الشاعر إبراهيم الوافي ( وريث الرمل )

[سمر محمد]

فراغ
فرراا غ وكيف ابو صف لك عن اللي لاسمعتيني=يهدّ الانتظار اللي بنيته بأول الأحزان
صحيح إن القلوب أوهى من احساسي وتكويني=وصحيح إن النصيب أقوى من الأحلام والأشجان
أحبك بس ماربي موفقني تحبيني=واقفِّي بس ماربي مقدّرني على النسيان
تقولي لي متى تامن وتتركني على ديني=بودّي بس كيف آمن على ديني من العصيان
سوالف نصها يكفي يموّتني ويحييني=ويبقى نصها الثاني نصيب الشك والبهتان
عرفتك هدنة شعوري على كيفك تراضيني =وإذا زعل الرضا مني رضيتي والرضا زعلان
أجي ودي عناقك بس خايف لاتصدِّيني=واجي ودي فراقك بس ( ضحكة صوتك ) الفتَّانْ
تضيِّعني ورا حزني تدوّخني ترابيني=وأجي مديون من غلبي وانا اللي فا لأصل .ديَّان
مسافة بيننا هلحين لكن بينك وبيني=تضيِّع نفسها اللحظة وتسألنا عن العنوانْ
أحس إنك قريبة حيييل واحساسي يبكّيني=وأحس انك بعيده ويل واحساسي يجي ولهان
مصيبة قلبي المسكين يوم انك عرفتيني=متى بقبل متى بخجل متى بغضب وانا الغلطانْ
أفكِّر من هذاك اليوم (حلمي لو تشوفيني )=أفكر ننتهي لكن أحن لموطن اللي كان
ركام الذكريات أكبر من حروفك تجافيني=وخصام الأغنيات أجمل إذا حزنك خلق فنان
ولكن كل ما فكَّرت واستبشرت جيتيني=غسلتيني وانا مشغول بين الشك والإيمان
وتبقى نفسها الحالة تكرر بس في عيني=ثياب الذنب في منطقك هي اللي على الغفران
وأنا مدري متى صدَّقت في طيبتك تخميني=ولا حتى متى كذَّبت هوجاسي وهو شيطان
ولا وش عاد يبقالي بقلبك لاذكرتيني=ولا وش عاد يبقالك بتاريخي مع الحرمان
بس اللي أعَرْفه زين احبك ماتحبيني=ولا ربي مقدرني إذا بنسى على النسيان

[سمر محمد]

لو نبوح
لو نبوح بشوقنا ما هي غرابة =الغرابة نكتم الشوق الحنونْ
من يداري لهفته ساعةْ كتابةْ =أشهد إنه قبلْ ما يكتب يخونْ
يحسبوني عاشقْ وشعري سحابةْ =والمطر حزني وتحناني مزونْ
ويشهد الله ما بقى غير الكآبةْ =أنثر دموعي وما عندي عيون ..!
لهفتي دمعة وتذكاري ربابةْ =كل ما جرَّيتها تبكي اللحونْ
يا فتون الشعر فعيونك مهابةْ =أتخطَّاها وأهيم بها الفتونْ ..!!
ذنبي إني شاعرٍ ينثر عذابه =بين صمته وانكسارات السكونْ
وانتي اللي واقفه في ظل بابه =تحسبين إنه على نفسه يمونْ
ضحكتك جنَّة ولهفتك استجابه =وانتظارك خوف وأحلامك ظنونْ
الشجن كله على شانك غدابه=لين قلتيله : ( تكون وما تكون ) ..!
والبنات بصفحته صوت ابتدابه = يوم غنَّابه لقاهم يرقصونْ ...!!!
بس وحدك شمسه اللي ما تجابه =لا ظهرتي كلهم يب يختفونْ
وانتي اللي تعرفين انا نتشابه =.نختلف عنهم .. ويجمعنا الجنونْ
لو نبوح بشوقنا ماهي غرابةْ =الغرابةْ .. نكتم الشوق الحنونْ ..!!!

