مشاركتي في حفل وملتقى القبيله

مرحبا والفين مرحب كـل طـرق ومستمـده=من خيال ٍ ماوقف حد الثريا يـوم اديـره
مرحبا والفيـن مرحـب والقوافـي مستعـده=حولت لي يوم حـول بالفـرح يمـي بشيـره
مرحبا والفين مرحب يابشير الحفل وده=غرَّد المعنى وغرَّد في سماي اليوم طيره
مرحبا والفين مرحب باسم ربعي جيت أمده=نفحها ريح البختري والخزامي مـع عبيـره
مرحبا والفين مرحـب من بخور العود أرده=للحضور بْدون لاتفرق كبير ٍ عـن صغيـره
مرحبا والفين مرحـب لـو نظمناهـا مـوده=والله انـك ياهجوسـي وافيـه لكـن فقيـره
في حضـور اللابـه اللي لو نعد اللـي نعـده=ماوفينا حقهم في ماضـي الوقـت وهجيـره
مكرمين الضيف مروين الحدب فوق الاشـده=يوم كل ٍ من هجيرالوقت يشعب فـي بعيـره
يومهـا مابـيـن رد العـلـم والا لاتــرده=من غفت عينه فلا يدري بْ باكر وش مصيره
كبـد يسقونـه زلال وكبـد لـه كـفٍ تقـده=كم هنوفٍ من ورا صوت الرمك تنعى عشيره
كل عايل دونهـم كانـه طغـى يلقـى مـرده=من سلم من نارهم لاماسلـم مـن زمهريـره
يستحقون الثنا حـق ٍ علـي لاجيـت اعـده=وش حداهم غير وقتٍ مارحمهم مـن سعيـره
يرحم الله ماخـذت ذيـك السنيـن المستبـده=عودت من رحمة الله كل علـم ٍ فـي جفيـره
مانفاخر والفخـر كانـه بـدا الـلازم يسـده=حاضرٍ يسبق محط اقدامنـا فـي كـل ديـره
حاضرٍ نفخـر بمثلـه ماجهلنـا ويـن حـده=هو ورا شبه الجزيره أو على شبه الجزيـره
في محطـات العلـوم وفـي مناراتـه ومـده=واقع ٍ ماجيت اغني به وانا عينـي ضريـره
ماخذينه في مـداره عقـب ماهـي مجرهـده=مارضينـا بالقليـل ولااكتفينـا مـن كثيـره
ماعرفنا مستحيل وكـل عـزم ولـه نشـده=نشرب الصافي من عقول الرجال المستنيـره
لين ماصرنا بعين الشاربـه فيضـه وسـده=مثـل ماحنـا بعيـن المقبلـه نبعـه وبيـره
من حسـب للمستحيلـه حالـفٍ مابـل يـده=ومن يخايل للطويله يخطـف الغيـم باثيـره
ان طلبنا مانبـي غيـر الثريـا هـي وخـده=وان عشقنا مانِعَشْق من السحاب الا هديـره
يانجي جيَّت هذاك اللي ينومـس فـي مهـده=اوعساها هالحياه بْ بـارد اليمنـى قصيـره
كف ماهي حزة الماقف تجي وتكـون قـده=لاحرام ان الحدب اولى بها مـن دون غيـره