ديوان / سلمان الدوسري " صوت القلم "

[صوت القلم]

بسم الله الرحمن الرحيم

أسعد الله أوقاتكم بكل خير ..

أود في البداية أن أ شكر إدارة المنتدى الموقرة والقائمين عليه على إفتتاح هذا القسم الرائع والرائد بفكرته ومضمونه , والذي يعد تقديرا للشعر والشعراء , متمنيا لهم مزيدا من التوفيق والتميز , ثم أحيي جميع الاخوة والاخوات الشعراء المشاركين بدواوينهم الجميلة في هذا القسم وأتمنى لهم كل التوفيق والسداد .


ثم يسعدني أن أضع بين يدي ذائقتكم الراقية ديواني الشعري , والذي أطمح من خلاله أن أقدم ما يحوز على إستحسانكم .


وتقبوا مني كل التقدير والاحترام .

[صوت القلم]

ياحبيبي جـاك مرسـول المحبـه =من عيوني قبل ماينطـق لسانـي
قلبي اللي لانجرح شوفتـك طبـه = ماخذن الاول بحبه مانـت ثانـي
في طبوعه طيب من طيـب لبـه = ماتغير .. لو تغيـر ذا الزمانـي
ليت منهو شايف وش وسط قلبه = لأجل اعرف بداخله وشهو مكاني*
ماحلا دنياي لامن صـرت جنبـه = غيبته خوفي وفي قربـه امانـي
بين جلاسي واحس انـي بغربـه = سارح بالفكر ..في سيد الغوانـي
يكفي انه حي ..لو ماصار قربـه = دام بين ارواحنا قـرب وحنانـي

[صوت القلم]

ياكـبـر قـــدرك بقـلـبـي وانـــت مـاتــدري =يـاغـالـي مـــا يـغـيــب الــحــب بـغـيـابـه
اهدي لك اجمل شعور الحب في شعري=مـشــاعــر صــادقـــه مــاهــيــب كـــذابـــه
تستاهل الحب فـي شعـري وفـي نثـري=و ياسعد منهو بحبك عاش يحضـى بـه
ياليـت منهـو بقلـبـك شــاف وش قــدري=حتـى ادري بموقفـك واحسّـب احسـابـه
لأجلك تجرىّ خجول الحـرف لـك يجـري=ومـن قبـل اعرفـك حـروف الحـب هيّـابـه
الـحـب عـنــدي شـعــور صـــادق فـطــري=ارواح مـتــآلــفــة مــاهـــيـــب مــرتـــابـــه
شاعر ولكـن !! كتـاب الحـب فـي صـدري=مقفـول ..!! لكـن قـدرتـي تفتـحـي بـابـه

[صوت القلم]

يامرهـف الحـس والكلمـه=يانـادر( ن) بيـن ذاالنـاس
ياماخـذن مركـز القـمـه=في الطيب مع عذب الإحساس
يامعـرب خـالـه وعـمـه=من ماكـر طيـب السـاس
طبـع الوفـا يسـري بدمـه=خجـول والقلـب حـسـاس
أخجـل الـى جيتنـا يـمـه=وأضيـع الـدرب واحتـاس
اعشقـه مـن بـد ذا الامـه=وقدره على العيـن والـراس
ياليـت مـن يتصـل بمـه=واخطبـه وتقـول لابــاس
يالله عسـى قربـه يتـمـه=ويلمنـا لـيـل الأعــراس
الحـب زينتـه فـي اللمـه=على النقا .. الحب نومـاس
هـذي تـرى غايـة الهمـه=وحب بـلا قـرب عومـاس

[صوت القلم]

ياحبيبي دامك بخير .. فالدنيـا بخيـر=دام مثلك حي فيها .. فيا حلـو الحيـاة
لك غلا يملى عيوني وفي قلبـي كبيـر=تبطي الايام واظروفهـا تنقـص غـلاه
انت عندي ..العود الأزرق ويانعم العبير=فارق في الطيب ريحه وعالي مستـواه
انت عندي ..عقد الألماس ماله من نظير=وعادة اللي طيّب ٍ..غالي ٍينـدر حـلاه
احمد الله يوم ذوقي مثـل ذوق الخبيـر=اتخير نـادر الوصـف واخلـي سـواه
وعزتي للي بذوقه كمـا ذوق الضريـر=لابغى في الخيل رسن الأصيلـة مالقـاه
النسا خيلٍ .. وتمتاز في اليوم العسيـر=وخيرها يلحقن في السبق لاقرّب مـداه