[سمر محمد]

علاء الدين

على هونكْ ..
خذيني ليل
إن عيا يجيه الصبحْ ..!
خذي من آخر ظلالي ..
خيال الجرحْ ..!
خذي من بحري اللي صار
ما يقوى على أمواجه ..
مرار الملحْ ..!!
خذي من صوتي الدافي
حروف الشاعر ( الوافي )
خذي حتى ( الوفي ) مني
قبل ما أموتْ ..!!
***
على بابي وقف ماردْ ..
وقال : ( انتَ علاء الدينْ ..!!
وأنا ماني علا ء الدين .!
أنا أوهى من الأحلام والتخمين ..!
أنا ماني علاء الدين..!
إذا بطلبْ ..
أبي أطْلب غبار سنينْ ..
وإذا بهربْ .
أبي أهرب من اللي ماتت بعيني
بلا تكفينْ .. !
على بابي وقف مارد
وأنا واحدْ ..
من اللي كلهم واحد ..!
وهو يدري عن أحزانه
نسي لايحط عنوانه
على بابه ..
سأل يا رب وش جابه ؟!!!
أنا ما عاد ليَّه فيه ..
أنا ماني علاء الدين
أنا شاعر حزن مسكين ..
يبي يكتب ..
يبي كل العرب تقرا
وهو يكتب
ولا يطلبْ
يكون فساعةْ كتابهْ
علاء الدين ...!!!
***
على بابي .. وقف جبَّارْ
وقال بنبرة الواثق :
تبي تختارْ ..!؟
تكون العازف اللي دلَّله قيثارْ ..! ؟
تكون الصوت والتذكارْ ..
تبي تختارْ ؟!
وأنا ماني علاء الدين ..
ولا أقدر أفكَّ حصارْ ..
سنيني كلها شيحة انبتتْ بجدارْ ..!
وحلمي بس لو مبكي
على اللي صارْ ..!
أنا ماني علاء الدين..!
أنا نادوني الشاعرْ .
وخبَّوا لفظة المسكينْ ..!
أنا عصفورْ ..
وقع من شيحة الذكرى
وشافك سورْ ..!
قَرَبْ ..لكن طلعتيله
تقوليله
ترى منتى علاء الدينْ
انتْ الشاعر المسكين .
عجزْ ينسى ..
ولو ينسى .. !!
ماظن يكون لو لحظة علاء الدينْ ..!!

[سمر محمد]

قلبي معك
قلبي معكْ مهما تخافين يحميك=حولك مثل ظلك مكانه مكانكْ
أقطف من غصون الوله شوق وأعطي=وأظلّل الصحرا بغيمة حنانك
يا نايمة في عين نورس تراعيك=كل النوارس حالمة باحتضانك
يكفيني انكْ لي ..ياليت يكفيكْ=شاعر كتب شعره عذوبة لسانكْ
كل القلوب الخالية لو تناديك=ماهمني مادمت فارس زمانك

[سمر محمد]

ابقى معي

بعد مرور عام .. جمع شعره المحكي ثم كتب إليها :


مرَّت سنةْ والحرف عصفور ماينـام =غنى على غصن السطورالجديدة
تستـقبلينه شوق واحساس والهام =ويبات فعــيونك مســافة بعيدة
كنــه حكاوينا على مـــــرَّ الأيام =تجسدت فســطور شاعر عنيدة
هذا أنا .. انتي غفينا من الــعا م = حتى صحينا والسوالف قصيـدة




صمتت قليلا ثم قالت له هل تبقى معي
الليلة قليلا ..؟!
فأنشدَعلى لسانها :

ابقى معي
اليوم بس ابقى معي..!
أبغى أحس إني معك ..
أبسمعك..
وأبنثر حروف الوله في مسمعك .!
أبغى أحس بلهفتي تمطر شعر
وأبغى أطير بوحدتي صوب القمر ..
أنثى أنا ..
وانتَ مواعيد الهنا
آخر طريق لوحدتي
وأول قصيد لقسوتي
تبكي عليّ ..؟!
وش في يديْ
أنثى قوية ظالمة ..!
ابقى معي ..
اليوم بس ابقى معي
طفلة صغيرة حالمة ...!!
***
ياصاحب القلب الكبير
حلمي صغيرْ
ليله من العمر الضرير ..
تبقى معي
تلعب بشَعري وانتفضْ
أغفي بحضنكْ وأفترضْ
إن الحياة انتَ وأنا ..
ماغيرنا
يقدر ينازعنا الهنا
يقدر يسافر للقمرْ
ينقش على بابه شِعر
ماغيرنا
يسمع مواويل الحنينْ ..وينتشي
يرشي عصافير الصباحْ ..ويرتشي
بأحلى نشيدْ
اليوم بس ابقى معي
قلب ووريدْ ...!!
***
ليلي حزينْ
ياسيد أحزان السنينْ
العمر كله في يدي
الآمرة والناهية
الواعية والساهية
أدري بحالي ظالمة
لأنك بكيتْ
وأدري بحالي هايمة .. لاني نسيتْ
أنثى أنا ..
تعرف متى تستعمركْ
تعرف متى تستثمركْ
لكني الليلة أجيك..
غير الليالي كلها
طفلة صغيرة حالمةْ
ابقى معي ......!!
اليوم بس ابقى معي
ننسج سوى
تاريخ فجر بلا نهارْ
رغم الحصار..
نحيا فباب الانتظارْ
لحظة هوى .. !!

