الدكتور الشاعر حمد العصيمي

[سمر محمد]

بذرة غلاه!!!
طـيـرٍ تـربـى فـــي قـفــص صـــدري وقفـلـتـه وراه =روح ضـحـيــة كــذبــة الـحـريــة الــلــي أغــرتــه
هاجـر وخلانـي ولا ادري وينهـا ارضـه مـن سـمـاه =اثـره مثـل كـل الطيـور يـعـرف مـوسـم هجـرتـه!!
راح وتـرك لـي مـن جناحـه ريشتيـن وحـوض مــاه =الريشتيـن اللـي سقاهـا الحـوض مــاه وقطـرتـه
كـم كنـت الـوم اللـي ليـا مـنـه فـقـد طـيـره بـكـاه =والـيـوم جـربـت وتـسـاوت عبـرتـي مـــع عـبـرتـه
واصبحـت اقـول اللـي فقـد طيـره ولا يبكـي عــلاه =احـسـن يعـيـش بغبنـتـه والا يـمــوت بحـسـرتـه
صحيـح مـن لا داس باقدامـه علـى جـمـر الغـضـاه =لـو تنشـده مـا جـاب لـك وصـف الغضـاه وجمرتـه
والمتـرف اللـي فـي ثـرى قلـبـي زرع بــذرة غــلاه =جـانـي بـعـد مــدة يــدور ويــن راحـــت بـذرتــه!!
جانـي يـدور للغـلا اللـي فـي ثــرى قلـبـي نـسـاه =من حضرته حتى يجي ينشد عنه من حضرتـه؟!
مـا يـدري ان الـبـذرة الـلـي ضمـهـا القـلـب وثــراه =شربت من اقصى عرق قلبي لين صارت شجرته
وانـي تحتهـا مستـظـل مــن الـزمـان ومــن عـنـاه =مثـل الغريـب الـلـي تـريـح بـعـد طـالـت سفـرتـه
وانـي انـا الهايـم علـى وجهـي وهــو وادي حـيـاه =والقـلـب غــاوي يتـبـع الـشـاعـر ويـتـبـع جـرتــه
جـانــي يــــدور عــــذر لـذنـوبــه وتـبـريــر لـخـطــاه =قلت الخطا من يوم شفتك ما طـرت لـي سيرتـه
شفني مثل ذاك الحصان اللي عثر له فـي حصـاه =مــن جزعـتـه فــز ونـهـض ولـكـل جــوادٍ عـثـرتـه

[سمر محمد]

لحن بيتهوفن!!
أغراني الملك وجنـون السلطنـه والصولجـان=
والشعر له سطـوة سليمـان وجنـون السلطنـه
مرت سنه والحبر سرجي والقلم ظهر الحصـان=
واوراقي البيضا صحـاري قفـر والمـدة سنـه
من قلعة بعلبـك للاهـرام لحصـون القيـروان=
لاكبر منابـر مسجـد الحمـرا وذيـك المأذنـه
مـن أول اللاونـد للفـل لزهـور الاقـحـوان=
لاخـر تفاصيـل القرنفـل والنفـل والسوسنـه
راهنت بيـن الممكنـه والمستحيلـة والرهـان=
إني أجيـب المستحيلـة فـي مكـان الممكنـه
ما ابغى بقايا المفردات اللـي تعودهـا اللسـان=
ولا الكـلام اللـي توارثنـاه حسـب الالسنـه
يعني مهي صعبه اذا صورت من سحـر البيـان=
دمعة لحن ناظم غزالـي فـي عيـون الميجنـه
أو جبت لي بحر ٍ جديد ٍ ما خلق لـه ترجمـان=
خارج عن قيـود الهلالـي والرجـز والهيجنـه
أخرج عن القانون با القانون واعطيـه الضمـان=
إني أنا اللي متبـع نصـه وانـا الخـارج عنـه
واترك على وجه الزمن بصمة من أطراف البنان=
تبقى مثـل بصمـة أصابـع بيتهوفـن ولحنـه
ما تخرج الصدفة من الجعبة على الشاعر سنـان=
الا وباقـي فـي كنانتهـا سنـان أقـوى منـه
وان عاش راسي لا جل عطرك يا ورود البيلسان=
لا غفر كوارث سيئات الشعر واجزيـه حسنـه
العام يوم ان الزمان بخير لـو ضـاق المكـان=
من وسع صدر الوقت ما ضاقت علينا الامكنـه
واليوم يا وسع المكان وضيق صدرك يا الزمـان=
تخرج من أطرف خرم الابرة قبل لا تدخل منـه

[سمر محمد]

أبناء السبيل!!