•••••••••

[صوت القلم]

لا ابطيت ما اوحيت صوتك صابني خفه
=كني مشتت وصوتـك بـس يجمعنـي
ماتصدقيني ! تعالي واسمعـي رجفـه
=أسالك بالله رجـف القلـب وش يعنـي
ناظر عيوني .. تشوف الحب وتعرفـه
=اللـي بقلبـي يعرفـه مـن يطالعنـي
واضح وصادق ومالي في الهـوى لفـه
=علـى النقـا همتـي للعـز تدفعـنـي
ان كان ما انتي بحبي اليـوم معترفـه
=فعـزي لقلبـي مـن فـراق يروعنـي
قلـبٍ مواصلـك يامحبوبتـي شـفـه
=ياليت مـادون قربـك شـي يمنعنـي
ياسعد منهو غـدى لـك زوج يالترفـه
=الله يهنيـه .. لـو البـعـد يفجعـنـي

[صوت القلم]

ياقو قلبك على الهجران & وانا على الهجر ياضعفي
تغيب حتى بلا استئذان & وتخلي العقل مختفي
حرام ياقايد الغزلان & اتعلق القلب وتقفي
قلها صريحة بلا كتمان & ان كان ماودك بعرفي
وانا ترى اوعدك بالنسيان & ومن شيمتي ما اطرد المقفي
ما احب أنا ازعلك مهما كان& وماأحب أنا يجرحك حرفي
وأحبك تروح بالاحسان & وبالخير والستر ملتفي
لاشك ذكراك في الوجدان & تضوي بقلبي ولا تطفي
ذكرى جميلة لها عنوان & عنوانها حبكم يكفي

[صوت القلم]

‏بسافر مع طاريـك واهوجـس بذكـراك
‏ترى سجتي في سيرتك تقطـع الفرجـه
‏وحيـد لحالـي لكـن اتخيـل امخـاواك
‏اسولف وكنك جنبـي وتسمـع الهرجـه
‏ومن شافني في الخط بيقول وش بلـواك
‏عسى ما انت مجنون شكا عقلك الرجـه
‏‏وهو ما درى ان الحب ذي عادته لاجـاك
يخلي البطل يركب احصانه ابلا سرجـه
‏ويخلي ضعيف القلب يمشي على الأشواك
‏ويخلي النقي معيوب لـو نيتـه زرجـه
ترفق علي يالايمـي .. أنـت وش دراك
ترى ما يعرف الغزو من لا مـلا خرجـه
وليفي .. خيول الفكر تصهل وهي تنصاك
شعاها الوله والشوق ماهيـب منحرجـه
إلا جيت أغني فيك .. جزل الغنى يزهاك
وثنايا القوافـي تبتسـم لـك ومنفرجـه


* الفرجة = المسافة

******

[صوت القلم]

إليك كتبت الشعر فـي كـل صفحـة=ولولاك ما سطرت نثري ولا شعـري
أسحـرٌ هـواك ,,,أوقعتنـي شراكـه= فلاضير ,,,أني قد رضيت بذا السحري
فحبـك قـد أضحـى لقلبـي طـاقـةً=بهـا زاد حبـي للحيـاة وللعـمـري
رسائلـكِ فـي القلـب لازال بوحهـا=يفوح كأزكى ما شممت من العطـري
أملهمتـي ؟؟ إنـي أتيـتـك سـائـلا=فلا تهجري قربي ,,ولاتقربي هجـري
أُسائل نفسي !! ياتـرى مـن حبيبهـا=فأسعد به حظا ,,وأكـرم بـه فخـري
فإن كنت قد أحببتـي غيـري سابقـا=فهل ياترى مثلي ,,سيحببـكِ غيـري
كمـا أنـكِ تدريـن عمـا بداخـلـي=فياليتنـي عـمـا بداخـلـكِ أدري !!
ولست كمن صلـى إلـى غيـر قبلـةٍ=فـلا فاتـه إثـمٌ ولا نالـه أجــري
ولكننـي كالغيـث يعـرف روضــةً=إذا هل فيه القطـر تنبـت بالزهـري