[سمر محمد]

أنا احتاجك

( أنا أحتاجك ) ..!
وكل الدرب صارت لي
أشيل الشوق وأسارعْ
كل الأرض تندهلي
ماحد غيري بها الشارع
فطوري ( تمرة ) احساسك
وكاسة ماي بانفاسك
كأنك يوم ( تحتاجين ) : نخلة عمري الباقي
وقطرة ماي لأشواقي
يفطِّرني (شجن ) باقي
أجي ملهوف
أجي بين الرجا والخوف
أشيل الشوق وأسارعْ
أجي وآنا جمعت إحساس كل الناس فالشارعْ ...!!!
***
( أنا أحتاجك ) ..!
مسافة حلمك اللي ضاعْ
ونبض احساسك الملتاعْ
ولون الشمس فعيونك إذا غابتْ ..!
يتوب الناس من دونك وما ماتابتْ !
حكاية أمسْ
كأنَّ الشمسْ ..
ماتسأل عن اللي يسكن الشارع ...
غصن ولهانْ
تغيب وينتهي يومي
تغيب ويبتدي صومي عن الحرمانْ ..!!
***
( أنا أحتاجك ) ..!
أخاف إنَّ السحاب اللي تعدَّى من ورى صوتي
سقى قبري قبل موتي
سأل ظلي
وقفت وجاوبه كلي :
( متى تاريخ ميلادك ؟
قبل شهرين
متى بتأرخ أعيادكْ ؟
قبل هلحين )
خلاص اللي أخافه صارْ
أنا شاعرْ
أحس ( بقسوة ) التذكارْ
أبجمع آخر أوراقي ..
وأجي للشارع الملهوف
أجيك بخوف
فطوري ( تمرة ) إحساسكْ
وكاسة ماي بانفاسكْ
أنا رغم اللي يصير وصارْ
أنا ناسكْ ...!!

[سمر محمد]

على طريق الوعد
على طريق الوعد للشوق موَّال = قصرت على شانه جميع المسافات
النفس صحرا لكن الغيم هطَّال= روحي على ريحة مطر وعدكم جات
لا تقول للشاعر تصاريف وأحوال =لجل الوسل كل العذاب ابتسامات
جيت لــ ( تناهيد النغم ) قلب ميََّال =وجيت الــ ( .... ) أسرق من الوقت ساعات
وأكشف الـ ( ..... ) دمع فعيون رجَّال =لجله قمر روحي فكل السماوات
من موطن الذكرى وباحزان رحَّالْ = جيت الظما يحرق لهاة الحكايات
هويِّتي جرحي تردَّابه الحال =وأشعاري أحزاني على دفتر الذات
أبختصر نفسي لونَّ الأسى طال =ماتت وكل الموت من بعدها مات..!!
وهذا أنا باقي ولي قلب ما زال =يفرح بلحظات الصفا والمواساةْ
لجله صدوق فوقت غادر ومحتال =ولجله وفي في وقت كل الخيانات
جاكم خَضَرْ بعده طري يشرب الفال =ويعيش وقت الصدق في كذب الأوقات

[سمر محمد]

