ديوان عبدالله الحضبي [الأرشيف] - منتديات مشاعرهم الادبية

عبدالله الحضبي

05-10-2013, 09:05 AM

أنا والحمامة

سمعت الحمامه ترفع الصوت يوم تنوح= تجر الهديل ومن سمع صوتها ناحي
تلاحي لها ورقاً قبل مايبين الضوح= حنين الحمامه زوّد الهم وجراحي
علام الحمامه عند عذق النخيل تبوح= أبي مثلها مير العزا والصبر باحي
همومٍ على قلب الشقاوي تجي وتروح= وزوّد عناي.. البعد في خاطري لاحي
مضى الوقت والقلب المعنى يزيده فوح=ومالي جدا غير أومي بسلك مسباحي
ألا يالحمامه كان لك في اللحن مصلوح= تراني بجر الصوت والصوت فضاحي
وأغنِّي بموالٍ يجي من عروق الروح= عسى الهم من عقب المناجاة ينزاحي
ألا واهنيك خاطرك دايم مشروح= ليا ضاقت الدنيا تخَفْقِين بجناحي
تروحين في جوٍ خلا ماتجيه سروح= بعيدٍ عن هروج العياره والأمزاحي
وأنا في عذابي مغرمٍ تايهٍ مجروح= بهاذيل قلبي جنـنـتـني وأنا صاحي

عبدالله الحضبي

05-10-2013, 09:06 AM

سراب الولع

أفكر وأعاني من عنا الملهمه وآفيق=وحلمي يصاحب مغرمٍ في الهوى ضامي
لأن الأماني في هموم الحزين تليق= تناجي جريحٍ يحرجه جرحه الدامي
على السلهمه بأشكي من الرمش والتحديق= وعلى أحمر شفاته بشتكي زفرة إلهامي
وعلى الضحكة الخجلا بنادي صباح الريق=من البسمة اللي ترسل رماح وسهامي
ولكن عرفت الفرق في لحظة التصديق=وتاهت معاناتي على صفحة أحلامي
سراب الولع جاله على النايفه تبريق=وضاع الخيال اللي توهمت قدامي
رسمت الأماني في ضميري بلا توثيق =ووقعت للآخَر قرارات بابهامي
وما زلت في دوامة خلفها تحقيق=صدوف الليالي دورها في الزمن حامي
زمان التخلف والألم والقهر والضيق=وعصر التبختر والتكبر والأوهامي
طغى فيه حب الذات مع نبرة التنميق= وجوهٍ تلمع نفسها بلا هدف سامي
وضاع الحزين بموجته تايهٍ غريق=يصارع زمانه مع مقادير الايامي

عبدالله الحضبي

05-10-2013, 09:09 AM

جزل المعاني
حلاة الشعر في جـزل المعانـي =سلامة فكر مع روعة طـوارق
يتوه الشعر في معنى الاصالـه=وبين الغث واجمل شعر فـارق
وكل فيه يبغـى لـه مكاسـب=لكن الطايلـه لاهـل البيـارق
تضيع القافيـه لا صـار فيهـا=معاني غامضه والرمز غـارق
وتعز القافيـه لا صـار فيهـا=جزالة لفظ ولا اسلوب شـارق
وحلاة الشعر في وصف المكارم=يجيله في المراجل وصف حارق
انا في موقف الجـزلات مغـرم=عسفت القاف عسف ام العشارق
اخذت امجاد ابوي ومجد جـدي=على العليا ملكنا طيـب بـارق
وحزنا كـل روعـات المثايـل=علامات الفخـر والمجـد وارق
انا واللي بعـد مثلـي نجيبـه=ونرمي المهزله وسط المحـارق

عبدالله الحضبي

05-10-2013, 09:10 AM

السجايا الفاضلة

الرجل لا منّه بغى عــز نفســه= المرجله يرقا بعالي قممها
في الطيب والشيمه وجزل المعاني= يشيــــل بيرقها ويرفع علمها
كل السجايا الفاضله يهتـــــويها= ونفسه عن دروب المذله فطمها
كم من عزيز لابغـيته لقيــته=يفز لك وليا ندبـــــــته فهمها
وكم من صديق جاهل مايفيدك= تبغــــى المسره مير يوْلِع فحمها
راع المكارم والوفا والحمـــــيه=مهوب مثل اللي تردت ذممها
ابشر بعزك في ظروف اللـيالـي=تسعـــد بفعل نادر من شيمها
في كل معنى طيّبٍ للجزاله=تلقاه ثابــــت فــوق عالي هرمها
الطيب والمعروف مبدا طريقه=وكل العلوم اللـــي تنومس حكمها
ولا ترتجي من حاقد علم غانم=ولا تقرب الحــــيه ولو ربط فمها
واللي يعزك لا توريه سيّــه=رد الجمـــــايل يافتى واغتنمها
ولا ضعيف النفس ماله مكانه=نفــسه ضعـــيفه مايعالج ورمها
أنا اشهد إنـــه عالةٍ في حياته= ماكل مــن يبغى الشكاله لزمها
الدين والتقوى رمــــوز السعاده=وأخلاقك وطيبك يزوّد هممها
الطيب بين في رجال الشهــامه=يبـين للغالــين مركز كرمها
أبوك له طاعه وتقدير واجب=ودوّر رضا أمـك لو تقبّل قدمها
واخوك عزك لا جفتك الليالي=واختك على طول الزمان احترمها
آخر كلامي قلت جملة معاني = أبيات من شاعر حكـــيمٍ نظمها
وصلاة ربي عد رمل الذواري= علـى نبيٍ سن حجّــة حرمها