&&&

[صوت القلم]

كـل ماشفتـك تزاحـم بـي المشـاعـر=اكتـب الخـاطـر وأعــود وامسـحـه
خاطـري الثانـي علـى الاول يفـاخـر=وكـل منهـم طـيـب بيـتـه رشـحـه
ويعتلـي منهـو علـى الجزلـه يـبـادر=يقنـص المعـنـى البلـيـغ ويطـرحـه
لاتلـوم الشعـر لاجـا فـيـك حـايـر=الـغـرام أحـيـان مـحـدن يشـرحـه
كـل بيـت كابـرٍ ..لاجـاك صـاغـر=مؤسـف ان ســري مـعـه مابيـحـه
مؤمـن ان الـحـب تبـديـه النـواظـر=تختصـر كــل الشـعـور وتفضـحـه
وللمحـب أحـوال فـي بـوح الخواطـر=وان كتـم بـوحـه تـراهـا تفصـحـه
رجف قلب .. ورعش كف .. وزين خاطر=وغض عين .. ونشف ريـق .. ونحنحـه
ورشح وجه .. وقل حكـي .. ومايناظـر=زود حبـه ..مـن الخـجـل مايشبـحـه
اسـأل مجـرب وانـا مـانـي مكـابـر=صـادقٍ .. والـصـدق كــلٍ يمـدحـه

******

[صوت القلم]

ماشفت مثلـك ولا بشـوف=ياويـن أنـا مثلكـم بلقـى
هزيتني هزةٍ مـن الجـوف=هـزة غـلا لذتـه تبـقـى
عليك قلبي غـدا ملهـوف=والكبد فـي بعدكـم حرقـى
وبالصدر عبرة ورجفة خوف=لاهيـب تنـزل ولاتـرقـى
أخاف من موقـفٍ معـروف=لا اقفيت ثم حانت الفرقـى
القلب عن غيركم مصـروف=والروح في حبكـم غرقـى
بك جاذبية وزين اوصـوف=وقلبك بعد من المطر انقـى
شعري لوصفك غدى موقوف=كله لأجل عينـك الطرقـى
*********

[صوت القلم]

ياشيـن صـدة مـن تحبـه وتغليـه=خص الامـن صـار يـدري بحبـه
يصـد عـن عينـك وقلبـك يناديـه=صدته هـي جرحـه ولامـاه طبـه
يغيب عنك .. وجاهلٍ وين اراضيـه=وتقول ليـت ادروبـي اتمـر دربـه
*هذاك خلـي جعلنـي والله ماابكيـه=اغليه فـي حـالات سلمـه وحربـه
يابخـت عيـنٍ كـل يـوم تراعيـه=وياحـظ منهـو نـال حبـه وقربـه
حبه بقلبي .. مثل ماهـو درى فيـه=ياليت انا ادري ويش قـدري بقلبـه
واسمه الامن مـر بـي قلـت لبيـه=وأقول حي ذالعيـن .. كنـي منبّـه
*لا شك بدعي له عسـى الله يحميـه=من كل شـر وكـل بـاس وكربـه
ان عـاد لـي مشتـاق فالله يحييـه=القلـب بيتـه ساكـنٍ وسـط لـبـه
*وان راح .. عزالي .. فلانيب ناسيه=قربه امان ..وغيبتـه طـول غربـه
*هذي سواة الحب ..وهذي مواريـه=ياظامـيٍ للحـب دونـك مصـبـه
/
/

[صوت القلم]

طاريك لا مر في بالـي وانـا ضايـق
يزول عنـه الكـدر والهـم والضيقـه
انت الذي فيك شعـري زاهـي ولايـق
يومه من القلب من صافـي معاليقـه
يسوقني لك من اشواق الولـه سايـق
بالذات لا ابطيت زاد القلـب تشويقـه
وان شفت عينك .. أصد وخاطري رايق
من زود حبك نظرهـا مااقـدر اطيقـه
حبك عن الغير وصفه فـارق وفايـق
ما اعجبني الا انت من بـدة مخاليقـه
واحس ما فيه بيـن ارواحنـا عايـق
الولف مـا بيننـا ياصعـب تفريقـه
واللي مجرب ومن بحر الهـوى ذايـق
ماهوب مثل الخلي مابـل بـه ريقـه