حفيف
يبان الصبح .. وش يمكن من أسرار الظلام يكونْ=بداية يومي الرابع ولا أقـ.ولك وحشتيني
غرور الشاعر افــ قلبي وحزن العاشق المفتون=صباحي لاتناسيتك .. وليلك لاذكرتيني
بربك لايكون غيابْ .. في ساعة خصام يمون=على طيبتك واحساسك بغلطاتي تعرّيني
تواعدنا نكون اثنين ..ثالثنا الزمان يخون=غدا قاسي وأنا ناسي ..وإنتي ما تراعيني
ضحيتنا عواطفنا .. حسافة كلهم يدرون=عن اللي بيننا من يوم ماقلتي كتب فيني
أمانة بس لا شفتي بنبراتي غبار جنون=وقالوا لك ( وجع وش فيه ) نامي مع شياطيني
تراني داخل عيونك طفل لو غازلك مسكون=بتقديرك وتفكيرك .. وعطرك في دواويني
وإذا أبعدت عن عينك .. حرام الناس ينْبَسطون=أنكّد وافتعل ذنبك وحلفانك يبكّيني
أنا مثلك ... تعب قلبي ومحتاج السلام ديون=على وقتي يسددها سعادة باقي سنيني
ولكن خاتمة صبري يماطلني وأنا مغبون=إذا طالبته بدينه ..جعلك انتي وفا ديني
لقيتك واقفه مثلي .. ويابعض الوقوف فنون=على كل ( الدروب ) أنثر حكاية بنت ترثيني
ومن طيبتك حبيتي ...عذاب العاشقين يهون=أخذتيني من أحزاني ، وساقيتي بساتيني
كتبتك فتنة الأنثى .. وكنتي ضعفها مليون=كتبتك بس يبقى الصدق .. انت..ي اللي كتبتيني
جعلتيني أقول الله ! ( يا ويلي عليها عيون )=إذا ضيَّعت ضحكتها.. تنكّرْلي عناويني
وإذا ناديت دمعتها ، بكى الرمان والليمون=وكرهتني مواويلي ، وعاف الصبح تلحيني
أمانة .. بس قولي لي عرفت إنك طفل مجنون=تعوّد ماينام إلا بعد مادمّعت عيني
وإذا جيت أشتكي ظلمه يجيني يشتكي محزون=يبي يحزن لأنه بس ..مايعرف يواسيني
أحس انه كتب نصه يقين وهمَّشه بظنون=تلاحقني وتهزمني وأنا في عز تكويني
تعبت أشتاق له واحلم يغيِّر عادته ويصون=علاقتنا ولوتبقى شجن شاعر يغنيني
يبان الصبح ... ياصبح القلوب اللي اسألت وشلون=أعانق يومي الرابع و( هي باقي ) تجافيني

[سمر محمد]

وأنا معهم

تذكَّرتك ..وأنا معهم
مجمِّعهم
ودورتك قبل ما أنساكْ
في يومي ..وفي أمسي
لقيتك قبل ْما ادوِّر
لقيتك بينهم نفسي
أنا انتي مثل مانتي
فرحت لفرحتي مثلك
شعرت بحسرتي قبلك
وأنا معهم يناديني
صدى صوتك
ويبكيني
وإذا طيّبت له خاطر يغنيني
وأنا معهم يشاجيني
يموّتني ويحييني

***

تذكرتك وانا معهم
ومن حولي عبير الورد
وفعيوني خيال البعد
يقصِّيني ويدنيني
يضحِّكْني ويبكيني
وأشوفك من ورا ضلوعي تناديني
وأشاورلك
أسولفلك عن أحوالي
تغنيني وتبكيني

****

ترىكل الحياة انتي
وكل الموت لو كنتي
مكاني تسمعين بكاي
في صمتي
ويحيا موتك بموتي
أنا إنتي .ولو قلتي
فرحت وطرتْ
أعَرْف انك مثل مانتي
( ألم ) فيني
يبعِّدني ويدنيني
يضحِّكني ويبكيني
وإنت بين كل الورد ترثيني
وأنا أحَسْبكْ تغنيني ..!!

[سمر محمد]

تعبت اجرحك وأحبك
أحسّ بحرقة أنفاسك وأحس بجرحك الدامي =إذا مرَّيتْ لو باسمي بلا موعد على شفاتكْ
( كثيرة ) كل ماوثَّقْتْ تاريخي وأيامي =وكثير آنا بتعذيبي أجي حتى افــ (تحيَّاتك ) !
عليكَ أمان خلق الله ولاا آمَنْ مِنَ أوهامي =قِدَرْكِ اني دفا بردك شتاك وليل حسراتك
قِدَركِ اني جمعت الطيب في تغريبة أحلامي =تبعت آثار ريح الويل في تغريبة أبياتك
أحبك واجرحك وابكيك وارمي بعدك أقلامي =أتابع ظلك الهارب وأراوغ في ملاقاتك
غريب اللي يسيِّرنا كأنَّي عشت لـ ا خصامي =بداياتي مسافة ليل يبدا من نهاياتك ..!
أقولك شيء ؟ مدري ليه أحبك ذروة آلامي =أحب انك تجافيني ولا أرضى في مجافاتك
تعبت أجرحك واحبك ..تعبت أقطف لك أنغامي =من غصون الألم وردة .. ثراها من معاناتك
تعبت أقول شوفيني عشان أعميك بابهامي =وإلى من دمَّعت عينك مسحت الدمع بسكاتك
أحبك كثر ما أخونك .. وأخونك بس قدامي=أدافع عنك وآنا اللي نسف أجمل حكاياتك
أحاول فالقصيدة بس .. ترفض كذبة أحلامي=تجيلك في وهم غيرك وتشفق لي بغيباتك
عليم الله ما غيرك قدر يحيا مع أعوامي =وكل اللي بقي مني غلط يستاهل أوقاتك

