ساعد في نشر والارتقاء بنا عبر مشاركة رأيك في الفيس بوك

للشوق في نفسي مسافة بعيدة=
=ولك يامشاعرهم بلا حد ويزود

جيتك وانا كلي معاني فريدة=
=وحبل الوصل من شانكم دوم ممدود

في غيبتي كني الحالي وحيدة=
=وحيدةٍ والقاف ضايق وملهود

ايوالله انك يالمشاعر فقيدة=
=يالله عسى صرحك على الدوم موجود

نبع الوفا عذبٍ وحلوٍ وريدة=
=مهما شربنا منه مانبدي زهود

وربانه اللي كاسي المجد جيدة=
=مرباه دار العز من كان مولود

من ينشد التاريخ يلقى الوكيدة=
=كنه مصّوت بالعشا راعي الجود

ماجيت اوضح قيمته في قصيدة=
=والطيب نهرٍ بين الأجواد مارود

عن الردى نفسه عفيفة زهيدة=
=دعيت له باعداد ماذع ذع النود

حياك يانور الديار وسعدها = نسجد شكر لله يومك تعافيت
كن السما تبرق ونادت رعدها = وكن الزهر في خطوتك قال حييت
والمملكة في قومتك يااسدها = قامت وفا لك يومك بحقها اوفيت
مثل العروس اللي تسير بوحدها = نافت دلال واسمها ذايع الصيت
يابوي ياعز البلاد وسندها = صحيح انك والشهامة تخاويت
اخذت من صحبة نبيك شهدها = عدلت له وامنت نمت وتغاظيت
عذبة زلالك كل شعبك وردها = اعطيت واكرمت وسخيت وله ارضيت
الام لجلك ارخصت في ولدها = يقوم لك بيت وينهد لك بيت
خضت الدروب اللي صعيب جهدها = خطوة ورى خطوة وللمجد عليت
لو نحسب كرام الفعايل عددها = ماينحسب اتعب ولاني لك اوفيت
كل المثايل يوم شخصك حصدها = نعطيك حب وانت من طيبك اعطيت

على متن الفراق اللي كتبة الله بدون اسباب = سبحت ارسم على موج الخيال حروفي الخجلى
وانادم هالقصيد اللي بقى لي من كثير اقراب = خذتهم هالحياه بغمظةٍ من ناظري عجلى
واجامل وابتسم وامزح وانا قلبي رماد حطاب = عسى زيف ابتساماتي لحزنٍ داخلي يجلى
عطيت وماخذيت إلا الصدود وجفوة الأصحاب = زمانٍ فيه ادنى ماخلق ربي هو الأعلى
جمعت احلى عناقيدي وفا واتفرقت أحزاب = الين الوقت ماكّسر قواها واختفت وجلى
وذبل ورد الصبر فيني على سكة غشاها غياب = لو استسقيت تمطرني رجوع وينبت الأهلا؟
عيونك كيف ماحنت ولاقلت الوفا غلاب = عشقك الحرف وابيات القصيد ولاقدر يسلى
وعشقك الليل لامنه يجن ويلتقون احباب = وعشقك الصبح لامنه تنفس وابتدى يحلى
وعشقك الغيم لامنه تراكم واعلن الاضراب = تذوب الشمس في باهي صفاه وجوها يخلى
تبعت الظن بالدنيا الين الظن فيها خاب = وعرفت إن المباديء سهمها مكسور مايغلى

