogspot.com/-K7nhBxKWfOs/TanQtvusUBI/AAAAAAAAAAs/t7U7dM2ixuo/s320/man_in_wheelchair.jpg

لاتضيق وتضايق لو يقولوا معـاق=الأعاقة تراهـا تصنـع المستحيـل

لا تضيق الصدور ولاتضيق وتضاق=إبشر الخير في صبرك وربي وكيل

كلنا ضد تهميشك حسـب الأتفـاق=ابتسم وارسم الفرحه على كل جيل

لا تقول أنت عاجز فوق ما لا يطاق=خطوة بخطوة نمشي ولنجاحك دليل

يا قوي المشاعر حان وقتك وفـاق=امنح النفس فرصه وخذ رد الجميل

وأنت عقلك كبير ومتسع للنطـاق=وأنت في قلوبنا منزلك ما هو قليل

صم بكم ومقعد كل مبتـور سـاق=يشهد الله علينا ما نعيـل ونميـل

أنت نعمه عظيمه ولأحتوائك مذاق=أطيب من الشهد والذ من السلسبيل

كم معاق مخلد ذكره وكـم معـاق=أديسون واختراع الكهرباء بالفتيـل

كم معاق تهيئ لفرصـة الانطـلاق=نيوتن المكتشـف للجاذبيـة دليـل

لا تضيق وتضايق لو يقولوا معاق=الاعاقة تراهـا تصنـع المستحيـل

اخوكم وتلميذكم / ناصر السهلي ,,

ناصر السهلي

03-21-2013, 02:48 PM

قالوا لهن سود الركب سود الأكواع= وهي الشرف والطيب ورمز الطهارة
متربية بالدين وأخلاق وأطباع= متعففه بالزين ولبس الحضارة
كانه سواد لسجدة الرب في القاع= هذا وسام أهل التقى وافتخاره
يوم الردي عذرب وبدل بالأوضاع= تخطيط في عقله وفكرة قذارة
يالطاهرة حذراك والكل طماع= مصيون عرضك دون عرضك ستارة
يا اللي جمالك خُلق ما هو تصناع= حزتِ على وصف الجمال بجدارة
النور من وجهك يشعشع تشعشاع= ما كنك الا الصبح ساطع نهاره
لك بالحشاء منزل وفي القلب مرباع= بين الضلوع العوج هذا قرارة
واللي يشكك فيك ويطق الأصباع= هذاك عايش في جمال استعاره
هذاك مخدوع بمكياج وقناع= وإلا أنتِ فوق الوصف وخذتِ الصدارة
يابنت ما أسمع فيك كذاب وخداع=يوم الجمال بصوت والا استمارة

ناصر السهلي

03-21-2013, 02:58 PM

http://t3.gstatic.com/images?q=tbn:ANd9GcROKqdDZ9pA979GV4xYP_uS_KoxU9nIm iN3gTS6xcN4G36JBWbE

اي والله احبك وحبك على الراس = اثر الغلا مكنون في قلب مفتون
ياما تمنيتك على بعد الارماس= ياما لعنت ابليس وابليس ملعون
متعبني التفكير بالحزن وهوجاس =متلف قلوب الناس والقلب مرهون
الحب لك وحدك ولا باس لا باس =أمر علي كلي ترى والله تمون
ناصر على بحر المحبين غطاس=نومه قليل وساهر الليل محزون

اخوكم وتلميذكم / ناصر السهلي ,,

ناصر السهلي

03-21-2013, 03:04 PM

http://t3.gstatic.com/images?q=tbn:ANd9GcTvvq2MEVHurPruGZBFMNDS0Td95iZLr aGR8TxXMTWddG97RWgrCQ

انادي لك وأبحكي لك = عن جروحك وابشكي لك
ابشكي هواك مدامي معاك = تعال اسمع وش أحكي لك
ابحكي الحب وجرح القلب = وما خصه ويعني لك
سهير الليل وذقت الويل = وحلو النوم صافي لك
افكر فيك واحب ارضيك = واداري عليك واغني لك
اعيش بهواك وروحي فداك =وقلبي معاك وكلي لك
محال انساك ولا اجفاك = ولا اهوى سواك ما دامي لك

اخوكم وتلميذكم / ناصر السهلي,,

ناصر السهلي

04-04-2013, 11:22 PM

كانت هنا وكنا سوا

في كل ليلة نجتمع،،،

ما نفترق ..