[سمر محمد]

مخاوف


مخاوفْ .. والمدى غيمةْ
وأحجار الطريق كثار ..
وانا الأعمى ..
وكل الدرب من حولي ..كلامْ صغارْ ..!
هنا ....
لا ...
من هنا ...
تمشي .......
أطيح وضحكة الجهَّالْ .. من حولي .. (كلام كبارْ .. ) ...
مخاوفْ ...
من بقي شايفْ
ظلام الصبح .. غير الدربْ
ومن يقدر يجيله قلبْ ..؟
يحبْ وضحكة الجهَّال من حوله
( تصير غبارْ ..!!!! )

مخاوفْ .. والشفق واقف
على باب المسا بوّاب ..!
دموع الليلْ ..
فالمنديلْ ..
كُحْل جْنُونها فيني
أنا ويني ؟!
تركتَ الشمس تنفيني ..
ورا صوتي ..!
وفي موتي ..!
عزا .. واصحابْ مايدرون منهو ماتْ ..!
وَعَدْنا فاتْ
باقي فآخر الساعة دقايق كبْتْ
وبكرة السبتْ ..
دوام الجامعة .. والشارع الكذّابْ ..!

مخاوفْ والسما سودا ..
وأسراب الظلام طيورْ ..!
أنا المذكورْ
بأعلى صفحة أحزاني
طِلِعْ في هاجسي هلحين شيْ ثانيْ ..!
صحيحْ إنه ورا الميعادْ
بقي لليلْ فــ .. ـعيون االنجومْ أسرارْ
شظايا نارْ ؟
نقوش جدارْ ؟!
شرشف وجهها العشبي ؟؟!!
ويااااغلبي
نسيت إن الظلام طيورْ ماتنصاد ..!


مخاوفْ , والكلام أقسى من الإحساسْ ..
بقيلي ناس .. من حولي
وفي قولي
شراشف أمي الخضرا
وضحكة وجهك الصفرا
ورعشة كاسْ ..!
مخاوف لوقدرت أكذب ..كذبت وقلت ما احبّك !
ولو إني قدرت أحسبْ
حسبتَ الصدق في قلبكْ ..
بس المشكلة قلبي ــ مــ ...هو ذنبي ــ .. طفل حسّاسْ ..!
مخاوف والصديق آخرْ حديث الآهْ
على ذكراهْ ..
وقفنا الليلْ للشمعةْ ..
وذبنا ملح للدمعةْ
وعلمنا الكلام اسمه .. وما ينساهْ ..!
أنااا أَوّل سنين الموت والذكرى
وآخر واحد ايــ ..ــفكر .. متى بكرة
ابطّي دقّة الساعة إذا وِدّي
أجيب الهرج ..ما أوَدّي..
وأحب أنساهْ ..!


مخاوف والقلوب ألوانْ
من الأسود إلى الأخضر
من الأبيض إلى الأخطر
كتاب أمّي ..!
ومن همّي
كتبت إن السما بيضا وميراث الشفق أزرقْ
وقلب الغايبة أرفقْ
وميلاد القمر عنوان
متى الشاعرْ ؟!
إذا مرّة عشق .. يكتبْ
أو العاشق .. إذا مرة كتب يكذب ؟!
أنا الإنسان
أكبر همي النسيان
في عيني .. جمعت النور والبهتانْ
في قلبي .. كِبِر بستان
شوكُهْ .. آخرُهْ وردهْ
وأسفاري بلا عودهْ
وتذكاري حكاوي .. كلها تبدا بــ .. ياماكانْ :
قلم فوق السطور أحمر
وعاشق شاغل الجيران
عطر تركيبته ( ليلى )
وعين الغايبة نجلا
وأنا عطشااانْ ..!
أمانة لاذكرتيني وقلتي ( كانْ )
خذيني من تفاهاتي .. وغلطاتي
وصورة طيفك الفتّانْ
مخاوف لاتروحي هناك تنسيني
مواقف .. ما تصير الحين تلقيني ؟!!
بلا حرمانْ
شواطي صوتك احساسي
وآخر صمتك أنفاسي
ومهما كانْ
أحبك ماقدرت أخفي
إذا كنتي مرض ياااااااارب لاتشفي
بموت الشاعر الولهانْ ..!

