منتديات مشاعرهم الادبية - عرض مشاركة واحدة - بعض البشر صوت الشاعر عبدالله بن علوش الهاجري وصدى مشاعري

#1 09-21-2016, 03:26 PM

قصيدة فاخرة للشاعر الجزل
عبدالله بن علّوش الهاجري القحطاني
و صدئ مشاعري

(بعض البشر ودك حدود المعرفه معهم ســـــلام)

على حســب ما مـرني ومن تجــــــارب لاولين
وجهــة نظر ويجــوز فيها الإتفــــاق و لانقسام

اترك مســــــــــــــافه كافيه بينك وبين الاخرين
بعض البشر ودك حدود المعرفه معهم ســـــلام

اصمت ولاتحرص على كثرالكلام الصمت زين
اللي سكوته ساتره يمكن يعــــــــــرّيه الكــــــــلام

واذا تكلمت احذر تكون اطول المتكلـــــــــمين
السالفه لاطولت يضعف معاها الاهتمــــــــــــام

وامزح ومزحٍ باللســــان اخير من مزح اليدين
مزح الرجال العاقله على حدود الاحـــــــــترام

اضحك ولاتضحك برفع الصوت رفع الصوت شين
من الادب والذوق عند الضحك ضحكٍ بإبتسام

واكرم وبيبان الكرم واجد ولا يحـــــــــــتاج دين
وترى الرجال إكرامها ماهوب في كثر الطعـــام

واحلم ولا تعجل ولا تغضب ولا تشــــــري بدين
وشاور ولو رايك معك لا شرت عدّاك المـــــلام

واذا شريت بدين لاتبطي على المتجـــــــــــــملين
كلٍ حلاله غاليٍ عنده لو انه مايســـــــــــــــــــــام

ولاجاك مديونك معه بعض الوفى وبعضه لحين
فأســـــــــــــــتد باللي جاك وش دراك لله الدوام

وترى التغافل فيه لذه وانشد المتغافــــــــــــــلين
لا جات كلمه توجــع اطلقها معى سرب الحـمام

وارضى ليا جاك الرضى لو العذر ماهو سمين
وترى التسامح ميزة الساده رفيعـــــــــــين المقام

وصادق واذا صادقت ماجـربت ماصادقت لين
اما يطول بك السهر والا يطيب لك المــــــــــنام

واصدق مع نفسك وتلقى نفسك من الصادقـــين
والنفس خيل ابليس لاتعطيه نفســــــــك واللجام

وليانصحت انصح خفى لاتفضحه فالحاضرين
ترى الرجال يقودها لين الحكي قــــــود الخطام

ولا اتواضع في حضور العالم المتكـــــــــبرين
تكلم بنفس الطريقه معهــــــــــــم ونفس النظام

واخلاقك وتواضعك عامل بها المتواضعـــين
ونصف الادب مجامله جامل ولاتجـــامل لئام

واذا تسولف عن طموحاتك مع المتفــــــرغين
كنك تسولف للنصارى فالحلال و فالحـــــرام

والعمر ماهو فرصةٍ وحده ولاهـــو بفرصتين
مع كل مطلع شمس لك فرصه وخطوه للامام

هذا ولازلنا تعلمـــنا الليالي والســـــــــــــــــــنين
والعلم اخِير من الجهل والنور جـلاي الظـــلام.

عبدالله بن علوش الهاجري

--------

صدي مشاعري

حيّ الجــــزيل الوافي الترف المعاني و الرزين
من نايف القاف المصفّى معتلي راس الســـــنام

يا مرحبا تعــــــداد منهم للإله موحّــــــــــــــدين
وعدادها أفـــواجً تطوف بداخل البيت الحــــرام

وانا على ما مرني منها علوم الســـــالفــين.
ومن تجارب دنيتي في كل يوم و كل عـــــــام

خلك قريب من القـــــروم الكايفــــين الوافـــيين
لن البشــــر ماهم ســــوا والطيب مرباع الكرام

بالمعرفـــة ســولف وخلك في صفوف الأولين
لن الإفـــــادة مـــا تجي لا من سكت كل الأنام

هرجـــك عناوينك معه علمك يزين او ما يزين
ان زان زنت ولا هفى هرجك على الدنيا السلام

و مزحك حــــدوده لا تعدّى منطقك علمك يشين
مزح الرجــــــــال العاقلة ماهو مثل مزح اللآم

وأطلق حجاجك وابتسم بالبســـــــمة القاسي يلين
لنّ العْبوس بوجه اخوك المسلم اجحاف و حرام

واجزل سخاك و لا تحاول تســـــتعير و تستدين
الجـود من ماجودك وجودك لضيفـــــــــانك لزام

للحلم ميزانه وحذرااا بالمراجل تســـــــــــــتهين
واَخــــذ المشــــورة من خيار الناس للعلم التمام

ولا تشــري بدين وتهاون في ســداد المقرضين
أوفي حقوق اللي تجـــــــمّل لوحقوقه خيش خام

ولا تعسر اللي استدانك وان تأخــــــــر بالمدين
رب البشر فرّاجها واحــــــذر إلا ضمته تضام

لا لا تدقق في هروج العالم و تمـــسي حــزين
بعض الهروج ان فجتها ما يلحقك غير العـدام

و خَل الرضى نبراسك ومنهو خطى لا لا تهـين
خَل التســـامح عادتك وارقى على هام الغمـام

واختر صديقك بالتأني واكســب الشهم الأمين
لا تتّبع غير الصدوق الوافي الحــــــرّ القطـام

ولا تختلف مع نفسك و خلك صدوقً تستكــين
معها و صادقها تشـــوف العاقبة برد و سلام

وخَلّ النصيحــة ديدنك والســــامية للمنصحـين
ولا تحـرج اللي تنصحه بين الملا .كي لا تلام

وجــنّب دروب العــالم اللي دوم اهم متغطرسين
خل التواضع نهجك و جنّب عن دروب الرخام

بأخلاقك و تواضعك تكسب جمـــيع الجالسين
يسمو سمــوّك بالأدب بين المشـــايخ و العوام

ولا لا تسـولف عن طموحاتك بفوج الفارغين
ما يجلب الفارغ ســـوى كثر الفوارغ للمـــهام

وأغنم حـياتك بالتقى و ازهى بهــــا دنيا و دين
واكسب رضى ربك تلاقي راحتك دوم و دوام

واجزل تقاك و خالق الدنيا إلاهك لك معــــــين
بيصخّــر دروبك وتلقى خطــوتك دايم أمـــــام

هــذا وتمّت بالولي الله رب العالمـــــــــــــــــين
صلّوا عليه المصطفى والف التحـايا بالخـــتام

ماجد بن رتيق

ساعد في نشر والارتقاء بنا عبر مشاركة رأيك في الفيس بوك