عبدالله الحضبي

05-10-2013, 09:12 AM

أنا والذيب

ياذيب الشقا ليه أنت هيضتنـي بعـواك=وصوتك شعى قلبٍ من الهجـر قزانـي
حنين المولـع لا تذكـر عنـا شكـواك=تهيض شجونه بين لوعـات وأحزانـي
مع الصبح لاجرّيت صوتك على مبـداك=يزيد الولع في القلب باشكـال والوانـي
أنا أقول يم الضلـع ياذيـب وش وداك=صدى الصوت ذكرني بهاذيـل خلانـي
ألا واعذابي لاقبل الليـل فـي رجـواك=تزايد همـومٍ سببـت دمـع الاعيانـي
تجدد جـروحٍ عذبتنـي بعـد مسـراك=وصوتك يخفف لوعة تحـرق أجفانـي
بسوي سواتك وأقنب الصوت وأخذ وهاك=من الغيض واللوعات والحزن واشجاني
ولي رغبةٍ ياذيب فـي ملتقـى نجـواك=أبي منك تشرح ماجرالك علـى شانـي
ترا اللي جرالي.. ياصديق الخلا قد جاك=تعاني من الويـلات والبطـن جيعانـي
وأنا في همـومٍ عذبـت مغـرم حليـاك=عذاب يزيد اللي على الوصـل هيمانـي
حسين المحيا ،ناعم العود ،غصن الراك=عُذيب اللمى، منبـوز الارداف، ريانـي
ذبحني وأنا فـي عالمـه فاقـد الادراك=تعلقـت بـه مابدلـه واحـدن ثـانـي
لأنـه هـو اللي حطنـي داخـل الشـبـاك=ملك مهجتي وأصبحت تايـه وحيرانـي

عبدالله الحضبي

05-10-2013, 09:13 AM

ليل وسهر وأحزان

الطرف من فرقا المحبين ساهر=ليل وسهر وأحزان واوجـــــــاع راسي
كل الملامح تختفي والمظاهر=لا صار فيها نوع بعــــــــــــــض المآسي
الفكر مشغولٍ على وضع قاهر=ومن لوعة الفرقا تزوّد اعمـــــــــــــاسي
جرحي عطيبٍ من سبايب جواهر=مايحتمل صبري يكود الرواسي
واللي حصلّي صار بيّن وشاهر= أسباب شخصٍ في المواصيل قاسي
والله لولا إني نبيهٍ وماهر= وعندي عـــــــــــزوم وقو سلطـــــــه وباسي
إني لوضّح ماجرالي واجاهر= واشرح معانـــــــــاتي لربعــــي وناسي
يمكن يجي حلٍّ سريعٍ وزاهر= يخفف هموم الضمـــــــير ويواسي
واليوم صار الوضع والعلم ناهر= شربت من مر العنا وسط كاسي
لكن ابااصبر والفرح نور باهر=ينْــتابني هم وملامـــــــح احساسي

عبدالله الحضبي

05-10-2013, 09:14 AM

مساحه مذهله

في منطقة مليئة بالثلوج وأشجار الغابات كانت خطواته التائهه تعبر الطريق
فقلت :
خطوةٍ تاهت على نْهاية طريق= وسط صحراء في مساحهْ مذهله
لا أنيسٍ في الطريق ولا صديق= ربما هــــــــــــذي حدود المسأله
حاول إن الهم ينزاح ويضيــــق=وحاول أيـــــــــــام السعاده تشمله
لكن الحظ المعنى مايفــــــيق=مابقى شــــــيٍ جمـــــــــــــيلٍ يعمله
شاف له عن بعد معصار وبـــريق= كلها صــــــــــــــارت أماني مهمله
من جبر نفسه على مالا تطيق=عاش فــــي الدنيا حيــــــــــاةً مثقله
ومن يواسي في الحزن شخصٍ غريق=يرزقه ربي من الخير أكمله
القيم والطيب والمجـــــــد الوثـــيق=من عـلامات الكرم والمرجله

عبدالله الحضبي

05-10-2013, 09:15 AM

عزيز النفس

قليل من ينفع بوقت الشدايد = وقليل من يمشي على اوصاة جده
قد قيل في الاجناب واللي نوايد= ماخبر به معروف 000 يرجع لضده
وراع النمايم 00 والهروج الزوايد = كلن يسبه مايبي له موده
يعيش وحداني00 ويجلس محايد= محدن يلد اله النظر او يعده
وبعض البشر دايم حياته نقايد= اسلاحه النمه على الناس حده
يشبها بين القرابه وقايد = ولامن بغيته حبل وصله يلده
*************
قالوا هل الحكمه علوم سدايد= باب يجيب الريح فضل مسده
************
رفقة عزيز النفس مكسب وزايد= واما ضعيف النفس مامنه شده
ابعـد انـا عـن ديـرة اهـل النقـايـد=وابنـي بـيـوت فالـخـلا مجـرهـده
اروح عنـد الـلـي كثـيـر الفـوايـد =وأكسب منـه معـروف وعلـوم عـده
ويصيـر لـي عـون علـى كـل كايـد=وأنـا بـعـد بصـيـر مثـلـه وقــده
ودار الهـوان تصيـر للـبـوم عـايـد=وانـا تـرى بــاب المـذلـه بـسـده
احـيـا حـيـاة كلبـوهـا سـعـايـد=والـذل نفسـي مـا تجـيـه وتــوده

عبدالله الحضبي

05-10-2013, 09:16 AM

صمت الزوايا

نظرتك والضحكه الخجلا براءه = وان وصفتك صارت اوصافك ملاك
تسحرين بجيد من نوع الجراءه= تلفتين انظار من حولك .. وجاك
تذبحين اللي شكا دنيا هناءه= عاش في عالم بعيد عن غلاك
عاشقك محروم واهدرتي دماءه =من عنادك ربما شاف الهلاك
وسط كفك تاهت حروف القراءه= ضاع في مستقبل ن يحكي بهاك
وكان للكف المحنى من اضاءه= امسحي حزن المعنى في هواك
بدلي نار الألم منك انطفاءه= وارحمي صبا شكى لوعة جفاك
شارب ن كاس الولع فن ونقاءه= ماعطش حبك ولا حتى رواك
من هموم الوجد واحزان الاساءه= تاهت احلامه على رغبة لقاك
غيري صمت الزوايا بانكفاءه= واعلني جو السعاده في سماك
عاشقك مغرم ويبغى له براءه= عايش بآمال في دنيا رجاك