[سمر محمد]

لاتأتي ولا تغيب ..!
وش عاد ..لو مرة تهجّيت ويّاي=آخر دموعي في عيون أبجدية
مادام لك قلبٍ .. من البعد نسّاي=يكفي تشوف الشوق يحرق يديّه
كلّمتها .. حسّيتها كلها ( باي )=قلتَ العتب خطوة .. وصوتكْ مطيّة
لا تقاطعيني .. باقي افعمري الجاي=غيبة مسافر ... وانتظاره هديّة
لا ياوجع قلبي ..من إحساس بكّاي=كل المواقف ماتقرّبك ليّه
إن قلت أحبك .. قالت الشمس خطّاي=يخطي علشانك ويبكي عليّه
الظل واحد .. لكن الوقت بقفاي=يسرق ثياب الليل قبل العشيّة
لا ياتعب نفسي متى يسكت الناي=صوته طرب روحي وحزنه أسيّة
أول صباحي صدق والشوق منهاي=بس انتهينا وآخر الصبح فيّة
ماقلت أحبك .. بس ضمّيت بعضاي=آخر حروفك .. واحتسبتك بقية
اذكرك صيف .. وأجمعك فآخرشتاي=ألقاك قبلة .. واتولاك نيّة
الشمس ظلمة .. وآخر الليل ملفاي=عتمة صباحي .. برضها شاعرية
خلّك مثل منتي .. سواد المدى داي=قبلك ..عرفت وعشتك ابعنجهية
كل الغصون تميل مع هبّة خطاي=ماهمّني .. وش قالت الساحلية ..

[سمر محمد]

غياب

غيااب .. وتوقف الذكرى على حدي
وقف ضدي
يمد بقسوته حبل الأصيل اللي فباب الليل لضلوعي
ترك جوعي
أنادي من ورى صوتي .. وفدموعي
مرار الملحْ ..
انادي .. من ورى صوتي : ( ابيك الحين )
ابي .. ألمسك فعيوني ومايحرق جفوني ملح
وابي القاك وسط الليل ساعة صبحْ
تقوليلي .. عن اللي قبل ما احبك ( يشوفونك )
عن اللي بعد ما احبك ( يخافونك )
وعن حزبين :
جماعة ( حرف ) تكرهني ( يصافونك )
جماعة ( صدق ) ترحمني يجافونك
أبيك الحين
قبل ماتسافر السكين في صدري
وفي شعري بقايا فالْ :
يقال اني جمعتَ الليل على خدود العذارى خالْ
وغنيت القمر موال
وان اللي تبي ترسم ملامحها قصيدة باول الدفتر
تبيتسهر
وتنسجني عليها شالْ
أبيك الحين ..
أبي يدي
نسيت إن القلم فيها
وإن الطين .. ذاك اللي تروّى بالمطر مرة
رسمنا فوق ( رَوْبُه) قلب
وكلمة حب
وأول حرف من اسمي
وآخر حرف من اسمي
نسي وجهك .. ولكنه حفظ رسمي
ابيك الحين ..
وانا موج البحر مدي
بديته بأول شجونك
بديتك صوت
نسي في دفتر حضورك حروف الموتْ
وعاش افجنة عيونك
ابيك الحين
مسافة بين ماكنتي .. قبل عهدي
مسافة ماكتبتك حرف .. ظلّتْ نقطته يدي
ابيك الحين
حنين سنين
عذاب اثنين
ماابغى توقف الذكرى على حدي ..!

[سمر محمد]

يكفي زعل

يكفي زعل
يكفي نغيب ونفتعل ..حزن الذنوبْ
لو القلوبْ .. اللي يبللها الدفا
واللي تعب منها الوفا
تقدر تتوبْ .. وتستكين
أدري نويتي ترحلين
لاتعرفين وتجهلين وننفعل
كافي زعل ..!
يادمعة عيون الفرحْ
من أول حروف السلام
لآخر أخبار الخصام
ميييييييين انجرحْ
غير القلوب اللي تذوبْ
ياللي تعلمتي لحالكْ كيف أموت
ياللي تكلمني سكوت
جانا المسا وعدا نهارْ
ظلك بقى فوق الجدار
صوتك دروووب
واللي بقالي منك مايكفي أحبك فيهْ
أو أسألك عن نوع الذنوب
تصدقين ؟!
البارح افــ عز الحنين
كل المواقف للهروب
الا الطريق اللي وقفنا فيه صدفه عابرة
يالذاكرة
جرحك كذوب
يكفي زعل
كل المواقف تشتعل
وابترحلينْ .. اما زعل واما هروبْ ..!