•••••

[صوت القلم]

يابخت شعـري بعينـك يـوم تقـراه
احس من فرحتـه ..يلعـب ويختـال
وشعري الا من كتبتـه فيـك محـلاه
ينقاد لي مثـل قـود الخيـل بحبـال
والشعر لاقيل في اللـي كفـو يزهـاه
يومه لجـزل الثنـا والمـدح مدهـال
ديوان شعـري ونثـري كلـه افـداه
يستاهله ..ماشرطت الحب .. بوصـال
حبه بقلبي تمكـن مـا اقـدر انسـاه
حتى وهو غايبٍ .. دايم علـى البـال
قانون جذبـه ..عجيـب فـي مزايـاه
يجذب والا من بغيت الثقل .. ما احتال
أحيان صمتي .. يكفـي يـوم لقيـاه
وبعض الغلا في النظر .. ماهوب ينقال
ياصاحبـي هـذي أشواقـي مغـنّـاه
دونك تقهوى .. وخذ من الشوق فنجال


•••••••

[صوت القلم]

مدني بالوصـل يالظبـي النفـوري=..ودي اتنفس ..ترى وصلك هـواي
ملهمة شعري ويااجمـل عطـوري=نفحة من عطـرك الوافـي دفـاي
آه لو تدريـن وش قمـة سـروري=انك بدرب العمـر تمشـي معـاي
كنت حلمي كنت اماني كنت نـوري=كنت اشوفك في الملا غايـة منـاي
ويش اسوي صار حبي لك ضروري=هو هواي وهو بعـد زادي ومـاي
لابغيت اجيك يامعجـل حضـوري=وان بغيت أغيب يامثقـل اخطـاي
والله انـي دايـم أكتـم شـعـوري=ميـر حبـك يالغـلا بيـح خفـاي

[صوت القلم]

ياماحلا مقلب الغالي وهـو يمـزح=جاني وهو يشتكي ويقول زعلانـي
يقول لاترتجي وصلي ترى ما اسمـح=انك تعشم بي احبـك ياسلمانـي
وهددني انه نوى عن ديرتي ينـزح=ويقول ماني على شوفتك شفقانـي
وضاقت علي الوسيعة وين انا بسرح=وهو مراحي ومسراحـي وعنوانـي
ياهيه قلبي بحبك غـاديٍ مسـرح=واصبحت به منتج ومخرج وفنانـي
تراك تملك حقوق الحب ومصـرح=لك انت حصري بدون منافسٍ ثاني
ياجعلني ما ابكي اللي شوفته تشرح=اللـي محيـاه جـذابٍ وفتـانـي
افرح بشوفه وهو مثلي بعد يفـرح=واجمل حديث الهوى حديث الاعياني
بعده خساره وقربـه منـي المربـح=ياليت لو ينشرى قربـه بالاثمانـي
الحر نفسه لمرقاب العـلا تطمـح=دايم على الماكر المرفـوع هيمانـي
وانتي وصوفك بعيني وزنها يرجـح=دينٍ وزينٍ وخلق وبنـت شيخانـي

[صوت القلم]

ملهمة حبي تعالي وأسألي = خافقي عن حبك اللي ما يضيع
كل ما جيت أبتعد عيا عليّ= قلبي اللي للمحبة مايبيع
مانسيتك لو بعد عندي هليّ = كيف أنا أنسى عندكم قلب وديع
صرتنا من عقبكم كني خلي ّ = لاصديق ولارفيق لي سميع
لو دريت بدمعي اللي يهملي = من غلاك اللي على غيرك رفيع
كني الطفل الغرير أبلا ولي= لاتغذى من محبتكم رضيع
فيك سحر ماخبرته مذهلي = يجعل اللي عاصي يصبح مطيع
وفيك طيب فاخر مايجهلي = شامخ مثل البدر فوق الجمييع


