يا عيونـي مـا غشــا شوفــي شحوب=ولا كتب لي ربـي عن طيشك أتوب
ولا نهانــي عقلــــي الفـــارع ذكـــاء=عــن مجاراتــك علــى درب الذنوب
ولا رحمتــــــي قلبـــــي اللـــي تبتليه=نظرتك والموت زاهـي بكل صـــوب
أستمــد العــزم مـــن بعـــض الخيـال=وأدعي ربي لا يجـي صوبـي هبـوب
يرحــم الرحمــن مــــن حــر الثلـوج=ومن برود الجمـر غضــات القلــوب
يستعر فيني مـــن اللـــي بـــي لهيـب=شعرة(ن) مابين صبري وبين أذوب
صك باب العقــل فـــي وجهــي دلال=وإزدحم صـــدري سخافـات وعيوب
صرت أطارد بالنظر ركـب السحاب=اللي في عيني مع الروعـــه يجــوب
واللـــي بالرقـــــه يمشّــــيه الهــــدوء=وقتها أصبــــح معـي طيشي وجوب
وكل ديمه ترقـــص بنبضــي جنـون=وكل نبضه تعلن بطهــري غـــروب
وكـــل خطـــوه تقتلـــع منـــي قصيـد=وكـــل قريحــــه تنشط بوقع الكعـوب
وكـــل شاعـــر يستثيـــره مـــــا يثيـر=ما خلقنـــا الله مـــن أصـــلاب طوب
ولو تفرّعن عـــود متـــرف بالجمـال=وإستمــال ومـــالت الريـــم اللعـــوب
ينتهــــي ليـــل ويجي صبح(ن) مثير=وتنشـــب الأطمـــاع وتشب الحروب
والبيــــاض اللــــي تشابــــك بالسواد=يجبــــر العاقــل علـى عـوج الدروب
كنــــت أقــوى مـــن هدوئي فالزحام=وصـرت أقوى مـــن لجوئي للهروب
وما تزعـــزع ثقــل شعـري من قليل=شفت موتـــي مـن شمال ومن جنوب
وما ترعـــرع فــي أحاسيسي جموح=غير مـن صكـــت على قلبي خطوب
والتـــوام اللــــــي تصـــدن للعيـــون=تنجلــــي فـــي شوفهـن كــل الكروب
شفــت فيهـــن للرهف حوض وسبيل=واقع(ن) واقع علـــى مثلـــي كـذوب
لــــو تلاقن يجتمــــع مــوت وحيـــاه=ولــــو تفرّق شملهــن حرب الجيوب
إنبهــــــار ومنعقــــــد فيـــه إنبهـــار=إختبــــار وفيــــه أبشــــر بـالرسوب
يا قصيـــدي قلبــــي المتعــــب كفــاه=هالعذاب اللي زهى فـي كـــل صوب
لا نهانـــي عقلـــــي الفـــارع ذكـــاء=ولا غشا عيني عــن الشوفـه شحوب