( آخر قصيده قلتها قبل اوادعك )

بآخر قصيده قلتها قبل اوادعك=لاتحط قلبك عند شخصٍ يبيعك
شفتك مثل زمزم وقلبي منابعك=لا طافوا الحجاج ربك شفيعك
دعيت من رب الملا مايضيّعك=ومن الفرح يهناك زهرة ربيعك
اسأل شفاتي لو نستني اصابعك=حبّت دفاك ولا درت عن صقيعك
لو هي قرادة حظ يمكن اتدلعك=والا الزمن والوقت عيّا يطيعك
طبعّك وقتك والزمن لويطاوعك=خلاك عقدن كاملٍ من جميعك
من جوهرك مخلوق محدن يلمعك=غيرك وتقدر تجتمع من قطيعك
لولا غلاتي مابكني مدامعك=ومواقف الدمعات تذكر صنيعك
وصنايع المعروف تبقى واسمعك=لا طافوا الحجاج والله شفيعك
شفني مثل زمزم وهذي منابعك=لاتحط قلبك عند شخصٍ يبيعك

بحر القصيد~

( يامملكة عشقي ودولة غرامي )

انتي شموخك ورث عمك وخالك=لو أستعاروا شامخين الأسامي
يابنت عم اللؤلؤه كيف حالك=آسف غلط تصوير فكرة كلامي
كم لؤلؤن تشريه عادي بمالك=رزّه مثل تقليد شاعر وسامي
يابنت عمي والردى ماينالك=ياانقى من غيوم المطر لك سلامي
اعشق كلامك طيبتك وانفعالك=لامايهم لوكان تزعل عمامي
اهم حاجه بس مااقطع وصالك=لو عشت اجدف في بقايا حطامي
غير البشر مخلوق طينك لحالك=يامملكة عشقي ودولة غرامي
سمو ذاتك كبريائك دلالك=لجيوش حبك قلعتي وانهزامي
تدري وش اللي ميزك في جمالك=جمال روحك في محيط اهتمامي
يالكوكب الدرّي بأعلى مجالك=لو كثرة نجوم السماء في ظلامي
انتي شموخك ورث عمك وخالك=لو استعاروا شامخين الأسامي

بحر القصيد~

( صدر الشماال )

مثل الجبل خلك مع الوقت راسي=قمة شموخك تعتلي وجهة الريح
لاهنت يانبضي ولاهان راسي=لو ساحة الشعار كشخة مسابيح
رقيت في ضلع القصايد حماسي=من نجمة الشعرى تشب المصابيح
بين الأمل واحساس جرحي ويأسي=لاتنكسر ياساق حظي ولا تطيح
عفويتك في راس رجم المآسي=صدر الشمال اللي وقد نبتت الشيح
بيني وبينك يالجبل ماانت قاسي=لوكنت قاسي مارقوك المجاريح
خلك كذا مثلي مع الوقت راسي=مازحزح احساس الجبل عاتي الريح

بحر القصيد~

( تقلط معي وتخون )

تاكل معي وابغاك ترفع اردوني =ماخنتني مادام تذكر وفايه
اطلب عيوني طيب تاخذ عيوني=تقلط معي وتخون هذا بلايه
كان الخطا من طيب طنخة جنوني=ابقا كذا مجنون ماهو خطايه
خطا الخناجر باالظهر تطعنوني=واكبر خطا ماشفت غدر اقربايه
هم محزمي هم وقفتي لوبغوني=وقت الرخا والكل حولي معايه
قدام حد الموت لو وردوني=والا البحر من خلف يصبح ورايه
شاب الزمن في عارضه واخذلوني=غيم(ن) تكشّف وانجلا عن سمايه
لايازمن مشكور فعلاً عطوني=درسٍ بوقت الضيق يبحث خفايه
مااسجد لغير الله واتبع ظنوني=لكن مع السجده ورى كل آيه
ارفع يديني للولي واسمعوني=الله يجازي غدركم بالهدايه
لو مانزفت الجرح ماتكتبوني=ولو ماكتبت الشعر ماابغا الروايه
بقوم أغسل كملوا واعذروني=هوى الشمال ان خان ماهو هوايه