&&&&&&

[صوت القلم]

ياملهمة شعري وبوح التعابير = ياللي لفتي نظرتي وإنبهاري
تلومني لأخفيت حبك عن الغير = ما ودي أحد عن محبتك داري
بكيت لأجلك من محبة وتقدير = دمع الغلا ماهوب دمع أنكساري
وكتبت لأجلك أصدق الشعر تصوير= عن حبك اللي في الشرايين ساري
ومن شان وصلك ماحسبت المخاسير = وللقرب منك يامنى الروح شاري
أغليك من بد البنات الغنادير = يومن ما أحد في مقامك يجاري
قلبك ملاه الصدق والطيب والخير = من قبل أعرفك بس صدق أختياري
أحس ذاتك بين كل العرب غير = ويحق للي في وصوفك يماري
وأنا اعتذر لك كان في الوصف تقصير = وأقدم التقدير قبل أعتذاري

&&&&&

[صوت القلم]

النـوم عيـاّ يطـب العيـن ياآآمـا=من سبة عيونك اللي تطرد النوم
يازين نظراتها من عقـب سلهامهـا=يحرج نظرها وأغض الطرف وأقوم
من يوم ماجيتكم والقلب بـك هامـا=والقلب حرٍ على لاماك مغروم
مجناك من لابةٍ من روس الأروامـا=من دار أكسفورد في بريطانيا الروم
ديرة هل الكفر والله يعـز الأسلامـا=لاشك جينا لها من شـان ملزوم
نطلـب علـومٍ تنومسنـا بالأنعامـا=وتنومس اللي ورانا يآخـذ اعلوم
والحب مافيه عيب قبـل مـا آلامـا=الحب قد طب فيه شيـوخ وقروم
وحنـا تغزالنـا مافـيـه حرامآ=ماغير بلا نقضي الوقـت واليوم
ولا فأنا مثل حرّ(ن) في العلا شامـا=ماهوب يمشي مع الشبوط والبوم
والنفـس عودتهـا للعـز تنهـامـا=لاصار هم الردي في البطن وهدوم
وختامها بالصـلاة وخيـر سآلامـا=على نبيّ مـن الـزلات معصوم


&&&&&&

[صوت القلم]

ياحبني لأسمك إلى مر طاريه = أسم مميز فارق في الاسامي
والله لولا خوفتي من المشاريه = لا أقول أسمك في بداية كلامي
فزيت لأسمك يوم انا جيت قاريه = من قبل أعرفك بس مدري علامي
مدري انجذاب القلب هذي معانيه = ولا ظنون مثل حلم المنامي
انا انسان واضح في مباديه = لي مبدأ في الحب نادر وسامي
صادق وحساس وللعز شاريه = وعلى الوفاء والطيب ترسخ اقدامي
هذه بطاقة شعر بالود نهديه = لك ياعزيز الاسم وأقبل سلامي

[صوت القلم]

تقول ليش أخترتني بين ذا الناااس = غيري ترى واجد بنااات كثيرة
وأقول أنا من عادتي عشق الالماس= اللي الا منه حضر غاب غيره
لي نظرة أفحص بها كل الاجناااس = وأعرف بها الغالي وأميز نظيره
شاعر وقلبي صادق الود حساااس = وأدنى كلام من حبيبه يثيره
عزيز نفس لكن الحب سواس = يسوس روس في المعالي شهيرة
دقيت بابه بس نسيت الاجرااس = ودخلت وأجهل منزلي في ضميره
واظن مالي عقب كلمته مجلاس = بودعه ياعل في الامر خيره
لكن احب اقول لك كلمة الراااس = من قبل كل يتجه في مسيره
ان كان لك في الحب حظ ونوماااس = فالحب مايستاهله غير اميره


&&&&&&

[صوت القلم]

ارجوك ردي علي وجاوبي صوتي = ياشين سفه الحبيب وشين صداته
وصلك حياتي وبعدك يالغظي موتي = والقلب من زود حبك هاضت آهاته
ماينفع الصوت لامن فاتك الفوتي = ياشينها لوعة المشتاق لاجاته
احب فيك العقل والزين مثبوتي = والثقل والدين والمنسب ومجناته
عريبة في أصلها والطيب منعوتي = والخلق فيها تجلى كل آياته
قدرك وحبك بوسط القلب منحوتي = على الوفاء والنقا ياطول راياته
اهديت لك من جزيل الشعر ياقوتي = عقد وتستاهله ياغاية ابياته