عبدالله الحضبي

05-10-2013, 09:17 AM

لوعتي

من لوعتي رقيت روس المشارف=اخفف اهموم (ن) لجت داخل الجوف
اكامد العبرات والدمع ذارف= دمعي خطير انه يؤثر على الشوف
الهم والهوجاس جاله طوارف= فرقا وتفكير وبهاذيل وظروف
أخفف اللوعات والهم جارف= لكن عذاب القلب خافي ومعروف
خافي ومرسوم بشمس المعارف= من يفتح الطلسم ويبعد عن الخوف
قلب العنا من لوعة البعد كارف= وزوّد عنى قلبي غرابيل واصدوف
بينت علمي للثقات العوارف= وش حيلة اللي عن نواياه مكتوف
اشكي على اللي للمقادير عارف= رب (ن) كريم ن عنده السر مكشوف

عبدالله الحضبي

05-10-2013, 09:18 AM

يوم الفراق

يـوم الفـراق يحطـم العمر..والـروح=لـه موعـد يجـرح حـلاة التسـلـي
وخطوة إحساسي ناظرت كلى مجـروح=والحلـم ثار..وسـال دمـع التغـلـي
وليل الموادع..مظلـم دونـه اصـروح=ياغايـة العشـق ..هــذا حصـلـي
صوتي نشف ..والحرف عطشان مطروح=عطني ..فـرح .خـل التعاسـه تولـي
صارت هموم الليل.. صرخـات مذبـوح=وصـارا لعنا..والويل..عـزي وذلــي
حتي همـوم الدمعه..اللـي لهـا فـوح=تتعب مع الهاجس..وتشكي هوى اللـي
لا رحت عني ..لوعتي تقصـر النـوح=ولاجيتنـي خـوفـي ..تبدد..محـلـي
غردت فـوق الحزن..لحظـات وتـروح=ماتـدري إن الحلـم ..لحظـه تجـلـي
جيتك وشوقي ..طيف والبـاب مفتـوح=ولهفة حنينـي وقـت رمضـاك ظلـي
أنـا متاهاتـي سهر..وانـت مفضـوح=دربـك مشاويـره عـذاب ..وتغـلـي

عبدالله الحضبي

05-10-2013, 09:19 AM

الف مفتاح

رسمت لوحات الالم والمآسي = في وسط ساحات السعـــــــــاده والافراح
تفصيلها يجري بوقت قياســــي= يجرح سنـــــــــــين العمــر بسيوف وسلاح
الله ياوقت على القلب قاســي= مافيه يوم صــــــــــــــــــار سالــــــي ومرتاح
يسري بي الهوجاس واوجاع راسي= في عالم كله متاهـــــــــــات واشباح
شربت من دنيا الوله وسط كاسي= ماارتحت يوم ولا تهنــــــــــــيت بمراح
واخذت في اللوعات فصل ن دراسي= فصل طويل مايبي شرح وافصاح
ندرس علوم في المجال الاساســـــــي= والحزن لو يخـــــفيه راعيه فضاح
لكن تخطيت المسافــــــــــــــــات ناسي= وفتحت بيبان الامل بالف مفتاح
واليوم صار الدرب خـــــــــط انعكاسي = الهم زال وداعي الحزن قد راح
تغيرت موجات همـــــــــــــــــــي وياسي= وتبعثر الوقت المعـــــنى بالاتراح
عزم وتوكل وابتهال وتناســـــــــــــــــي= زاد الامل في ديرة الحزن واجتاح
بنيت بيت بالعلاقات راســــــــــــي= مايجرحه برد وعواصــــــــــيف الارياح
جلست في عزة ربوعـــــــي وناسي= مشاعري مابين ضحكــــــــــات وامزاح

عبدالله الحضبي

05-10-2013, 09:20 AM

اسعفوني :
يازين قلبي في هواكم تمركــــــز = وحبك ترى في داخل الجوف لازي
وحالي من الفرقا على صالي القز = من قو ناره يشعلـــــــــــــــــــــونه بغازي
واصبحت من جور الليالي ملعوز = اسباب خل(ن) صـــــــــار في انتهازي
توه غرير(ن) فالهوى مابعــــــــد نز = ولاله شبيه باليمـــــــــــــــن والحجازي
من يوم شفته 00 صاب قلبي وله فز = ملك مشاعر خاطــــــــــري بامتيازي
آثار حبه بيناتٍ لها حــــــــــــــــــــــــــز = حتى الفرح والهــــــــم صار متوازي
حب سقيته دم قلبـــــــــــــــــــي تعزز = واليوم طارت به هبـــــــوب النوازي
وماتت غصونه بعد مهيـــــــــب تهتز = من عقب ماهو فوق بيـــــــر ارتوازي
وين انت عني ياهوى البال واعتز = واسعد بقربك كان قربــــــك مجازي
ياناس شوفوا حالة اللــــــي لكم دز = يشكي عليكم من مهــــــاة الجوازي
اما اسعفوني قبل علم يبـــــــــــــــــرز = ولا اتركوني وارسلــــــــــوا بالتعازي

عبدالله الحضبي

05-10-2013, 09:21 AM

بيع الصداقه

ابعد وانا ابعد ماحصل منك كافـــــي = سويت فعل مايســـــــــــــــــويه رجال
صديقي المخلص له الطيب صافــــي=ولا انت خداعن ونـــــــذل ومحتال
غنمت غراتي وانا عنـــــــــــــــك غافي=لانك صديقي ماتسمــــــعت الاقوال
قد انصحوني عنك والعلـــــــــم خافي= وثقت فيك وخاب ظــــني بالازوال
سبيتني ماجاك مني خــــــــــــــــــــلافي= وجرحتني جــــــرح عطيب ولا زال
يامسلم اعرض مانبي لـــــــــــك ملافي= كرهت معرفتك وشكلك والاحوال
لاترسل وتشفق ولا انته بـــــــــــــــوافي= ارجوك تنسى كان في الثوب رجال
نور العلاقه في شوارعـــــــــــــك طافي= حطيت رسمــــك في قمامات زبال
لبستك التقدير يــــــــوم انـــــت حافي= وجازيتني بلعـــــــــن رسالات جوال
كثرت حماقاتك وبالفــــــــــــعل هافي= عيالي تراهم مــن عنا البغض جهال
حطمت ساعات الفرح والتــــــــــشافي= صداقتك راحت تهــــاويل واهوال
جوك تراه احيان صافي ودافــــــــــــي= شربت كاسات تريــــــــــح لك البال
وبعت الصداقه بالحمـــــــق والتجافي= يانعنبو دنيا العنا مالـــــــــــــــــها حال
كيف الصديق يخون مـــن كان وافي= والغدر يسكن قلب ابن عم او خال
وراع المروه والشيم صــــــــــار جافي =ولو تبحثه جاب المطـــــــمه ولا سال
ثوب الغدر مكشوف لــــــــو كان ضافي= يفضح فعوله ويتــــــــــــباهى بالافعال
الكلب ينبح مير صــــــــــــارت عوافي= ولهوب ساكت فيه خبطات واهبال