[سمر محمد]

مساء الخير
مسا دمعكْ
مسا وجه الطفل يبكي ..مسا صوتكْ ..
مسا الذكرى
مسا الحرف اللي ما ُيقْرَى ..ولا تشتاقه الأوراقْ .!
مسا الأشواقْ
مسا لا جيتلك مشتاقْ ..!
وفي صوتي طفلْ مغرورْ
مسا الجبَّار والمجبورْ
مَسَاءَ الخيرْ
صوتُه غيرْ ..!
وآخر بحِّتُهْ دمعةْ
مسا الدرب اللي ما خلاَّ لنا رجعةْ
مسا اللحظةْ
مسا ما سمِّتُه لفظةْ ..!
خيال الجرحْ
مسا ماينتظر ( حتى ولوغلطة ) يجيله صبحْ ..!
***
يا صوووت اللييلْ ..
يا آخر نجمة سهرانةْ ورا بيتي
متى جيتي ؟!
متى واحنا توادعنا بجنب الباب
طلعت لبيتي الكذَّابْ
وانتي ما لحقتيني
متى واحنا تواعدنا ..فبيتي ما تحبيني ..!
يا صوت الشارع الغافي
أنا الوافي ...!
أنا صوت الحزن مبحوحْ
أنا طير المطر مذبوحْ
وأنا الجارح وأنا المجروحْ
وأنا في قلبك الولهانْ
بقايا انسانْ ..
طفل تحت المطر ينْتف بريش الطير
مساء الخير .......!!

[سمر محمد]

مسافات الجراح

تناديني ..
وأجيلك من ورى
سور المدينة ريفْ ..!
فعيوني دموع الليلْ
لاشتَّتْ ..سحابة صيفْ
أجي مدري ..
أنا أو إنتْ كان الطيفْ ..!
كلشْ صارْ
ماظلَّ افحياة اللي فقدك أسرارْ ..!
شجنْ ما يكفْ
جفِنْ ظلا سنين يرفْ ..!
يجيلكْ من ورى سور المدينةْ ريف
وتمطر في عيون الليلْ
غيمة صيفْ ويرجعْ
يمضغْ افجرحه وهو يسألْ
أنا أو إنت كان الطيف ..!!
***
مسافات الجراح أكبر من الأيامْ
ولو بنقيسها بأعوام ْ
عشر سنينْ
وهو الطيف نفس الطيفْ
وَهَمْ ما يبينْ
حلمْ يصادره للصبحْ
وشاعرْ في يده وردةْ
وفي قلبه ..نبت سكِّينْ ..!!
***
مسافات الجراح أكبر من الأيامْ
ولو بنقيسها بأعوام عشر سنينْ
وهو الطيفْ ..بعده طيف
وهو برق الشتا بعده يجينا صيفْ
وأسوار المدينة ريفْ
وأنا توي يتيم الجرح
كن مفارقك للأن قدامي
وكن الطين توّه ما نشف
من قيظنا الحامي ...!!!!
وكن أصابعك ما سلِّمت للرمل خاتمها
ولا حتى وقف كفِّك
عن التلويح لأوهامي
***
مسافات الجراح أكبر من الأيام
وأنا توي يتيم الجرحْ
فعيوني يبين الصبح ..وأطفِّيه
مابي صبحْ
أبيك انتي ..لونك مملكة من جرحْ
أبسكنْ فيه ..
وإذا قالوا من الشاعر ؟
بقول آنا يتيم الجرحْ ...!!!!!!

[سمر محمد]

يقولون الحزن نزوه

إذا قالوا جميع الناس لاتهتمْ ..
ونام الحزن في عيوني .. وأنا مهتم
بغيت أسألك .. هو الحزن .. مايرحم..!!
والا الناس ماتدري صنوف الهم .!!
يقولون الحزن ..نزوة ..
وبعض الناس لابالغْ ..
يقول إن الحزن شهوة ..!!
وأنا لحالي .. أشوف إن الحزن سيرة ..
بتعذيبه وتأثيره
أنا التاريخ لاحزاني ..
وّاذا مرة بغيت أحزن قعدت أقراه
لقيت إن العمر مرة ..
حكاية تبتدي بالموت ..
ومرة تنتهي بالصوت ..
وكل اللي قريت ألقاه
***
أنا الأحزان .. تذكاري ..
قلم في يد مشلولة ..
تعريني مع أشعاري
وتنثر حسرتي حوله
بغيت أسألك وانتي قاعدة وحدك
من اللي يقدر يفكرْ
بأنثى فاتنة بعدك ؟!!
من اللي يقدر يسافر عن عيونك
من اللي يرزرع أحزانه ..
وتاريخه
وعنوانه ..
بأرض ترابها دونك ..!!
***
وريث الرمل .. وش يعني
ورثت الحزن والحسرة
وإذا بكره
نبتت زهره
ابقطفها وأقدمها
هدية حب في مظروف لعيونك ..!
ابكتب فوق جدرانه ..
أمانَةَ عليك وشلونك .؟!!
وحشتيني ..
يا أجمل وأعذب سنيني ..
تحبيني ؟!!

