الموت لا طاحت عيونك على شي = قريب من كفك وفي كف غيرك
مثل السحاب الممتلي فالسما مي = ترجيه لكنك تموت ابهجيرك
كن المنايا تقبل اشوي ٍ اشوي = والعيس حاديها تعدا بعيرك
ياسيدي بي صرخة ٍفيني اهني = ماكنها الا هي نهاية مصيرك
وشلون ابديها وهي نشوة الغي = وحب ٍ بلا ونه ابد مايثيرك
وان جيت اخفيها كوت خاطري كي = والجرح يقواني واقوم استجيرك
كل الدروب اتقابل الحي بالحي = الا دروبك يم غيري تسيرك
عن كل زول اقول ذا زولها هي = والى تبدى ماتهيا بشيرك
عطرك يفوح واتبعه لآخر الحي = واشاهدك لكن غيري عشيرك
واقول اجوز وعلها خيرة ٍ لي = هذا مصيري وانت هذا مصيرك
واشب ليل الياس في غيبة الضي = في بطن حوت وياقمر بستشيرك
لاطاحت اعيون المحبه على شي = قريب من كفك وفي كف غيرك
تفنى انتظار او تقطع الياس ياخي = احترت انا ياعلها ما تحيرك