يا عازف سلوك الربابـة يـوم حركـت السلـوك=حركـت فـي قلبـي معاليقـه وولعـت الفتـيـل
لك مقصد وغاية وانا لي غايـة ومقصـد يخـوك=ما ابغى بديل بها ولا اظنـك تبـي فيهـا بديـل!
انا ادري انك تبكـي احبـابٍ تناسـوك ونسـوك=وانا بكاي العاديـات الصبـح والسيـف الصقيـل
مثل الجياد الصافنات اللي غـزت غـزوة تبـوك=اللي حوافرها تثيـر النقـع فـا اليـوم الطويـل
لا سرجت للمعركة صـف العـدا مـا واجهـوك=وليا اقبلت مثل الرعد وليا ادبرت تصهل صهيـل
يا حيف لا حنـا شريناهـا ولا احبابـك شـروك=واصبحت دون احباب واصبحنا سروج بدون خيل!
والشعر قرية مطمئنـة وان دخـل فيهـا الملـوك=عاثوا بها حتى افسدوها بيـن يـوم وبيـن ليـل
ما يطلع من الشوك ورد ولو طلع للـورد شـوك=ثنتيـن وقفـت بيـن حـد الممكنـة والمستحيـل
يا اللي عطيت الناس من شعرك تخيل وش عطوك=بخلوا عليك بما عطيتـه ثـم سمـوك البخيـل!!
ان عشت والعزة ماهيب امك ولا التقديـر ابـوك=اسمك يتيم ومن يـذوق اليتـم فـا الدنيـا ذليـل
رضعت نهد الابجدية لين صـار الضـاد اخـوك=والضاد قابيل وقتـل هابيـل واصبحـت القتيـل
لا قالوا الله يرحمـك عنـد الممـات ولا بكـوك=ما شفت قبلك ميت بـلا رحمـة ودمعـة تسيـل!
من مـا الوشايـة والنكايـة والضغينـة غسلـوك=ما هوب من سدر وحنوط وعذب مـاء السلسبيـل
واضفوا من ثياب الحسد والحقـد ثـوب وكفنـوك=ما بين حسد وحقد راحوا بين حـط وبيـن شيـل
حطوك في نعش الردى والكـره جثـة وحملـوك=ما اخذت من دنيـاك هـذي لا كثيـر ولا قليـل
في مقبرة نسيـان سـووا قبـر واسـع ودفنـوك=واصبحت في دار المقام ورحت عن دار الرحيـل
لكن يميـن الله لتبقـى وشـم فيهـم مـا نسـوك=والطيب اللي ينذكر با الطيب جيـل ٍ بعـد جيـل
لو اخذوا من ظلوعهم نار وحطب ثـم احرقـوك=الخاسـر النمـرود والرابـح براهيـم الخلـيـل
تبقـى نبـي الشعـر لـو كفـار مكـة كذبـوك=رحمتك با المخطين والمسكيـن وابنـاء السبيـل

[سمر محمد]

أنا وعشتار!!
خليني احلم لو صحيح الحلم ما اصبـح بـلاش=حتى التحرر من قيود الواقع اصبح لـه ثمـن
عشتار يا رمز الخصوبة والانوثـه والمعـاش=يا فاتنه ما فيه اشـد مـن القتـل غيـر الفتـن
اموت بك وانا الوحيد اللي اذا مات بك عـاش=واعيش بك روح تعبت القى لها غيـرك بـدن
اسئلتك الليله سحايب غيث واجوبتـي عطـاش=لا تساليني من انا ماهـو مهـم أكـون مـن!!
انا امتداد لعصر مـا قبـل امتـداد الانكمـاش=وانا انكمـاش لا يديلوجيـات تقديـس الوثـن!
جيتك بري من غلطة انكيـدو وزلـة كلكمـاش=عطار احاول اني اصلح بعض ما افسده الزمن
راكب سفينة من ورق لا بس قصيدة من قماش=احيان احس بها ملابس عـرس واحيانـا كفـن
والريح فيها ضعف جنسي والبحر مل الفـراش=والكبت فجر فا المواني شهوة اشرعة السفـن
وانتي عطر داخل زجاجه والزجاجه من هشاش=وانا لو اكسرها تكون من شـذاك اربـع مـدن
اربع مدن ا خلق بهـا اجـوا تثيـر الانتعـاش=وارسم نخلها قافيه وارصف شوارعهـا لحـن
انا اذا حررت نصف العطر من سجن الغراش=اقدر من الاف الانوف البائسـة ابنـي وطـن
اشعل به الاضواء واحرق فيه اجنحة الفـراش=واكتب على بوابته (غيرك هنا كـانَ فكـن)!!

[سمر محمد]

إلياذة هوميروس!!
ورى قضبان زنزانة سجون الواقـع الملمـوس=
سجيـن عيونـه لحريتـه ولـسـوط جــلاده
غريب ِ في ثمود يعيش لا حارس ولا محـروس=
حكم فيه القدر حكمه وجاب الصخـر فـي واده
لسانه لبسه حلـة ملـك واسترخـص الملبـوس=
لو انه قيصـر وفرعـون ذي الاوتـاد واوتـاده
نسى درس الحياه وعلمه سجـن الحيـاه دروس=
وفـي بطـن المعانـاه اجتمـع موتـه وميـلاده
تعلم درس با المجـان مـا سلـم عليـه فلـوس=
وباقي درس واحد ذاخره فـا الوقـت لا حفـاده
أنا ذاك السجين اللي قرا التاريخ بـا المعكـوس=
عشان يعيش في عصره ويكتـب قصـة أجـداده
أخذ كلمة جديده من فمي يا حضـرة القامـوس=
وثقف جيل كامل وانسـب المجهـود لا سيـاده
على بوابة إيثاكـا وحاكـم عرشهـا اوثديـوس=
وترنيمـة جنـود العصـر الاغريقـي وقـواده
ركبت حصان طرواده وطاحت تحت سيفي روس=
ولولا الحرب خدعه ما ركبت حصان طـرواده
نقشت حروف الالياذه عشان عيـون هوميـروس=
وعلقها علـى صـدره صليـب وعقـد وقـلاده
احسب اان الفلك يمشي حسب مفهوم بطليمـوس=
وتحليـلات مركـز هابـل الدولـي ومرصـاده
واثر غير القمر والشمس موجوده قمر وشموس=
وشعـب الصابئـة للشمـس والاقمـار عبـادة
مهي عاداتي احسبها خطا والكون لـه نامـوس=
لكـن الكـون ناموسـه يثـور ويخلـف العـاده
وهذي غلطتي حتى لو اني قـد بريـت القـوس=
وقالوا غلطـة الشاطـر بعشـره قلـت بزيـاده
اثر من قشر حظي كل حلم يمرنـي كابـوس؟!=
لو اني فوق اريكة من حريـر وتحتـي وسـادة
سنابلنا غدت حظ الطيـور الحايمـه والسـوس=
وحنـا اللـي زرعنـا حقـل سنبلنـا وحصـاده
يجوز انا صغـار اجسـام لكنـا كبـار نفـوس=
نفوس اكبر من دموع الهوى العـذري وتوبـاده
وانا والله لو رمح الهوى بين اظلعـي مغـروس=
لاقول انه مجرد رمح جـا فـي غيـر ميعـاده
لا والله ما اعتبرهـا الا مجـرد شكـة الدبـوس=
بسيطه هينـه مـا تصحـي النايـم مـن رقـاده
تثـور البندقيـة فـا الخبـا والسبـة النـادوس=
وترجع شرهة الرامي علـى النـادوس وزنـاده
وانا لعيـون طـرواده والاليـاذه وهوميـروس=
نقشت حروف الالياذه وجبت حصـان طـرواده