[صوت القلم]

ياملهمة قلبي من الشعر والشوق = لولا عيونك ماكتبت القصيده
كل القصايد من سبب ناعس الموق = كتبتها لك يالجفول العنيده
أموت لامن دنقت والنظر فوق = لبا العيون الناعسات الفريده
الزين والاحساس مع قمة الذوق = وثوب الشرف والعز تلبس جديده
والله مايرتاح بالي ولا اروق = إلا الى صارت حياتك سعيده
احس قلبك بابه اليوم مغلوق = ولالي حساب يوم تكشف رصيده
عزي لمن يعشق ولاهوب معشوق = مثل الذي يطرد سراب يريده

*******

[صوت القلم]

ياحبي الصادق تمنيتك اتشوف= حالي بعد فرقاك وش صار فيني
انتي الامان الى ملى قلبي الخوف = وانتي الامل لامن ملى الياس عيني
تدري ان حبك راسخ داخل الجوف = ماينمحي مهما تطول السنيني
الدمع في بعدك على الخد مذروف = والشوق يمك فايض به حنيني
لاشك قلبي عن هوى الغير مصروف = مايبغى الا حب صافي الجبيني
نظرتك فيها الحب واضح ومعروف =لو كان ماتنطق فحبك يبيني
يكفيني انك حي ياقبلة الشوف = ولو كان حال البعد بينك وبيني

******

[صوت القلم]

آهٍ ,,أملهمتي ,,,لجُل فراقي

ومصيبةٌ ليست ككسر الساقي
أمضيتُ حيناً في إرتشاف ملذةٍ
مازلت أذكر طعمها بمذاقي
كانت لياليَ فرحةٍ وتآنسٍ
وتآلفٍ وتواصلٍ وعناقي
حتى بدت شمس الفراق وليتها
في هجركم لم تعلن الإشراقي
لكنها قدرٌ وربّ مصيبةٍ
إرهاقها تعقبه بالإشفاقي
أرقابُ شعري !! فأنثني إني إلى
روضٍ أغرٍ مثمر الأوراقي
روضٍ إذا حل المحيل بأرضه
وجد الحمى مخضّرةَ الآفاقي
ذاك الذي عبق الرحيل بعطره
وشذاه في ثوب الأحبة باقي
مني إلى عطر الرحيل تحيةً
فواحة بالحب والأشواقي
قلمٌ إذا عرك الكتاب رأيته
كالبحر لاندركه في الأعماقي
قلمٌ سما في المجد روعة رسمه
وإليه دوما تشخص الأحداقي
في طرحه ,,في نظمه ,,درر كما
نظم الجواهر في عرى الأعناقي
غيثٌ إذا هطلت بشائر قطره
أحيت نبات الحرف في الأوراقي
فبمثلِ شخصكمُ يفاخر منتدى
سمُّوه ليلاً حوله عشاقي



&&&&&&

[صوت القلم]

ياحبيبي مادعاك الشوق يمي @ مثل ماهو قد دعاني اليوم يمك
ادري انه ما حدن بيشيل همي @ بس انا اللي شايل يالترف همك
نقوة من روس قوم ماتذمي @ محتويك الطيب من خالك وعمك
حور عين وغض جسم ودق فمي @ تخجلك من زينها لاجات يمك
جاذبية روح معها خف دمي @ سعد منهو ماخذك من ديرة امك

[صوت القلم]