عبدالله الحضبي

05-10-2013, 09:21 AM

الظبيه

انا اللي على فرقاك حالي طواها الشوق = وانا اللي بعد فرقاك حالـــــي شقاويه
ينام العرب فالليل والجسم فيه احروق = وحيل الله اقوى كيف مافيـــــــــه ماويه
ليامن بغيت ادله واغني على الطاروق = ذكرت الكلام اللي معانيه مخــــــــــــفيه
ذكرت ان ابه شخص ملك قلبي المسروق = وسبب لي احزان وانا مخلص النيه
الا ياحسين القد ياراااايع المنطوق =غرامك ترى في ضامري حـــــــط ماااااريه
ملكت الجمال وفزت بالكاس يامعشوق = اخذت العلامه كامله فــــــــــزت بالميه
تحديت من حولك بفنك وحسن الذوق = وغطيت باخلاقك علــى كل حوريه
مثل ظبية مامثلها فالملا مخلوق = جفول تعيش لوحدها وســـــــــــــــــــــــــط بريه
تجيها مزون الغيث مصحوبة ببروق = وتسقي مراتعها بعد كـــــــــــــــــــــــل عصريه
الا 00 واهني من صادها مكسبه مطبوق = يعيش السعاده طـــــــول عمره بحريه

عبدالله الحضبي

05-10-2013, 09:22 AM

يابعد عمري

الا 00 يابعد عمري ترى السد مني باح = وصبري على فرقاك يازين ماطــــــــيقه
مليت العيون دموع والصدر فيه جراح = غرامك حسابه تعب الفكــــــــــر تدقيقه
حرام على اللي صابه الود مايرتاح = وهمه كثيرن لو يفكــــــــــــــــــــــــــر بتفريقه
عسى اللي على قلبي من اسبابكم ينزاح = عسى حظي المتعوس ترجع توافيقه
اجاوب ونين اللي على كل غصن ناح = وقلبي على لاماك تلــــــــــــــــت معاليقه
الا واهني الطير لامن خفق بجناح = علق بالسما وابعد عن الهــــــــــــــم والضيقه
الا واهني الطير لامن خفق بجناح = علق بالسما وابعد عن الهــــــــــــم والضيقه

عبدالله الحضبي

05-10-2013, 09:23 AM

مركب غرامي

البارحه من لوعتي وانزعاجي =- ونيت ونة طـــــــــــــــــــفل صغير نهاج
ولا سجين ون يوم انفراجي = شاف السعاده عقـــــــــــب ويلات وازعاج
من اول محكوم ماله خراجي = بين اربعة جدران والبــــــــــــاب مزلاج
دونه عساكر واقفين ازدواجي = وقضيته ماليــــــــــــــتن ابوااااك وادراج
اسباب خل هو غاية مزاجي = اسس بوسط القلـــــــــــب عمران وابراج
من خلقته ماخبر ابه يوم داجي = خذ من جلوس البيت سيره ومنهاج
يسحر بخد وعين واجمل حجاجي =فاز بجمال الكون بالكاس والتاج
مركب غرامي صار تايه ولاجي = لاشك انا الغرقان ماعــــــــــــــاد يحتاج
ان ماحصل لي صعب حتى علاجي = وان هو حصل لي ضيقة الصدر تنباج

عبدالله الحضبي

05-10-2013, 09:24 AM

حواجز الغربة

تاج الليالي 00والفرح00 واشتياقي= صاد الفؤاد 00ومزع الروح وده
ذكرني الاوهام00 والحزن باقي= صارت مواعيده قساوه وشده
أشكي سهاد00 ويشتكي من فراقي= واحترت أنا 00مابين 00هزله وجده
ذكرني الماضي سنين الوفاقي= واليوم لاحت لي بهاذيل عده
ابني غرامي من جسور التلاقي= واللي بنيته 00طول الايام هده
يمكن يبي زود الغلا وانسياقي= ولا انكسر 00عود الموده ونده
أبيه يفصح عن هوانا وضاقي= واللي يبي مني يقول00 ويعده
نلغي حواجز غربة ماتطاقي= حتى سهوم العشق تزداد حده
ولا يخلي الشوق صعب المراقي= ويصيبني حرقه00 وفرقا00 وصده
ويبعد بطيفه عن هموم احتراقي= واصبر عسى ربي يهوّن بضده

عبدالله الحضبي

05-10-2013, 09:24 AM

يازين من شانك دموعي هماليل = وكثر البكا يازين بيـــــــح دموعي
ذبحتني يابو الرموش المظاليل = ياللي عليك القلب دايــــــم يزوعي
لا والله الا شفت منك التهاويل = وخطرن على قلبي يكــــسر ضلوعي
حللت لكن ماتفيد التحاليل =ماعاد ينفع صار حالي يــــــــــــروعي
جلست اغني فيك واكتب مواويل = حيرت فكري ياحسين الطبوعي
ياوين ابالقى من يود المراسيل = ويجيب رده لي خلال السبــــوعي

عبدالله الحضبي

05-10-2013, 09:25 AM

اللي لهم في موطن العز تدريب = دون الوطن وارض الوطن هم حمايه
يفدونها بالروح وقت المطاليب= أهدافهم عز وتطــــــــــــور وغايه

عبدالله الحضبي

05-10-2013, 09:25 AM

بيض الله وجه من بان معروفه= بالوفا والطيب وعلــوم النشامى
يجمع اخوانه على عز ومروفه= بالتكاتف والتعاضــد والنظاما
يكرم الجيران ويقدر ضيوفه = والخوي عزه مع الربع الحشاما
محترم وايضا ترى نفسه عطوفه= نادر جزل ومن نــاس كراما