[سمر محمد]

وينك يا عمر؟!
حلم النظر طول العمـر ماغـادر اذهـان الكفيـف=
وانا الكفيف اللـي تحاصـر ذهنـه أحـلام النظـر
نصف العمر عشته ضرير أعمى على جنب الرصيف=
والنصف الاخر صرت أ عيشه في رجى حلم العمر
اذكر قطيع الريـم وانشـد عنـك يـا وادي ثقيـف=
وانت اختفيت من الخريطـة كـن مـا باقـي اثـر
من ينصف اوراق الشجر من بعثرة فصل الخريـف=
ويكبـل يديـن الخريـف ويجمـع اوراق الشـجـر
يا شجرة الصفصـاف أوراقـك تساقطهـا مخيـف=
طاح الورق واستوحشت قمريـة الغصـن الخضـر
استوحشـت قمريـة الـوادي وغنـت يـا لطيـف=
وانا وقفـت اسمـع لحنهـا واستمـع لـه واعتبـر
اثر الطيور تحس با الوحشـه بعـد فرقـا الوليـف=
واثر الحنيـن يهـز قلـب الطيـر وقلـوب البشـر
يـا سيـدة كـل البنـات ودرة الجنـس اللطـيـف=
يـا دانـة مـا جابهـا بحـار مـن سابـع بـحـر
اما اقبليني ضيف دائـم واكرمـي مثـواي ضيـف=
والا افتحي بـاب الصـدود وقفلـي بـاب العـذر
احسني اضعف قوي واحـس بـك اقـوى ضعيـف=
والريح خلف النافـذة تعـوي وانـا تحـت المطـر
كيف انتظر والانتظار امضى من السيـف الرهيـف=
والعمر يمضـي والثوانـي جمـر والساعـة دهـر
لقيت مفتاح الفـرج فـي قبضـة الصبـر العنيـف=
لكـن ويـن القـى ولـو دورت مفتـاح الصبـر؟
الصبر اقلـه حـد خنجـر قاطعـه واقـواه سيـف=
اشـده المـوت البطـي واقلـه المـوت الحـمـر
قلت له انا راع الشـداد وردنـي صـوب الرديـف=
وان شاف عينـي للشـداد يـدق ناقـوس الخطـر
الوذ به لـوذة طريـد القـوم فـي وجـه الحليـف=
ويردنـي بيـن الرجـا واليـاس لقيـود الاســر
جيته وانا خوفي على صدري من طعـون العطيـف=
واقفيت من عنده وبي عشريـن طعنـه فـا الظهـر
والظلـم للعاشـق قهـر والعـدل للمظلـوم ريـف=
من جرب الحجاج صاح وقـال وينـك يـا عمـر؟

[سمر محمد]