بحر القصيد~

شيهانـةٍ مـاهي عـلى كـف صقّـار الا معي وانـا لهـا مـاعـرف غـيـر غير العيون اللي خذت قـلبي وصـار يكـفخ جـنـاحة بالمـحبه تـقل طيـر بحر القصيد~ . . . مابين قطبين الخفوق وكلامك قلبي ماهو فولاذ من كتلة احساس مدري وش الرابط ولكن امامك الصق على روحك تقل قطعة ألماس وادخل حلال الحب ماهو حرامك واشرب نخب حبّك ولا آحرّم الكاس لو شفتني وشلون حتى بمنامك ماطبّق رموش السهر جفني نعاس طارت قطاه ولا تحرك حمامك متذرّيه عودٍ(ن) خضر ماهو يباس وافك برقع كل حر بمقامك مستوحشٍ يبغا يفكّه عن الراس ولا الآقي غير زود احترامك وكفي وكر شيهانةٍ حر قرناس مابين قطبين الخفوق وكلامك مدري وش الرابط ولكنه احساس عطني من الذرّه جزيء بغرامك واملا لك الدنيا محبه مع الناس بحر القصيد~ . . . والله انك في حياتي كل شي وكل شيٍ في وجودك لي حياه ياتاج راس الحب مالك شبه زي لو اربعين من الشبه يخلق الله بحر القصيد~

( فزعة شمالي )

لو فيك ذرة وايلي هب ريحه=وكتف الحميـّا دخنت فزعة رجال
رجلٍ يدسم شاربه في ذبيحه=ورجلٍ يدسّم شاربه عشرة جمال
لو كل سرن بالخفا لك نبيحه=شرهة عرب ماهي شريحه وجوال
بس البلا لاشفت كل الشريحه=ماغير تستقبل ولا تقبل ارسال
تلقى القلوب الفارغه مستريحه=وتلقى الحقود اللي شحن واقع الحال
هذاك احشـّم جلستي عن نطيحه=وهذاك رجلٍ تشتري خوته مال
واللي حطب ضلعه ولا شب شيحه=راس الشمالي فزعته ترمي عقال
موت العديم بطيحت السرج طيحه=لو ماستر في فزعته طيحت الشال
مااقلط على المترديه والنطيحه=للضيف حشمه والعرب والمثل قال
أمس برحولك تشتري لك نصيحه=درهمت وضح ٍقيدوها بالأمثال
ومن دخنت كتفه ولا هب ريحه=لاتقلطه لعيون حصه مع رجال

بحر القصيد~

( من موطن الغربه )

بسم الغلا بسم اللقاء بسم الاشـواق=وبسم المحبه والـوفا والمـشاريه
وبسم القصيد اللي ملك سحر الأذواق=ترحيبة الغالي على شوف مغليه
مـن قـبل قرص الشمس ينزل بالآفاق=ذيب ٍعلى رجـم القـصيده مساريه
لـجّـة عليه ضـلوع صدري والأعماق=واليا سمعت الصوت جيته مخاويه
ياذيب صدري من عـنا الوقت ماضاق=منازل الحاضر على أطلال ماضيه
كان السفر قطعة عذابه بالاوراق =واللي حطب سطح السفينه غرق فيه
صب الجـنون بـكاس عـقله ولا فـاق=ولا لقى بـين الـبشر مــن يصحيه
من موطن الـغربه عـلى مـوعد فـراق=ومن اصدق وعود الـغلا يـوم الاقـيه
والشعر شيخ ٍ مابنى لـبيته رواق=ياحظ منهو بـيت طـيبه مـذريـه
واللي ملا عين الـرجا بـين الاحداق=لامـن ذكـر وقـفات عــز لبنيخـيـه

بحر القصيد~