بيني وبين حسين الحارثي - سهير الليل

[علي آل حسن العلوي]

هذه المحاورة كانت وبيني احد شعّار
المحاورة ( حسين الحارثي - سهير الليل )
وكانت يوم الثلاثاء ما قبل البارحه

علي آل حسن العلوي

الغلا يحسين باقي في ميادينك = لو ظروف الوقت حالت دوني ودونك
مير يا الغالي تعّوذ من شياطينك = ون نشدت الناس عن وضعي يفيدونك

حسين الحارثي - سهير الليل


الغلا مسجون من ظمنة مساجينك = لاتقول انك عطيته من يعزونك
لك سنه زايد سنه مخفي عناوينك = والله اعلم وش نويت بوسط مكنونك


علي آل حسن العلوي


حجة الغايب معك وتقول لي وينك! = كيف تبغى الناس من قولك يعذرونك
عاد لو كان الغلا ناسي مواطينك = كان ما عاينتني يالطيب افلونك


حسين الحارثي - سهير الليل

حجة الغايب معه وش بيني وبينك = هاتفي عندك وانا بعد الولي عونك
انت تاجر ظنتي كثرة دكاكينك = مير قلي ياطويل العمر وش لونك!

علي آل حسن العلوي

ماني بتاجر وظنّك شك بيقينك =ايه حالي لو تشوفه خيّب اظنونك
وانت لك يالحارثي بقلوب مغلينك = منزله بالذات عند اللي يحبونك

حسين الحارثي - سهير الليل


قدم الحجه وعذرك كان بيدينك = وكان ماعندك ترا العالم يلومونك
كيف تنسى واحدٍ دينه على دينك = من قديم الوقت واقف خلفك ودونك


علي آل حسن العلوي


ما نسينا موقعك أو ماضي اسنينك = لكن الغربة تعرقل من يهمونك
عدّني حاظر وواحد من محبينك = يا سهير الليل مدري وش يسموّنك


حسين الحارثي - سهير الليل

ياعسى ماضيك فيه يعوضنا حينك = حتى نسمح ماحصل وتسدد اديونك
كم لي احبك واغطي شينك بزينك = واسمي مقلع وابقلع لك سنونك

[مها يوسف]

الأخ العزيز والشاعر القدير
علي آل حسن العلوي
شكرا لك على نقل المحاورة الجميلة الراقية
وشكرا للشاعر العزيز
حسين الحارثي - سهير الليل
الف شكر لكما يا غالي وبالنجاح الدائم بإذن الله
جميل ما قرأت من محاورة راقية
مشكور دمتم بخير الف شكر
ارق واعطر التحايا مني لكم

[ناصر السهلي]

ماشاء الله
ابداع لا حدود له
صح لسانكم جميعا
استمتعت بهذه المحاورة
تقبل مروري
كنت هنا ومضيت

[علي سعود]

مبدعين الاهنتووو

بنتظار الجديد

[ذكرى الغالي]

سلمت يداك
وصح لسانك مدد بليااااا عدد
تقديري واحترامي
لشخصك وبوحك الراقي
ذكرى الغالي