أعطني الناي َ وغنيّ !!
كنت أجنب عن بحور العشق خوف مـن النهايـه=من كثر ما اوحيت عن غدر البحر من صغر سني
شيبوا في راسي اصحـاب النصايـح والوصايـه=صوروه بشكل ذيـب وصورونـي لحـم جنـي
كل يوم احفظ حديث وكـل يـوم اسمـع روايـه=لين صرت احلم وانا صاحي واقول الذيب اكلنـي
شتتوني لين ما صرت اعرف ارضي من سمايـه=يوم اعزي قلبـي ويوميـن ابـارك لـه واهنـي
لـو دريـت ان الكـلام اللـي يقولونـه دعايـه=كان مـا خليـت يـوم يمـر دون الحـب منـي
الله انه لا يسامـح مـن خدعنـي فـي صبايـه=يوم غرر بي ولا يجزيـه بـا المعـروف عنـي
هو يحسب انه فقيـه تجـوز لـه فـي الولايـه=ما درى ان الحب مذهب ماش به شيعـي وسنـي
ابتدى وقت الصراحـه وانتهـى وقـت الكنايـه=جيت اصرح بعدما ظليـت لـي عاميـن اكنـي
كنت اظن الحـب مالـي فيـه واللاحـب غايـه=واحمد الله يوم فـي هـذا وهـذي خـاب ظنـي
ادخـرت اول شبابـي للهوى درهــم وقـايـه=لاجل ما ادفع لي مية قنطار لـو رمحـه طعنـي
فارقوني لعن ابوكـم مـا مضـى منـي كفايـه=اتركوا قلبـي يجـرب طعنـة الرمـح المطنـي
وانت يا قلبـي معـوض خيـر والايـام جايـه=لا تمنى قيل (مـا نيـل المطالـب بـا التمنـي)
سل سيف العشق واركز في عمود الحـب رايـه=رزها في كل ظلع اعوج على الصـدر متحنـي
حب واعشق واغرق وغامر ولا تطلـب حمايـه=السنين اللـي مضـت لـك روعتـك وروعنـي
حدك لبحر الغـرام سنينـي اللـي مـن ورايـه=كنها فرعون وجنوده وانـا بـا الوصـف كنـي
مثل موسى والبحر وقف على ضربـة عصايـه=وانفلق نصفين لين المـوج الازرق صـار بنـي
وانفتح لي فيـه درب وسقـت فيـه اول خطايـه=ما غرقت ولا غرق غير السنيـن اللـي حدنـي
صدق يا حلو النجاه وصـدق يـا زيـن البدايـه=والبدايـه مـن رمـاح عيونـك اللـي صوبنـي
( وان بدينا يا حبيبـي نبتـدي منيـن الحكايـه)=من صدر في خيـر والا خصـر معتـل متثنـي
كل ما ابدى فيك باية حسن يطلـع غيرهـا ايـه=ما عجزت اوصفك لكن فيك حاجـات اعجزنـي
تبتسم ويطيـر مـن شفتـك عصفـور لشفايـه=طار من رقـة شفـاك وحـط بشفـاي وسكنـي
واضحك الك وتضحك وتضحك لك الدنيا معايـه=شفت كيف ايـام عمـري ضحكتـك وضحكنـي
في حديثك صوت ناي وفي فمك عـازف ونايـه=وانت تعزفني على انغامـك وانـا اردد واغنـي
لا تطالع فـا المرايـه واعتبـر عينـي مرايـه=ما ابي حتـى المرايـا العاكسـه تاخـذك منـي
وارمني بسهـام نظراتـك ولا تخطـي الرمايـه=يا عساني ما انحرم سهم العيـون اللـي رمنـي
واقرب اكثر ضمني با الحيل يـا غايـة رجايـه=لي سنين طوال غير امي ولا صـدر احتضنـي
واشعل انفاسك عشان ادفى واذا احتجـت لدفايـه=اشعل انفاسي على شانـك لـو انفاسـي طفنـي
لا تعجل باقـي مـن الليـل ساعـه يـا منايـه=الندامـه فـا العجالـه والسلامـه فـا التـأنـي
وش نبي با الشمع والمصبـاح والعـازف ونايـه=اطفها نورك يكفي و ( اعطني النـاي َ وغنـي)

[سمر محمد]

الحب والهندسه
فجر والليل توه في فم النور غـاب=دقت الساعه وصحيت لهـا الانسـه
طفلة توها تقطـف سنيـن الشبـاب=عام تقطفه ورد وعام فـل تغرسـه
ما لمس جسمها الا انعم وارق الثياب=ينسج خيوطها الاستبـرق وسندسـه
تحته من الثمر ما لذ طعمه وطـاب=تستفزه خيوط الثـوب لـو تلمسـه
غادة في شفاها سكـر التـوت ذاب=لونه احمر وارق من الكرز ملمسـه
دون بستانها الفتان حـارس وبـاب=احسد الباب والا عين مـن يحرسـه
اشترت شنطة ودفتـر ودب وكتـاب=واربع اقلام حبر وعلبـة الهندسـه
ونقشت فوق وجه كفوفها با الخضاب=صورة الموناليزا وعينهـا الناعسـه
واستعدت بعد ما حان وقت الذهـاب=تطوي الشارع بخطوة الى المدرسـه
عانق الغيم وجنتها وضـم الحجـاب=والطريق يعدي معها وضـاع نفسـه
من يلوم الطريق ومن يلوم السحـاب=لو غدى بينهم في عشقهـا منافسـه
ودخلت فصلها ما تدري ان العقـاب=ينتظرهـا علـى باكـورة الانـسـه
والسبب ماهو التأخير والا الغيـاب=السبب صورتي في علبـة الهندسـه

[سمر محمد]