عبدالله الحضبي

05-10-2013, 09:26 AM

صرخة التحرير

تبسم فرح طفلٍ رماله حجر وارتاح = سمع صرخة التحرير دايـــــم تناديله
رماهم بقوة عزم ماهمه الارواح= صمود انتفاضة شعبٍ النصر يــــــــومي له
بغى ثار أخوه اللي توفى بدون سلاح = قهر والقهر ينجب بطــوله وتبسيله
نظر في يمينه ثم شاهد زميل طاح= ونظر في شماله وأحرق الدمــــــع منديله
وشاهد عجوز تلطم الوجه بالمسباح= تجر الونين وترفع الصوت تشـــــكي له
وشاف اليهودي يكسر الناس بالألواح = والآخر رصاصه يحرق الناس باشعيله
وكل الشوارع مظلمه بالألم وصياح= قنابل ودبابات ضخمات ومـــــــــــهيله
ولبس له عمامه واحتزم ناوٍ المرواح= حياته خساره والمناصيــــــب وشهيله
وشارك مع أبطال الحجاره بكل كفاح= عسى الله يعينه لين يلحـــــق مواصيله
تحسّب على اللي حط وسط البلاد أشباح= وبنى دولة الصهيون بالغدر والحيله

عبدالله الحضبي

05-10-2013, 09:56 AM

ارتحل ياعزوتي

ارتحل ياعزوتي وقت المسا= يم خلٍ لا وصلته سايسه
ساكنٍ بين المدينه والحسا = والجنوب اللي .. هبوبه قارسه
في ديار ٍ عشبها لونه كسى= خضرةٍ فوق الطبيعه .. لابسه
لاوصلته ذكّره يمكن نسى= حبنا وأيامه اللي .. دارسه
يوم أنا ويّاه فالحب اجلسا= ماعرفنا من شفاته يابسه
ماعرفنا الحسد وايام الأسى= ولا عرفنا أهل الوجيه العابسه
قل ترى حبه بقلبي قد رسى= والغرام اللي لغيره .. طامسه
مير هو في صاحبه زل وقسى= والليال السود زادت هاجسه
ياااااالله إنك تجمع الغالي عسى = وترجع أيام السعاده ناكسه

عبدالله الحضبي

05-10-2013, 09:57 AM

المزايا كامله

راكب اللي تو راعيه ماقص استماره= منوة اللي لا نهمته يقول أبشر هلا
لا نوى دار المحبين ماحسّب خساره= دق به هاجوس.. وقت السحر يوم انجلا
رغبته غاليه قد له سنين في انتظاره= ميزته عقل ودلال .. وتفنان الحلا
الهنوف اللي على العز هي من ساس اماره= تفخر بفعل النشامى على كل الملا
فعل اخوها بالشجاعه وبافعال الشطاره= وبيت ابوها للمراجل ولضيوف الخلا
ودارها لا زارها الضيف ماقل اعتباره= يكرمونه بالمعزه وتقدير وغلا
ياهبوب النود ردي خبر عن زين ساره= ماتقلد بالعذارى وظبيات الفلا
حيث فيها من مزايا غزال الريم اشاره= جاه قناص لقف له وهو مجفلا
غاية المقصود للعاشق اللي شاف إثاره= المزايا كامله .. والخيال مبجلا
ذاك (والله العظيم) انه اللي شب ناره= وسط قلبي.. واصبح القلب عقبه ماسلا

عبدالله الحضبي السبيعي

عبدالله الحضبي

05-10-2013, 10:02 AM

قلت :

ريـــــح الـخــزامــى والـنــفــل يـنــعــش الــبـــال=فـــي جـــو رايـــع بــيــن غــيــم(ن) وصــافــي
فــــي الــبــر يــازيـــن الـطـبـيـعـه والاســهـــال=لاصرت مع شخص (ن) عزيز (ن) ووافي
او مــجــلـــسٍ يــجــمـــع نــشــامـــا وعــــقــــال=وســـوالـــف فــيــهــا الــقــصـــص والــقــوافـــي
هــلــت مــــزون الـصـيــف والــوســم هــمـــال=والـعـشــب فــــي الــــوادي خــضــاره يـشـافــي

قال الشاعر محمد ظاهر الميهوبي

والـعـزبــه مـعــنــا والـمـعـامـيـل ودلال=والنـوم مايطـري عـلـى عـيـن غـافـي
لا أقبـل علينـا الليـل مافـيـه تـرحـال=نبيـت فــي عــدوه ونــدرى المسـافـي
يلـوح برقـاً بالسمـاء يشعـل أشـعـال=ينوض في مزناً غشى الليل ضافي
يــرزم رعـدهــا تـقــل دقـــات خـلـخـال-=تنـثـر مطـرهـا خـيــر سـيــل وعـوافــي

فقلت

الجو صافي فيـه غيـم وسحابـه=يازيـن مجـلاس بوسـط الطبيعـه
مـع نخبـة تجـمـع قــروم القـرابـه=مابيـن سجـات وسـوالـف بديـعـه
شــرواك يالـلـي فـاتـح دوم بـابــه=راعي المواقف والفعول السريعه

عبدالله الحضبي

05-10-2013, 10:03 AM

الوطن 00والمكارم

ياسامعـيـن الـقـول يـااهـل المـواجـيـب=يالـلـي لـكـم فــي سـاحـة المـجـد رايــه
الــدار تفـخـر بالنشـامـى هــل الطـيـب=الـلـي لـهـم فــي الـجـود عـلــم ودرايـــه
الـلـي لـهـم فــي مـوطـن الـعـز تـدريـب=دون الوطن وارض الوطن هم حمايه
يفـدونـهـا بــالــروح وقــــت المـطـالـيـب=أهــدافــهــم عــــــز وتـــطــــور وغـــايــــه