[سمر محمد]

في أخر الذاكره


( هي )
مرت سنة وآنا أعاني تمرد=ألقاك ود وقلبك يشوفني صد
غرّك صفا قلبي وظنك تفردك=أجْمعك أنا وانته مثل شوكة الورد
غيري يشمك يوم أنا أجمع توددك=لافادني قربي ولا فادني عهْد
لاغبت عنك القاك والبعد يجهدك =تبكي عليّ افحضن غيري من البعد
ماحس فيك الحين مابي قصايدك=مسافة احساسي معك دونها حد
ابغى اتطهر منك والثم توردك =حمرة خجل أودم ما يفرق القصدْ
أغليك وأنزف جرح لا جيت أعاندك =بس الحقيقة ضد يحتاج له ضد
ياشاعري مصلوب قلبي فمعبدكْ =أموت وانته ماتصلي من الفقد
تبكي بعيد .. وبس همك تخدّدك =تشكيني لروحك وهي ذنبها يهدْ

( هو )

ياساكنةشباك فجدار عيني =متى يشوف النور شباك الأحلام
شعري عيونك وانكساري حنيني=وغيابك احساسي بخيبات الأيام
تصدقيني عاد ( بينك وبيني ) =حنا غدينا اغراب عن بعْضْ من عام ..!
ساعة سألتيني متى تحتويني =حضنت حزني قبل ما تجف الاقلام
ما يكفي اللي فيك يجتاح فيني =أبكي عليك ومنك واشتاقك الهام
تقارنيني فيه تب تجرحيني .. ؟!=ماعاد يبقى جرح يشتاقك خصام
مات الأمل عندي مثل ما تبيني =ميت قريب ومبتعد صدقه أوهام
أبغى أدفن الذكرى قبل تدفنيني =آنا وكل اللى مضى شهوة أحلام

[سمر محمد]

مهنا فرق

أبي أنسى ..
مثل ما انتَ تبي تنسى
وأبي أشتاقلك وأقسى
وأبي حتى المسا لأمسى
ينسّيني ..
تصدق ليلة البارحْ
مشيت لموعدك فالأمسْ
وكانت صورتك ..لوحة على عيني ..
تناديني
وتحجب عن جفوني الشمسْ
وقفْتِ اشويْ
وغسَّلت البحر بيديْ
وذقْت الملح ..
ماهنا فرق..
بين الملحْ وفراقكْ
بين الموت وعناقكْ
ماهنا فرقْ
بين الليل لاليَّل على بابكْ وبكَّاني
وبين الوقت فغيابك تولاَّني
تصوَّر ..يوم ذقت الملح ماهْنا فرق
بين إني أكون انتَ
وبين إنك تكون آنا
بين الموت ضحَّكنا وبكَّانا
بين الحلم نادانا وخلاَّنا
ماهنا فرق تصور يوم ذقت الملح ماهنا فرق
بين الصوت في موتي
وبين الموت في صوتي
ماهنا فرق
بين إني ألم الورد فيديني
وبين إني نثرت الورد فوق قبور لانامت تصحّيني
تصور يوم ذقت الملحْ ماهنا فرق
بين الخوف في جوفي
وبين الجوف من خوفي
صار الكل متوحِّد بطعم الملحْ
صار الصبح ..ما هو صبحْ
صار الجرح ينبت جرحْ
صدقني وقفْت شويْ
ونشَّفت البحر بيْدَيْ
وشفت الملح بشفاتي
بعد ماذقت طعم الملح صرت أخاف من ذاتي
سرت أسرد حكاياتي لعبراتي
وأنادي من ورا صوتي خيالاتي ..
أبيك ألحين
أبي أَلْمَسْك في عيني ولا يحرق عيوني الملحْ
وأبي ألقاك وسط الليل ساعةصبحْ
صدقني وقفت شوي
وحسّيت البحر يسري على رجليْ
وقفت شوي .وناديتكْ ..
متى ترجعْ ؟
متى هذا البحر يسمع؟ !!
وأنا جيته ثمان سنين
وسطعشر شهر وألحين
يبي يرحلْ .وأنا توي عرفت الفرقْ
بين إني أكون انتَ
وبين إنك تكون آنا .
تصدق يوم شفْت الفرق
عرفت إن البحر صادقْ ..وماهْنا فرقْ !!!