المسيح ومريم العذرا وجذع النخلة!!
هز جذع الفكرة الهاجس وطاحت جمله=معجزه واظلاعها جملة وجذع وفكرة
فا المسيح ومريم العذرا وجذع النخلة= المخاض الصعب في لحظة سقوط التمرة
اشكر الله جابها لي هكذا مكتملة= ما دخلها النقص من فضل الله ومن شكره
من حدود القيروان ليا منابع دجلة= ومن ركون المسجد الاقصى لمسجد نمرة
مستحيل المستطيل ولو نغير شكله= واحد من اظلاعه الاربع يساوي قطره
قبل افسر قصة المأمون والمعتزلة= قد قريت أخبار داوود ومناهج سفره
ضحكة سليمان فا الوادي وخوف النملة= ذكرتني قصة ايوب ومرضه وصبره
كل ما ارسم بيت للشعار يصبح قبلة= احد يسلم له واحد يجحد ويعلن كفره
واكثر اللي يجحد ويكفر ولا يسلم له= لو سألته قال ما احبه واموت بشعره
وان جلس ما معه احد قال الصحيح اشهد له= اشهد انه شاعر في عصر ماهو عصره
قالها فرعون يوم انه عصى من قبله=إنما موسى يبا يظهر علي بسحره
ألق يا موسى العصا والساحر القى حبله=وان كفر فرعون ذي الاوتاد يسلم عشره
وان تبع هامان فرعون وتفرعن مثله= واحد ٍ منهم يبا يصبح للاخر عبرة
الجمل لو خلقت رقبته كذا معتدلة= كان ما شاف السنام اللي خلق في ظهره
احترام معاوية والا القضية سهلة= من ثلاث سنين يمديني قطعت الشعرة
يا حبيبي خلنا في عنتر وفي عبلة= واترك اللي للحصان يدورون العثرة
اكثر الاخصام لو ربي يحلل قتله= كان من جرة قلم قلت احفروا له قبره
انت كل الزين والباقي يروح لا هله= لا تصدق من يقول العاشق اعمى نظرة
جامع الضدين ثلج وجمر داخل قبله= جمر ما يطفيه ثلج وثلج يشعل جمرة
والله اني كل ما شفتك نثرت القذله= ارتبك والبس عقالي قبل لبس الغتره
ماهي برهبة ولكن باختصار الجملة= مثل ما للموت سكرة للمحبة سكره

[سمر محمد]

وش سوى الغياب؟!!
تدرين وش سوى غيابـك لا جـزى الله الغيـاب=
سوى سوايا الريـح والامـواج بشـراع السفـن
الشمس غابت واختفت والثلج مـن فرقـاك ذاب=
والحب شمعه في مهب الريـح يدفعهـا الزمـن
والريح غضبت وانتثر دمعه من عيون السحـاب=
والشوق فز ودمعتي طا حت على كـف الشجـن
دمع السحاب اليا انتثر شربه ضمـا خدالتـراب=
لكن انا دمعـي علـى فرقـاك راح بـلا ثمـن
صار الفراق الزاد والما واللقا جـوع وسـراب=
والنوم صار اكبر عدو والليل صار اكبـر وطـن
وانصكت ابواب السعاده وانفتـح بـاب العـذاب=
والصبر زال وحال والشوق القوي حـل وسكـن
والروح ضاق ابها الفضا والجسم ضاق من الثياب=
والضيق ضيـف ٍمرنـي ومعزبـه روح وبـدن
البارحه مريـت دمعـه فـوق تذكـرة الذهـاب=
ما شفتني واقف هنـاك ادفـن هيامـي واندفـن
مريتك رسالة زعل في ظرف من لـوم وعتـاب=
دقيـت بـاب اللـوم محـد رد والا قـال مـن
انا ادري ان الحظ جابك والسفـر ودى وجـاب=
الله يبيـض وجـه حظـي حيثمـا راح وظعـن
وانا اشهد ان الوقت ساطـي لا يـذل ولايهـاب=
لولاه ساطي يا حبيبـي مـا جـرح والا طعـن
ما يدري اني لاجلك اتعبـت المطايـا والركـاب=
الله لاجلك كـم وطيـت دروب واهـوال وفتـن
ما يدري انه فا الضلوع العوج تعوي لـك ذيـاب=
ما يدري ان اللي براسي في رحى البعد انطحـن
لكن زد غبـاً تـزد حبـا ًولـو طـال الغيـاب=
قبري تـراه عيونـك الثنتيـن ورموشـك كفـن

[سمر محمد]

عربدة فكر!!
بحر الغرام ومركب البحـار فـي وجـه المضيـق=
والموج يأتـي فـوج يتبـع فـوج ويهـز الشـراع
ضاعت خطوط الطول والعرض وتفاصيل الطريـق=
وبانت خطوط الموت عرض وطول في وجه الشجاع
وافكـاري اللـي تتسـع للكـون والدنيـا تضـيـق=
بافكاري اللـي ضيقـة الدنيـا تزيـد ابهـا اتسـاع
تزاحمـت تزاحـم الحجـاج بـا البيـت العتـيـق=
عقب انتهى رمي الجمار وطافـوا طـواف الـوداع
والعقل مـا كلـف خلايـا المـخ مـا لا تستطيـق=
والفكر مثل الحج فرض وركن حسـب المستطـاع
مدري متى مـن نشـوة التفكيـر يـا عقلـي تفيـق=
لكاس مغري وانـت مدمـن خمـر والدنيـا متـاع
والليل (يثرب) والخيال ابعد من الماضـي السحيـق=
والقلب( احد) والصبح نـوره مـن ثنيـات الـوداع
واللي دعانـي للكتابـة صـوت( فيـروز) الرقيـق=
يا حرف شرفت القصيـدة مـا دعـى للشعـر داع
افعل وسـو اللـي تبيـه وشـب فاوراقـي حريـق=
صدر الورق مفتوح وانته ما علـى وجهـك قنـاع
انته صديقي في زمن مـا عـاد بـه باقـي صديـق=
الا الصديـق اللـي يـدور منـك غايـة وانتـفـاع
وانت العشيق اللي ليا خان العشيـق اوفـى عشيـق=
انا اشهد انك تعشـق وتملـك وتشـرى مـا تبـاع
سولف وبعثر لي همومك وافتـح الجـرح العميـق=
وانـا معـك ساهـر ولـي أذنـا تجيـد الاستمـاع
طير الحمام اللي بنى عشه علـى الغصـن الوريـق=
هاجر وخلى العش فوق الغصـن للذكـرى وضـاع
وجناحه اللـي مـن خـلال المـوج مـده للغريـق=
كيف انتشلني من ضيـاع البحـر لبحـور الضيـاع
راح وكتبت اسمه ثلاث احرف على الحور العتيـق=
حـب وهيـام وعشـق واشـواق وخيانـه والتيـاع
ومدري متى من نشـوة الاحبـاب يـا قلبـي تفيـق=
الكاس مغري وانـت مدمـن خمـر والدنيـا متـاع