حبك أمان القلب فـي لحظـة الخـوف =وهو الوطن فـي وحدتـي وأغترابـي
وهو الملاذ إن وقفت ضـدي أظـروف =ألقـى بـه القـوة لنطـح الصعابـي
الحب أمـان يجمـع قلـوب وكفـوف =علـى المـودة والنقـا والصـوابـي
أنتي الحقيقة لاغدى الزيف مكشـوف =لاكثـرت وجيـه عليـهـا ضبـابـي
أرتاح لاشفتك ..وأنـا فيـك ملهـوف =لهفـة غريـب عـاد عقـب الغيابـي
وأقرى بعينك كلمـة الحـب وأشـوف =فيها على أجمـل سـؤال ..الجوابـي
بالجاذبيـة والغنـج فيـك موصـوف =وهي السبب فـي لهفتـي وإنجذابـي
القلب عقبك عن هوى البيض مصروف =ماعاد حسـب فـي هواهـن حسابـي
تدري بحبـك راسـخ داخـل الجـوف =ماينقصـه طـول الهجـر والعتـابـي



****

[صوت القلم]

أبتعد ولا أقترب ماعـاد تفـرق=دامني عرفت حبك لي رضيـت
ما أبي منك لسان الحب ينطـق=بس يكفي من نظر عينك حكيت
نظرتك لاشفتها بالحـب تبـرق=ارتوي وصلك ولوني ما ارتويت
انت يابهجة حياة العمر تشـرق=كل صبح وكـل ليـلٍ لا لفيـت
زود شوقي خايف لاجيت يحرق=كل كلمة في خفوقي واستحيـت
يكفي أنك حي ..لو البعد يزهق=كل حلم عنك اشوفـه لاغفيـت
لو على الدنيا ..سفينتنا بتغرق=خلني بغرق بحبـك ..لاحييـت

[صوت القلم]

يابنت ياللي جمالك يحرج العين =والقلب من شوفتك هيض غرامه
لاو الله إلا ترك في القلب جرحين = جرح المودة معَ جرح الملامه
زينه عجيبٍ ويرجح في الموازين = ويفرض على الغير حبه وإحترامه
ياليت أنا أدري بقلبه وش لي ألحين = وياليت يدري بقلبي وش مقامه
ياهيه ياالمترف المكنون يالزين = يافارق في البنيّ رزةّ لثامه
أنا أشهد أنك قليل في المزايين = وعلى النقا لابس ثوب الكرامه
ماهذربوا بك معارضة الحكا الشين = وعرضك نزيهٍ ولا فيه اتهامه
مير أنت مثل الثريا في السماكين= ويابعد ثوبك من العيب وحرامه
وان جيت في منسبك والله و نعمين = أمعرب من خوال ومن عمامه
جمعت بين الحلا والخلق والدين = وياسعد منهو غديتي من سهامه

[صوت القلم]

هو كذا.. نعشق اللي مالنا بـه نصيـب
هو كذا ..حبنا يالتـرف يذهـب سـدى
هو كذا.. اللي بعيد ..صعب يصبح قريب
هو كذا.. اللي قريب مـا لقربـه جـدى
هو كذا ..الشوق يذبح عند طاري الحبيب
هو كذا.. لو يصيح الشوق ماله صـدى
هو كذا.. الحب يصبح.. لارقيب وحسيب
هو كذا.. شوهوه اللـي يبـون الـردى
هو كذا.. طيب النيـات مالـه صحيـب
هو كذا ..اللي ردي مايجـي لـه عـدى
هو كذا.. انا غريب او زمانـي غريـب
هو كذا ..الصح غلطة والغوايـة قـدى
هوكذا ..ذي مفاهيـم الزمـان العجيـب
هو كذا .. الدين يرجع مثل ماقـد بـدى
يالله اني طلبتك وانـت نعـم المجيـب
ياكريـم وعـفـوك مايـحـده مــدى
انـت نعـم المـلاذ وزاهمـك مايخيـب
ارتجي منك عفـوك والرضـا والهـدى

******

[عاشقة الفردوس]

كل التحايا والتقدير لقلمكم

[الوطن]

من اجمل القصيد الللي طالعته

تسلم يدك

[رقة احساس]

عبق نرجسي يسطر بعذوبه
وجمال يعانق السماء كجمال الانتقاء
على الطرح الراقى
يعطيك العافيه ولاعدمنا جديدكم
تحياتى

[ريهام عيد]

من اجمل القصيد الللي طالعته

تسلم يدك

[بثينة]

مشكووووووووووووووووووووووووووووووووووووووور

[الهندباء]

شكرا جزيل لمشاركتنا درر قلمك

واحساسك الرائع