عبدالله الحضبي السبيعي

عبدالله الحضبي

05-10-2013, 10:07 AM

قال الشاعر ناصر الحمادين المفالحه

ســـــــلام يـااســتــاذنــا يـــــــا آديـبـنـايـاكـبـيــر=تـسـلـيـمـةً كـنــهــا وجـــــه الـقــمــر لاكـتــمــل
كــل عــام وانـتـه بخـيـر وكـــل (غلبا)بـخـيـر=ياطيـبـهـم كـلـهـم شـيـخـان فـخــذ وشـمــل!!
قـومـاً ليـاصـاح فــي عــال الـطـويـل الـنـذيـر=عــدوهــم يـبـتـلـش ويــقــول كــيـــف الـعــمــل
(معسفـيـن المـهـار) و(جـارهـم كـنـه امـيـر)=(وذيدانـهـم فــي ديــار الـقـوم تـرعـى هـمــل)
وانته من الروس يالحضبي سلالة (منير)=(لاد الـوجـيــرب) ومــجــداً ثــابــتً مـاســمــل
وانـا مـن (الاد مفـلـح) مـثـل سـيـفً شطـيـر=عـدوهــم فــــي نــهــار الــحــرب مــالــه امــــل
ابـــا استـشـيـرك ولاحـطـيـت غـيــرك شــويــر=والحـمـل لاكـبـر مـالـه غـيــر ظـهــر الـجـمـل
وجــه الحقيـقـة تغـيّـر فــى الـزمـان الاخـيــر=والارض فـيـهــا غــيــار ودب فـيـهــا الـنـمــل
يابـوسـعـد والـهــدف بـيــن الـوزيــر ووزيــــر=لارضـيـت حــق الـزراعـه زعــل حــق العـمـل
طـويـق ضـلـعً ثـبـت مـالـه سـمــي وخـشـيـر=والـنـيـر مـثـلـه وحــمّــل فــــوق مايـحـتـمـل!!

الرد مع التحية والتقدير من عبدالله الحضبي

الحمادين ناصر والوفاء !!!

عـلـيــك مــنـــي ســـــلامٍ يـالـفـهـيـم الـخـبـيــر=عــد الشـجـر والحـجـر واعــداد حــب الـرمـل
تـحـيــةٍ عِــطَّــرت بــالــورد وأزكـــــى الـعـبـيــر=تـحـيــة تـحـمــل أشــواقـــي بــروعـــة جــمـــل
يالـلـي جـمـعـت الأصـالــه والـمـقـام الـقـديـر=يـاراعــي الـنـخــوة الــلــي لا تــعــزوا صــمــل
من روس ربعٍ ليـا قامـوا يجـي العلـم غيـر=مـن يـوم وقـت الحرايـب فـوق خيـلْ وزمــل
وقبيـلـة سبـيـع فــي وقــت المـلاقـا العسـيـر=جـــرح الـعــدا مــــن فعـايـلـهـم فــــلا يـنـدمــل
كــم مـــن عـــدوٍ لـيــا جـاهــم يـعــوّد كـسـيـر=شـجـاعــة سـبـيــع مـاتـحـصـى ولا تـنـهـمــل
أفعالهـم فــي الـوفـاء مـثـل الـسـراج المنـيـر=وأمجـادهـم فــي سـمـا التـاريـخ فـعــلٍ كـمــل
الـوقـت يـابـو يـزيـد أصـبـح مـثـل جــم بـيـر=اللي (ولا شيْ )شرب واللـي (أصيـلٍ) يمـل
أصبر على وقتك اللي صرت وسطه أسير=والـصـبـر مـفـتـاح الـفــرَج والـسَّـعَـد والأمــــل
وأنـا معـك ..وأطلـب اللـي لا طلبتـه يجـيـر=أرفــــع يـديــنــك وقـــــل يالله خــيـــر الـعــمــل

عبدالله الحضبي

05-10-2013, 10:08 AM

صورة طفل فلسطيني مقتول :
قلت معبراً عن الحالة

مسكين ياطفل على الخط مذبـوح=دمـه يسيـل وجسمـه اصغـيـر تــوه
امه تشوف منازع القلب و الـروح=جــتــه الـقـذايــف مـطـلـقـات بــقـــوه
ماعنـدهـا غـيـر البهـاذيـل والـنــوح=من يوم شافت جسمه اللي مشوه
اخـوه قبلـه فـي السراديـب مطـروح=فالسجن عانى مـن لواهيـب ضـوه
وابوه وسط المعركه صار مجـروح=مشلول مـن شخـص قليـل المـروه

عبدالله الحضبي السبيعي

عبدالله الحضبي

05-10-2013, 10:11 AM

صوت ذيب يتردد صداه في مرتفع

يـاذيـب جــر الـصـوت وانــا بناغـيـك=دور عــــشــــاك بــــديــــرة جـــرهـــديـــه
يـاذيــب كـــل فـــي حـيـاتـه يـنـاجـيـك=اعـــواك هيـضـنـي وانـــا مــــا عـلـيــه
لـكـنـك أحـزنــت الـجــروح المهـالـيـك=جــروح فــي داخــل ضمـيـري خـفـيـه
لو ان ابو فيصل معي كان يشكيك=ولا رمـــــاك بـبـنـدقــه مـــــن عـشــيــه
ابــعــد وانــــا يــاذيــب والله لـخـاويــك=ابعـد عــن العـربـان والشـمـس حـيـه

عبدالله الحضبي السبيعي

عبدالله الحضبي

05-10-2013, 10:12 AM

حكاية ضب

ياضـب بـادوا غيـرك النـاس واذوك=جــاك الـسـرا يـاضـب يـاويـل ويـلـك
رح يم ناس تسعدك داخـل اشبـوك=محميـة تنـقـذك مــع بـعـض جيـلـك
ياضب جسمك صار للغير مهتوك=هــواة صـيـد الـضـب يـاعـزتـي لـــك
انحـش تـرا جحـرك قريـب ومبـروك=انـقــذ حـيـاتـك لا يـشـوفـون ذيــلــك

عبدالله الحضبي

عبدالله الحضبي

05-10-2013, 10:14 AM

بعد غياب الشاعر خالد رجب قلت هذه الابيات :