[سمر محمد]

صرح فرعون!!
عشان الموعد اللي مفترض فاول شهـر كانـون=لبس كانون شال ومعطف وجا حسـب ميعـاده
درى كانون واحبابي نسوا مـا كنهـم يـدرون=عن الميعاد واللـي مـا اهتنـا شربـه ولا زاده
طفى جمر الغضى بعد انقضى واستوحش الكانون=فقـد جمـره وماتـت دلتـه واغتيـل بـراده
صحيح الوعد دين وخابر وعود الحـرار ديـون=وانا طـلاب ديـن ولا و فانـي فيـه سـداده
يا هامان ابن صرح من الحروف لسيدك فرعون=لعلـه يبلـغ اسبـاب السمـاء وثبـت اوتـاده
واذا كان المراد التكلفـه جبنـا ذهـب قـارون=ومن عنـدي عليهـا مثلهـا ضعفيـن وزيـاده
تصرف جيب طاقم هندسي من كل شكل ولـون=تخير من تبي وابشر وانـا اجيبـه مـن بـلاده
ابيه اعجوبة العصر الحديث ولا يجي فا الكـون=شبيـه لـه ولا مثلـه ولا حتـى مـن انـداده
ابي سقفه يكون الكاف وابوابـه تكـون النـون=ممراته ذهب خالص وجدرانـه خـزف سـاده
وابيه يمر من فوق السحـاب ويثقـب الاوزون=واشوف الشمس تجري والقمر ما بيـن ابعـاده
وابيه اشهر من الاهـرام مـن تمثـال نابليـون=وابيه اعظم من السور العظيـم بعيـن مرتـاده
وابي حتى نبوخذ نصـر اللـي علـق الزيتـون=علـى شرفـة حدايـق بابلـه عقديـن وقـلاده
يشوف المعجزه حتى الحدايق في نظـره تهـون=وينسى انه بناهـا وانهـا كانـت مـن امجـاده
وابي زواره اكثر في عددهم مـن ميـة مليـون=عسـاه يكـون قـرة عيـن فرعونـه ورواده
وابي من ضمن زواره ابو الطيب وابن خلـدون=وابو زيد الهلالي لو يجي مـن سابـع اجـداده
واذا كان ان برج ايفل خرج مره على القانـون=فانا صرحي يبي يخرج على القانـون واسيـاده
يا هامان الحروف الابجديـه تسعـه وعشـرون=وانا اخر حرف كاتب با القلـم تاريـخ ميـلاده
اولع با القلم جمرة واصمم بـا الـورق غليـون=واكن الشعـر تبـغ وجمـرة الغليـون وقـاده
واجيب البيت صاحي كامل العقل ويجي مجنـون=واجيب البيت مجنـون وتزيـد جنـون حسـاده
كأن الشعـر ولاده وانـا كنـي ابـن زيـدون=وابن زيدون عاش ومات لاجـل عيـون ولاده

[سمر محمد]

قصيدة يا أيها الناس هذا بلاغي
من صوب وادي عبقر اللي عربدت فيه السيول = اللي ليا هبت عليه الريح صار لها صرير
مثل الربيع الطلق اتيت اختال ما بين الفصول = في كل نقطة حرف ما في كل قطرة ما عبير
اصابعي خمسة سنابل خضر وكفوفي حقول = واوراقي البيضا طيور وكل سطر جناح طير
شاعر فحل من قشر حظي عشت عصر اللا فحول = اجمع شجاعة عمر بن هند وثقافة شكسبير
لو ترسموني خط عرض ارسم لكم خطين طول = الشمس تشرق من يدي والارض حولي تستدير
اقدر بسحر الحرف اغير كلمة علوج لعجول = يعني بخفة يد ارد الثاني بدال الاخير
يا أيها الناس :اسمعوا مني واعوا ماذا أقول = هذا بلاغي: أن تقولوا ما أتانا من نذير
إني نذير لكم لو اني لا نبي ولا رسول = انسان اظن الخير في نفسي وفيما اقول خير!!
ان كنت اقول الحق اعينوني على وضع الحلول = وان كنت مخطي عدلوني زين با السيف الشطير
من منكم بلا ذنب يا اصحاب البصاير والعقول = فليرمني با كبر حجر في ساحة النقد الكبير!!
والله مالي من وراكم لا بعير ولا ذلول = احلامي اكبر في حياتي من ذلول ومن بعير
لكن ارى ما لا ترون من الامور اللي تهول = اللي تهول وشيبت راسي وانا توي صغير
شفت العجايب والعجيب ان الطبيعه ما تزول = اعور يقود اعمى وراه اعمى يقّود له بصير!!
اعور يقود اعمى تساوى الرفض فيها با القبول = اللي عجزت القى لها حل المفتح والضرير!!
وامير في جلباب شعر يعيش له خمسين حول =ويموت خمسين الف شاعر في طرف جلباب امير!!
قصرت مقاسات الجبال وطالت قرون الوعول= يا وقت قصرت الطويل وزدت في طول القصير
لكن حبل الكذب يقصر لو يزيد ولو يطول =لو ينفتل من سر غامض ما يحفظه قاع بير!!
قلنا الضمير يعيش والغمه عن الامه تزول = لا زالت الغمه عن الامه ولا عاش الضمير
نبكي على سقط اللوى ما بين حومل فا الدخول =ويضحك علينا طرفه بن العبد ويصفق زهير
والنقطة اللي فوق حرف الضاد مالت للذبول =وان ذبلت النقطه ومالت صار حرف الضاد غير!!
يوشك يجينا وقت يتسيد علينا بن سلول =ويصير حكم الابجديه عند تجار الشعير
هم دنسوا باسم المكاسب مريم العذرا البتول =ثم احرقوا في قرطبه تمثال موسى بن نصير
وش ننتظر منهم وشمس الشعر توشك للافول =لا معهم اسفار الهلاليه ولا حنا حمير
وان طاحت الرايه وداست فوقها اقدام المغول = لا تسألوني وش يصير؟ الله يعلم وش يصير
هبوا واعدوا ما استطعتم لو من رباط الخيول =يا الطيبين احفاد ابو الطيب وبشار وجرير
صيحوا مثل صيحة مضر والا اعقدوا حلف الفضول =والا انطحنتوا في رحى يوم ٍ عبوس ٍ قمطرير
تحرروا من عقدة المنصب ومن دق الطبول =اول عمل في درب الاستقلال :تقرير المصير
اعلام صار اعدام صار اوهام مدري ويش اقول=هذا بلاغي: أن تقولوا ما أتانا من نذير