بداعي حبه والهوا ..

نبقى سوا ،،

ما نفترق ،،!

جرح الغياپ ،،

ما له دواء ..؟

وقلب المولع ،،

يحترق ،،

ناصر السهلي

04-15-2013, 11:59 PM

( يا عين هلي دمعك اليوم هليه )=وابكي عزيزاً فاقده فـي حياتـي
لا تذخرين الدمع يا عين وابكيـه=والله يلوم اللـي يلـوم بسواتـي
عصرية الجمعه وساعات تاليـه=جاني اتصال وقالوا ابوك ماتـي
قلت اه وويلاه من جرح مخفيـه=جرحي عطيب ولا تفيد الدواتـي
ضاق الفضاء فيني وكل شي مابيه=حاربت لذاتـي وعفـت المباتـي
قاموا بتغسيله ولفـو الكفـن فيـه=وقدام عيني حضـروا للصلاتـي
وحطوه في قبره ولحـده يغطيـه=وصفو اللبن فوقه وحطو الحصاتي
وعودت يم البيت وكل الحزن فيه=دنيـا تفرقنـا وصرنـا شتاتـي
ومرن ثلاث ايام ناخـذ تعازيـه=واللي يموت يروح ما عاد ياتـي
ومن شافني ابكيه مستغرب ليـه=وهذا مكانه ومشلحه والعصاتـي
في كل غرفه طبعه اشاهده فيـه=واشم ريحه في خواني وخواتـي
ياما دعاني باسمي واقـول لبيـه=لبيـه يابويـه وروحـي وذاتـي
وياما تعلمت المراجل على يديـه=وياما نهاني عن هروج وشماتـي
لوالحياة والعمر يهدى وانا اهديـه=لاهديه روحي ثم اعجـل وفاتـي
يالله يارحمـن ياواحـد ارجيـه=تغفر ذنوبـه واطلبـك بالثباتـي
يا خالقن خلقه وكل شي محصيـه=يارب يالمعبود وانـت النجاتـي

ناصر السهلي

04-16-2013, 12:04 AM

يـا ناشـداً عنـي=ويا مخلف ظنـي

ترانـي متهـنـي=فـي غيبتـك والله

في غيبتك سالـي=ومبسوط من حالي

مالك أنـا ومالـي=يا وسع أرض الله

ما عـاد تغرينـي=لو كنت ترضينـي

ما أنته بمغنينـي=والرزق عنـد الله

راضي بمقسومـي=وعايش على يومي

أنـام مظلـومـي=ولاأظلم عبـاد الله

أنت تـرى ظالـم=في الحب يالظالـم

والله هـو العالـم=بأسرار خلـق الله

لا تدعـي حـبـك=ما خفت من ربك ؟

واقف على دربـك=حسبي عليـك الله

ناصر السهلي

04-25-2013, 04:09 PM

يا صباح الخير يا وجه الصباح=ياصباح الورد وأنفاس العبير
يا صباح العمر وأسرار النجاح=يا صباحي في ضيا الكون المنير
في صباحكَ تنتهي كل الجراح =طابت جروحي ولو جرحي خطير
ليلة البارح على ضحك ومزاح =بين همسة شوق وتأنيب الضمير
يوم قلبي معلن ..بالأجتياح =الوطن قلبي ولك شعب غفير
مستحله دون ضربن بالسلاح =وأعلنوا لك بالولاء وحبك كبير
أنتِ يا سيد العذارى والملاح =أشهداً مالك شبيه ولا نظير
لو دخلت السوق من غير الوشاح=يتبعونك من كبير ومن صغير
من يشوفك طاب يومه واستراح=أشهداً إنك تغني الحظ الفقير
إحملينا يالنسايم و الرياح =وإنثري الأفراح في الجو المثير