يالربع من شـاف خالـد غيبتـه طالـت=رجل نشا في طريق الطيـب واسلومـه
أيامـه اللـي مـضـت حـلـوه ومــا زالــت=تجمـع رجـال الـوفـا والمـجـد واعلـومـه
شخص ليا منْ ساعات الحزن مالت=أبشـر بـعـزك يشـيـل الـكـرب واهمـومـه
واليـوم عشنـا فـراغ(ن) ساحتـه بانـت=متـى المواقـف تـروح وتظهـر انجومـه

رد الشاعر المبدع محمد الميهوبي

ألـمـشـاعـر تـنـتـظـر وألــيــوم قــالـــت=ويـن خـالـد بــن رجــب ليـلـه ويـومـه
اعـــرف أنـــك قـدهــا مـهـمــا تـعـالــت=وأعــرف أنــك قـدهـا فــي كــل قـومــه
أدري أنـــــك قــدهـــا مـهــمــا تـــوالـــت=والـقـدر مكـتـوب فــي بيـعـه وسـومـه
مـن مشاعـر دمعتـي بالـكـاد سـالـت=قـلــت خـالــد أعـرفــه مـلــوة هــدومــه
مــن مـراجـل لــه رجـولـه كــم طـالـت=من مكارم صدق ولا تهمه خصومه
واتـصـلـت ونـغـمــة الــجــوال حــالــت=دونها نغمه تقول التأكد من رقومـه
كــم تحمـلـنـا الـحـمـول وكـــم مـالــت=وأعــتـــدل مـيـزانـهــا وأرث وســـومـــه

عبدالله الحضبي

05-10-2013, 10:16 AM

غاب زميلي محمد الميهوبي البلوي عن الساحه فتره
فأرسلت له الابيات التاليه

يـــا مـحـمــد جـيـتـنـا وأنــــورت لـمـبــه=بـعــد مـــا كـنــا شفـقـنـا عـلــى حـالــك
عـاشـق الخـفـرات يـاخـوك مـــا يـنـبـه=يمكـن انـك فـي الهـوى مشـغـل بـالـك
من يعزك يا ابيض الوجه وش ذنبه=وانــت لــك شـهـريـن مـــا دق جـوالــك
عبدالله الحضبي السبيعي

فقال الرائع محمد الميهوبي

عــبــدالله الــذيــب لــــه قـنـبــه=لا غـاب يــا صاحـبـي جـالـك
من يعشق الخفرات له طنبه=والـيــوم حـالــي مـثــل حــالــك
يـفــداك مــــن يـفـتــلْ لـشـنْـبـه=ولا هو من رجالي ولا رجالك
يــا سـعـدْ مــن وقفـتـك جنـبـه=وآفـــي وأفـــز والله لـمـرسـالـك

عبدالله الحضبي

05-10-2013, 10:20 AM

قال عبدالله الحضبي

الطرف من فرقا المحبين ساهر=ليل وسهر وأحزان واوجاع راسي
كل الملامح تختفي والمظاهر=لا صار فيها نوع بعض المآسي
الفكر مشغولٍ على وضع قاهر=ومن لوعة الفرقا تزوّد اعماسي
جرحي عطيبٍ من سبايب جواهر=مايحتمل صبري يكود الرواسي
واللي حصلّي صار بيّن وشاهر=أسباب شخصٍ في المواصيل قاسي
والله لولا إني نبيهٍ وماهر=وعندي عزوم وقو سلطه وباسي
إني لوضّح ماجرالي واجاهر=واشرح معاناتي لربعي وناسي
يمكن يجي حلٍّ سريعٍ وزاهر=يخفف هموم الضمير ويواسي
واليوم صار الوضع والعلم ناهر=شربت من مر العنا وسط كاسي
لكن ابااصبر والفرح نور باهر=ينْتابني هم وملامح احساسي

رد عبدالله عطية الزهراني

طـــــوّلــــــت ، مـــاطــــوّلــــت لأن الـــمـــحـــابـــر .=...جفّـت ..ولاهـو مـن طباعـي التناسـي ..
لــكــن يـبــــو عــابـــد مــثـــل مــاانـــت شــاعـــر .=. .لــك لحظـتـك ، والامــر هــذا اسـاســي ..
تـــــقـــــدر تـــــقـــــول انـــــــــــي انـــــــــــا مـــااخــــاطــــر=. .واكـــتـــب اذا مــشــغــول قــلــبــي وراســــــي !
قـــريــــت نــــصّــــك او شــــربــــت الــمــشــاعــر .=." الـــقــــرب فـــرحــــة والــمــفـــارق مــــآســــي" ..
وكـــيـــف انّ ربّ الــعــشـــق مــهــمـــا يــســافـــر.=..يبـقـى الغـريـب بــلا وطـــن ، لا مـراســي !
واصعب حكاية / ..عشق من هو يكابر .=. .فـي الوصـل والهـجـران ،مـرتـاح نـاسـي .
وتــــلــــقــــاك يـــاالـــعـــاشـــق وربّ الــــدفــــاتــــر ..=...صنعـت لـه مـن قلبـك اغـلـى الكـراسـي..
وان غـاب وان ماغـاب ..لاشــك حـاضـر..=.. وان سـبـب اوجـاعـك ،ولاجــا ..يـواسـي .
اعــــــانـــــــك الــــرحــــمـــــن يــــاقــــلـــــب صـــــــابـــــــر=.والــشــوق وســطـــك كـالـجـبــال الــرواســـي...
لايــــــأس ، مــهــمــا يــصــبــح الـــحــــظ عـــاثــــر=فـالـمـا يجـيـنـا احـيــان مـــن صـخــر قـاســي !