[سمر محمد]

جنة بربوة
تفتح قميص الدرب خطوتها ترف وتزرره=وانا افتح ازراري واسكرها على خطواتها
هي تفتح ازرار الطريق بكيفها وتسكره=وانا ابتلش با ازرار ثوبي واغلط بفتحاتها
خطواتها غيمه على وجه الطريق المخضره= يا بخت الارض المخضره با الغيمه وزخاتها
الجادل اللي صمتها يخفي حديث وثرثره= كن السكوت اللي تجيده بعض من كلماتها
مرت ولا التفت مهو لا جل انها متكبره=لكن تخاف نروح فيها من سبب لفتاتها
فاخر عناقيد الطفوله واول غصون المره=فاول انوثتها وطفله فاخر نهاياتها
جنه بربوه صابها وابل وصارت مثمره=طابت واتت اكلها ضعفين في اوقاتها
من تينها تفاحاها يغتاض ويفج نحره=وتغار شجرة تينها من غيض تفاحاتها
مالت سنابلها الخضر واغرت عصافير الذره=لو كان ما عصفور اخذ له شي من حباتها
ان جيتها من ميمنه وان جيتها من ميسره=كل الجهات الاربعه من وين رحت جهاتها
مملوحة ومن شاف قبلي ملح داخل سكره=الملح فيها كلها والسكرة بشفاتها
وقفتها اسالها ووقفت والحروف مبعثره=المها وتطير واعود والم شتاتها
وانسى سوالي واذكره وانساه وارجع واذكره=وان جيت اقوله لخبطت كل الحكي بسكاتها
واطول الحكي وتقاطعني دلع وتقصره=وانا لعانه ودي تطول معي وقفاتها
قالت صحيح انك ملكع واسئلتك مكرره=سويتها قصة بنو اسرائيل في توارتها
الله امرهم يذبحون بدون تحديد بقره=لكن تمادوا وسئلوا عن لونها وصفاتها
قلت ايه لكن بعدها نالوا عظيم المغفره =وانا :ما نلت الا رماح عيونك وطعناتها
قالت بنظرة وابتسامه يا لئيم المعذره=هات ورقتك اللي معك في يدك يا الله هاتها

[سمر محمد]

قصيدة في الوادي المقدس طوى
في رحلة العمر من بصرى الى نينوى = عرافة الفكر لعبت با الصدف والودع
قالت : أحدثك والعهدة على من روى = عن سالفة حزن فيها نفحة من الوجع
ثلاثه اخوان فا الوادي المقدس طوى = تحدثوا بينهم وانا وقفت استمع
الاول اسمه شرف والثاني اسمه هوى = والثالث االما وابوهم حضرة المجتمع
قال الكبير اسمعوا حنا خلقنا سوى = واخاف لا نفترق مره ولا نجتمع
وليا انقطع بيننا حبل الوصل والتوى = وشلون نرجع بعد حبل الوصال انقطع
انا شرحت لكم العله لكن الدوى = ماهوبعندي وكل يبحث ويخترع
قال الهوى لو فقدتوني وطال النوى = اللي يبيني على قمة جبل يطلّع
امرّ به عاصفة من صوب سقط اللوى = او نسمة باردة فيها دلال ودلع
تنحنح الما بنبرة عالي المستوى = واوجز كلامه وقال بصوته المرتفع
ان تاه اخوكم عن السكه وضل وغوى = ليا حفرتوا فا الارض شوي فز وطلع
صد الشرف عنهم وفكره سرح ما ضوى = لين سالوه ونظرفيهم وطرفه دمع
قالوا عسى خير جاوبهم بحرّ وجوى = اخوكم ان ضاع مره وحده ما رجع

[سمر محمد]

