مساجله بين العريني والحضبي
قال الفليج العريني السبيعي

يا مرحبا ترحيبة(ن) فوق ترحيب=للي سعى للمجد في كل شان
أبو سعد شيخ(ن) كثير التجاريب=راعي الخصال الطيبه و المعاني
شيخ(ن) سما بالعلم قول(ن) بلا ريب=سليل فخر(ن) من قديم الزماني
من لابة(ن) زادت على الناس بالطيب=طابت و طبت يا عريب المجاني
أهل الكرم و البذل عند المواجيب=ذباحة الحايل كبارالصياني
أحلى من الدرّ لى صاروا معازيب=و عند الوغى سيف(ن) صقيل(ن) يماني
من لابة(ن) شامت عن النقص و العيب=كل(ن) شهد لسبيع أهل الحساني
يشهد لهم راكان و يشهد تريحيب=و يشهد لهم تركي و شيخ قحطاني
و الخالدي يشهد عطيب المضاريب= و أهل الجبل و اقصى الجزيره و داني
عدوهم ما ذاق صافي المشاريب=نار(ن) يصاليها بطعن السناني
من حربهم قاسى شديد اللواهيب=شاف المذلّه حاصله بالعياني
اجروحهم تبغى علاج(ن) و تقطيب=و نفوسهم بعد المذله تعاني
قبل الهزيمه هم بروس الشخانيب= بعد المعزه صاروا وسط الطماني
و آخر كلامي حامد(ن) عالم الغيب=من يحمده يلقى عظيم الجناني

ورديت عليه بالأبيات التاليه :

أهلا هلا ياللي كتبت المكاتيب = سعد الضعيف اللي من البعد عاني
الشهم راع الجود مروي المطاليب= راع المواقف والعلوم الزياني
ذخر الرجال اللي تروي المغاليب= النادر الوافي عزيز الخواني
أفخر بمجدك ياحصان الاطاليب = اللي على الفزعه مهوب امتواني
وافخر بطيبك فوق روس المراقيب = وأرفع لك البيضاء من أعلى مكاني
يفداك من كثرت عليه العذاريب= ويفداك شخص للكرم مايداني
مني تحيه يامهدي الأصاعيب =وأزكى سلامي يالعريني تهاني
يابو عمر لك في المواجيب ترتيب= لا قالو ابن فليج في الطيب باني
تعيش ياراع الشكالات يا ياذيب= وتسلم ياراع الجود أول وثاني
واللي تقوله صادق فيه وامصيب = سبيع المكارم هم اطوال اليماني
عز الخوي والجار ستر الرعابيب=أهل الكرم وأهل العلوم الثماني
في المرجله تفخر بحظ ومكاسيب = أهل الوفاء عز الخوي والعواني
رجالهم ماله عن الطيب تجنيب=في المدح والتقدير يعجز لساني
أهل الخيول اللي عليها دواليب= واهل النياق اللي عرابن اسماني
وأهل المغازي بالسيوف المحاديب= واهل الدروع اللي لها عنفواني
أقبل من الحضبي سلامه وترحيب=وأختم كلامي.. قول سبع المثاني

أخوكم عدالله الحضبي السبيعي

ساعد في نشر والارتقاء بنا عبر مشاركة رأيك في الفيس بوك

ماشاء الله

بحق انت مدرسة

ننهل من فياضها

اعذب القصيد

يعطيكم العافية

ولكم خالص الود

اخوكم
علي الحزمي

سلم النبض والحضور
حرف مترف بلا منازع


تقديري واحترامي

شعراء بمعنى الكلمة
ومبدعين بحروفكم
محاورة جميلة دمتم بخير
مشكورين

اخواني العريني والحضبي
أسعد الله مسائكما بكل خير
شعراء شعراء شعراء ..... وهنا المتعة الشعرية
شكراً لكما على ماقدمتم لنا من الشعر الرجوووولي البحت

بحر التحدي

ارحب يا عبدالله ارحب ارحب


صح السانك مدد ماهي بعدد وصح السان العريني


ونيابه عن بني هاجر كفو يا صبيان سبيع الغلبا وعزالله اني خاويتكم ونعم الخوه





تحياتي لك

محاوره رائعه
بل اكثر صح لسانكما مدد بلا عدد
احترامي وتقديري لشخصكما وبوحكما

صوت وصدى من نوع فاخر الحقيقة

فصح الله السنتكم جميع