اخوكم وتلميذكم / ناصر السهلي ,,

ناصر السهلي

05-09-2013, 10:31 PM

http://t1.gstatic.com/images?q=tbn:ANd9GcSj8lS-p-A53kCLirpNXDNXL0l7qSEfM29_a9UDAOiRYOfeqNrw

كل ما جيت أسلي خاطري وأتغنى
.....,,,,... صاح قلبي ورى حدب المحاني ينادي
يا حبيبي تونا في حبيبك .. تونا
.............. لا تزيد المواجع وأنت تسكن فؤادي
لا تجنا عليه في الهوى لا تجنا
............. إرحميني رحمك اللي رحوم العبادي
كان عينك مريحه في منامك تهنا
........... السهر صاحب عيوني وعفت الرقادي
وأشهد إني على حبك حبيبي معنا
......... أنحل الحب جسمي عفت شربي وزادي
في غيابك حبيبي ما وسعني وطنا
............ ضاق بي كل حي وكل شوارع بلادي
ليتها بالتمني يوم قلبي تمنا
............. مع حبيب ملكني صار غاية مرادي
عود موزاً ليا هب الهوى به تثنا
............ مع هبوب النسايم ريح ورداً وكادي
ينقض أشقر على متنه وكفه محنا
............ والعيون الوسيعة ضربها كالهنادي
ومبسمه لا تبسم ذاب قلبي وونا
.......... الشهد في كلامه والحلا في ازديادي
شايف الزين كله في عيوني وشحنا
.............. بالدلع والتغلي والهجر والعنادي
قلبه القاسي اللي مايحن ويحنا
....... أرحمه بس لو طول على الوضع عادي
يا خسارة حبيبي خيب اليوم ظنا
........... من تنكر وجودي ما عطيته ودادي

ناصر السهلي

05-24-2013, 10:11 PM

يا الله عليك اتكالي =يا عالماً بالغيوب
يا عالماً بالنوايا=يا الله عليك اتكالي
يا واحداً لا دعيته =فرج علي الكروب
ويارازقاً البرايا=ما غيرك الله والي
بأمرك وتدبير كونك =ومسيراً الهبوب
يا مروي روح الضمايا=بمزون سُحباً ثقالي
يا خالق الكون كله=شمس العصر للغروب
يارب جزل العطايا=كريم رب الجلالي
كريم عفوك ولطفك=تغفر جميع الذنوب
عبدك مُحمل خطايا=كثر الشجر والرمالي
أنت الرجاء يا إلاهي=مالي ملاذ وهروب
العُمر أناخ المطايا=وما عاد في احتمالي
عبدك ضعيف المساعي=مُذنب ويبغى يتوب
يشوفها كالمرايا=حقيقة ما هو خيالي
العُمر ساعة وساعة=وكل شي محسوب
يوم نُبعث عرايا=وتحقيق عند السؤالي
أنت الغفور الودود=وماعنك شي محجوب
إرحم جميع الرعايا=يارب حقق سؤالي

ناصر السهلي

05-29-2013, 07:56 PM

أنا أشهد إن الحب للقلب موذي=واليا تغلى صاحبي ويش أبيبه !!
يا نفسي عوذي من هوى البيض عوذي= كثر التلفت في الخلايق معيبه
واليا اشتهت نفسي من الوقت خوذي=من الفرح والطيب جمت نصيبه
واليا حداك الوقت يانفسي لوذي= للي خلق خلقه وكوني قريبه
مسلم على التوحيد ما نيب بوذي= أخاف رب البيت وأخشى المصيبه