الخليج اليعربي

والله اني رغم ما فا الراس من علم وغزراه =عن حضارات القرون اللي خلت واللي تلاها
والدّها والفطنة وفن التخاطب با الاشاره=والحروف اللي تباهى بي وانا فيها اتباهى
واعتقادي اني الشخص الذي صعب اختباره =واني اعرف ما تقل الارض وتظله سماها
ليلة البارح فضح عجزي سوال البنت ساره=يوم قالت لي ( يبه كلمة عرب ويش معناها؟)
بعثرتني يرحم الله والداها في عباره =وجمعتني في عباره يرحم الله والداها
ارتبكت ولا حظت فا العين دمعة وانكساره =كم دموع ٍ تفضح الواحد لو انه ما بكاها
وضحكت مني وقالت( ورني وين الشطاره)=قلت شمعه في مهب الريح مدري وش طفاها!!
لو سالتيني من اللي هد برجين التجاره =كان جاوبتك وانا واثق هدمها اللي بناها
العرب امة لها تاريخ وامجاد وحضاره = اصطفاها الله ومنها المصطفى المبعو ث طه
انشدي عن صبرها قمة حرا النايف وغاره =والرسول اللي تحمل بهذلة قومه واذاها
عن طهارتها الحرم من منبره لين المناره=والقبور اللي بطيبه طيب المولى ثراها
عن شريعتها كتاب ٍ ما يمس بلا طهاره =والصحاح الاربعه وام الكتاب ومن قراها
عن عدالتها عمر والقبطي ورد اعتباره=يوم قله من عطاك بنص كف اعطه ملاها
وانشدي عن سيفها اللي يقصم الظهر وفقاره = كيف عز رقابها واخضع لها هامة عداها
وانشدي عن جودها حاتم وسكينه وناره =والحصان اللي ضيوف الليل من لحمه عشاها
قاطعتني بابتسامه في حلاوتها مراره =جمعت ضدين بسمه مرها يغلب حلاها
قالت وهي تلعب بثوبي وتربط لي زراره= ما بقى الا بنتك الصغرى تبا تضحك علاها!!!
العرب كانوا كذا واليوم لا والله خساره = انت تقرا صفحة ٍ تاريخنا الحاضر طواها
والعلاقه بينهم صارت مثل راس السيجاره =من قضى منها بدون مشاوره تحته رماها
وان لقى فيها نفس عود عليها باستداره =حطها من تحت رجلينه وباقدامه وطاها
اليهودي با القنابل يقصف اطفال الحجاره = والعرب تزعل وترضى من خلاها في خلاها
ان رضت طول جداره وان عصت صدر قراره = ما حسب هيبة شواربها ولا هيبة لحاها
غز بين الضفة الغربية وغزه جداره=فوق ميل ارض اغتصبها واربع اميال اشتراها
حوطوها مثل ما حوط على المعصم سواره =وذبحوا ورعانها الرضّيع واستحيوا نساها
من هو اللي غيرنا استعمر وشّرد من دياره؟ =غيرنا من نكس الهامات والروس وحناها؟!!
العروبه صارت ان الجار ما يامن لجاره =والسيوف اللي تقص الروس رجعت في خباها
امة في كل ليله تركب الموت وقطاره = المقاعد من قنابل والتذاكر من دماها
قلت يكفي وتركتني كوكب ٍ ضيع مساره= في سما الافكار يسبح من فضاها في فضاها
مرة يدخل فا المدار ومر يخرج عن مداره= ضيقة صدري وانا اللي ما بغيت الا رضاها
ولعت همي جمر وظلوعي العوجا وجاره =يستعر والنار ما يشعر بها الا من صلاها
وتركت لي ليل من طوله تعبت ارقب نهاره=كن شمس الصبح شحت وحجبت عني ضياها
يوم خيط النور ازاح الليل من خلف الستاره =قلت لا والله عقلها الله ورجعت من حياها
بعدها صليت لله ركعتين الاستخاره =واتجهت لشاطي البحرين لي حاجه واباها
ما وصلت لشاطي البحرين من شان الزياره=غير لي حاجه منعني دونها والا عطاها
ان منعني دونها حقه ولا فيها استشاره =وان عطاني قلت طالب حاجه بحق وخذاها
امرؤ القيس احتمل عنا لوا الشعر وشعاره=ما غزت شرد المعاني غير هو عاقد لواها
واحمد المتنبي اللي كل بيت من ابتكاره =اشغل العالم ورى معناه والدنيا ملاها
من وراهم جيت فارس شعر ما شقوا غباره = راكب لي حرة ما خلق فا الدنيا كماها
ان مشت مشية مليكة عرش نمرة واستماره =وان عدت من سرعها رجلينها تلحق يداها
( وصفها تقريب تتفل فارتخا ذيب المغاره)=(ساقها ساق النعام وتشبه الظبي ايطلاها)
دام انا خيالها اللي ما رضي غير الصداره= وش عليها كان خلت باقي العالم وراها!!
عين يعقوب استردت شوفها عقب البشاره= مير انا عاذر عيون ما تراني من عماها
لا نتزعت اعجاب جمهوري وصفق في حراره=كني اللي منتزع بلقيس من دولة سباها
وان حصل للشعر امير وصار للشعار اماره=ما تعدا ربعي عتيبه وانا احد من ومراها
يا الخليج اليعربي عقب انتهى وقت الزياره = ما بقي فا الخاطر الا كلمة وردت غطاها
بعد عشر سنين لا مرت عليك البنت ساره =قل لها الدكتور دور للاجابه ما لقاها!!