عبدالله الحضبي

05-10-2013, 10:22 AM

قال الشاعر والصديق عبدالله الزهراني الابيات التاليه

شــهـــادة الــحـــق لـلــرجــال مـــــن فـعــلــه=يشهـد بهـا الشاهـد الشرقـي مـع الغربـي
إذا نبـت طيـب مــن عـرقـه ومــن فصـلـه=قـالـوا لــه الناس(ونـعـم) عـشـت يـاذربـي
بـاوجــز فـــي الـقــول وأرد الــوفــا لاهــلــه=وآقـول بيـت(ن) خــرج مــن رابـعـة قلـبـي
إن كان تبغى تعرْف الطيب وش شكله؟=شف صورة الطيب في عبدالله الحضبي

فقال عبدالله الحضبي السبيعي

أقـــول تـحـكـم عـلــى الـرجــال مـــن نـبـلـه=أخـص مــن هــو فـخـر فــي أمّــة العُـربـي
شـهـمٍ بــرع فـــي مـعـانـي شـعــره الـجـزلـه=من روس زهران( ثم من) خيرة الصحبي
عـبــدالله الـلــي عـطــاه الله مــــن فـضـلــه=انـا اشهـد إنـه علـى فعـل الـوفـاء طـربـي
طـيّـب ولــه فـــي الـمـكـارم رايـــه وشـعـلـه=رجـلٍ ، حكيـمٍ ، عزيـزْ ، وشاعـرٍ شعبـي
يسـتـاهـل الـلــي تــحــط الــشــال والـدبـلــه=بـنـت النشـامـى هــل النـامـوس والحـربـي

عبدالله الحضبي

05-10-2013, 10:24 AM

هذه وصية لإبني الصغير ماجد
اتمنى ان يستفيد منها أبناءنا

مـاجـد أنــا بوصـيـك مـنـي وصـيـه=يابوك يوم إني على الخير راجيك
حافـظ علـى ديـنـك بنـفـسٍ رضـيـه=عز القريـب وعـز ضيفـك وعانيـك
وأمــك لـهـا فـضـل علـيـك وحـمـيـه=وأختـك تراهـا تعتـزي بـك وترجـيـك
وأخـوك لـه تقديـر صـبـح وعشـيـه=تـراه هـو عــزك ومـجـدك وحامـيـك
خـلـك عـزيـز يصـيـر لــك مـقـدريـه=أخلاقك وطيبك تحـب العـرب فيـك
ويـمـنـاك لـلـجـزلات دايـــم سـخـيــه=وأكرم عزيزٍ يافتـى الجـود ناصيـك
والــلـــي يــعـــزك لا تـبــديــه ســيـــه=إبـذل معاريفـك .. وربـك يجـازيـك

عبدالله الحضبي السبيعي

عبدالله الحضبي

05-10-2013, 10:27 AM

قصتي قصه يالربع

تلاعب قدها الميّـاسَ عُجْبـا=كما ذا يلعبُ الغصن النظيرُ
فتصـطـادُ القـلـوبَ بمقلتيـهـا=وتـطـعـنُ بـالـقـوامِ ولا تـجـيـرُ

القصة كما يلي :

يوم شفت الزين في سوق الذهب عصريّه=واقـــــفٍ كـــنـــه غــــــزالٍ ذايــــــرٍ عـطـشــانــي
لابــــــسٍ لــــــه عـــدَســــاتٍ لــونــهـــا بــنــيّـــه=وسط عيـنٍ رمشهـا ناعـسْ وسـود اجفانـي
تـهـت فــي عـالـم هــل المـوضـات والحـنـيّـه=عــالــمٍ راقـــــي.. جـمــالــه ســاحـــرٍ فـتــانــي
صِـبـت باغـمـاءه تـقـول إنْ داخـلـي جـنـيّـه=ويــوم فـقـت إلا وهــو عـنـدي بشـكـلٍ ثـانـي
الــدلــع والــفــن والـرحـمــه وحــســـن الـنــيّــه=صحت مرتاعْ وشهقتْ وخفت بلـعْ لسانـي
موقـفٍ صعـب ٍ جرالـي ماحصـل لـي زيّــه=ويـن ربـي جابنـي للـسـوق .. وش ودانــي

عبدالله الحضبي السبيعي

عبدالله الحضبي

05-10-2013, 10:28 AM

شاهدته رافعاً راسه متغطرساً
بصراحه أنا وقفت قليلا مذهولا أفكر في حالة هذا المسكين
وتكبره
فقلت هذين البيتين توضيحا للموقف :

أنت ياللي جيت متغطرس ورافع راسك=والله إنك ماتساوي عندنا بعوضه
ياضعيف النفس طبعك كاسبه من ساسك=جيت متكبر تساير بهرجان الموضه
مادرينا عنك حنا مجتمع متماسك=ديننا دين التواضع عارفين فروضه

عبدالله الحضبي السبيعي

عبدالله الحضبي

05-10-2013, 10:29 AM

أبيات قلتها وليدة اللحظه
أتمنى أن ترقى إلى أذواقكم
لا يهمك ناكر المعروف جحّاد الجميل
................ ولا تفكر في تفاهات النــــــذاله والحسد
ولا تجازي غلطةٍ جت من صديق ومن زميل
.................. أدمح الزلاّت تلقى خير وأفراح وسعد
ربك يجازيك في فعلٍ فعلته لو قليل
................. من فعل خيرٍ لقاه ومن فعل شرٍ حصد
والجزاله مالها ألا كود رجّال جزيل
.................. رايته بيضاء ومن يعرف مواقيفه شهد

عبدالله الحضبي السبيعي

عبدالله الحضبي

05-10-2013, 10:31 AM

ليـلـي ســرا بـيـن انتـبـاه ٍ وغـفـوه=والحـلـم مـرعـب وســط جــوٍ دافـــي
صـارالأمــل فــــي ذكـريـاتــي هــفــوه=عـلـمـاً بـــأنْ الـجــرح فــيّــه خــافــي
أطلـب مــن المعـبـود رحـمـة عـفـوه=يزيـدنـي عـزمـن وسـتـر ٍ ضـافـي
يالله تجعلـنـي مــن أهـــل الـصـفـوه=فـــي سـاعــة ٍ وأريـاقـنـا نـشـافــي
يـوم إنْ كـل ٍ عايـش فــي جـفـوه=مـايـنـفـعـه مــــــال ٍ ولا مــيــلافــي
مــابــاقـــي إلا رحــمــتـــك والـــرفــــوه=يـاربـنــا يــــاذو الــكـــرم.. يـاكــافــي
يـاعـالـم ٍ بـالـسـرْ والــلــي خــفــوه=الْطـف بعبـد ٍ لـه ذنــوب وحـافـي
مايـدري عـن ماضيـه والـلـي قـفْـوه=مخلص وقلبه في المواقف صافي

عبدالله الحضبي