الحب عله والمصايب ورى الحب=والقلب عله ما يبي غير عله
لا هو مريحني ولا هو يبي طب=كنه مليكٍ ظالمٍ دولةٍ له
ودع وخلاني على وادي السب=الشكل عاقل والعقل فيه خله
هذا يعاتبني وهذا تعجب=وهذا يحاسبني على كل زله
صار الكي مثل المطر فوقي انصب=الين خذت من الحكايا مظله
مسامعي قفلتها عن هل الذب=وغمضت عيني لا تشوف المذله
ياللي لفاك القلب يشكي وينحب=بالله رده كان ما انت بتشله
ترى عيونك هي سبب من تعذب=جنه وسطها سجن من جا, محله
قلبي يبي الجنه وفي سجنها انذب=والسجن لغزٍ ما عرفنها نحله
لو مات قلبي لا تقل من تسبب؟=عندي على عيونك جميع الادله
ياللي جمالك سارقٍ ما تهذب=انا اشهد انه دولةٍ مستقله
ارحم عيونٍ دونها النوم غيب=ودمعٍ تحير بالجفن ما تهله
جمرة خفوقي كلما طاريَك هب=تنثر شرارات الغلا فيه كله
اشكي عليك الحال يالله يارب=قلبي مريضٍ وانت سترك دواً له