ماتغازل عيوني غير شم الجبالي = صرت اشوف ان حلمي من عيوني ازف

جيت برسم على صخر المعاني منالي = يوم روحي جمال الشعر فيها رزف

اذكر الله حينٍ يوم جاني مجالي = واوصف شعور ماضي فيه قلبي نزف

وكل ماهزت الذكرى لواعج خيالي = صار نزفٍ على اوتار المشاعر عزف

احتمي بعز ابوي وطيب عمي وخالي = ولاسكنت القصور ولاشربت بخزف

ويكفي اني عزيزة نفس واوزن مقالي = وانظلمت بزماني دون ذنب وجزف

اعشق الشعر واحبه ولاني ببالي = وكم خذته الرياح وعن عيوني هزف

وكم بكيته وكنه واحدٍ من عيالي = وكم جفيته ولامني ندهته وزف

واكبر احلام نفسي ارتقي للمعالي = وكني اشوف حلمي من عيوني ازف

رزف = الرزف هو الصوت المرتفع .. ورزف الأمر أي قرب

جزف = ظلم ويقال جزاف ايضا

هزف = هزفته الريح أي حملته واستخفته

وزف = أي اقبل علي مسرعا بخطا متقاربة

يشتكيني للزعل واشكي عليه = شوقي اللي في غيابه ماهدا
لي خفوقٍ كل ماابعد يجيه = صادقٍ في حبه لأخر مدى
كل ماصديت نادا الشوق هيه = لايضيع الحب في عيونك سدا
أجمعيه ودثريه وزمليه = ماأسامح خافقك كانه غدى
من رحيق الورد هاتي واطعميه = وإن عطش أسقيه من قطر الندى
وكل دربٍ للحزن لاتسلكيه = دام نبضك جنب نبضه يسعدا
إن بغيتي فوق بالجو أرسميه = طايرٍ حرٍ على وكره بدا
السنين تصدني وأرجع عليه = صوت نبضي بالحنايا له صدى
والحنان اللي ربى فيه وعليه = في غيابه باعذب الحانه شدا
كيف أنا اشكيه ليه وأشتكيه = دام هو كل الخبر والمبتدا

شكرا الشاعرة الأصيلة على التصميم

مساء الخير من عمرٍ تعبت استنفره لرضاك = شمالٍ دربي ودربك جنوب وحلمنا ضامي
عقب ماكنت اظن اني نسيتك او بغيت انساك = اشوفك عثت بدروبي خيال وسقت الهامي
تعود احلى تفاصيل الغلا لاسلهمت ذكراك = وانا المفتونه بذكرى تجدد لي مع اعوامي
ثمان سنين تدفني ورود واستقيك اشواك = وثمان سنين تلويني ذراع ٍبالوفا سامي
الا يالماضي اللي ماكذبت إن قلت انا اهواك = ولكن بي جروح ٍماتعافت كنها وشامي
وفلذة كبدي الي يشبهك في ضحكك وممشاك = اشوفك في عيونه طول وقتي وانت قدامي
تضارب داخلي كل المشاعر لاحضر طرياك = واتمتم في حروفٍ مبهمة واشد باكمامي
واغمض بالنظر لايلمحك فيها هذيك وذاك = وانا اللي كنت اقول انك ابد ماجيت باحلامي
واكابر واطوي الصفحة واكذب وادعي جفواك = وانا اللي ماجفيتك لحظةٍ يامصدرالامي
ثمان سنين ماكن الثمان استوحشت لقياك = وايدك كيف ماعادت تحن القبضة لجامي
تصور كل هذا دار في بالي وانا القاك = ابد ماهو غلا لكن وفا محفور بايامي
ترى مالك بقلبي غير ماضي حن ليك وجاك = مثل طفلٍ شرب ناسي في اول يومه صيامي

ماتت مشاعر وانتهى صافي القاف = منهو يقول اني كتبت القصايد
ومن قاله ان احساسي الشخصك لحاف = والحرف يغزل لجل عينك وسايد
وانك غفيت بصحوة النون والكاف = واهديت لك من عذب شوقي فرايد
واني جعلتك كامله فيك الأوصاف = لين البشر زادو علي النقايد
صارت تعابيري على هاوي الحاف = تطيح ولا تحتمل للشدايد
راح الزمان اللي لك القلب ميلاف = انا وشعري والوفا كان سايد
نبحر على متن الغلا دون مجداف = مجدافنا حلو النبا والوعايد
كنت انتخيك بعالي الصوت مااخاف = سلكت في حبك طريقٍ محايد
واثر المشاعر بعدكم نهرها جاف = صرنا انا والشعر ضد وضدايد
حاكم وحكمك جاير وفيه اجحاف = قفيت ماظنك مع الوقت عايد
خبرت قلبي في مرابيعكم طاف = وعّود ولااظنه محصل وكايد
رابع سنه والشوق من بعدكم عاف = كل الحكي ماظن منه فوايد

ياليتني له اعز الناس وأقرابه = تلقاني بكل خطوة جيت خاويته

الشوق له زايدٍ والروح منصابة = تجدد النبض في قلبي وحبيته
وقفت جنب القمر واسدل لي حجابه = حكيت له قصتي للصبح جاريته
حلمت حلم ٍ ووداني على بابه = قادتني الرجل لين الباب طقيته
واستنفرت بي عيون الريح رعابة =ترسم على الرمل قصة حب داريته
امر القدر يوم ساقة يمي وجابه = طفل ٍ ينام بدفا صدري وربيته
يوم ٍ كبر يعصي امة واقرب اللابه =ويمشي على درب ياما عنه ناهيته
ارخيت لليل سمعي لين هلابه =وعديت نجم السما حتى اني احصيته
وجمعتها في يدٍ بالحيل مرتابة =وربطتها في شرايط حب واهديته
واخفيتها عن عدو القلب واحبابة =اخاف من عين حسادي وداريته
ياما عيونٍ لخافي البال مغتابة =الين مالحزن ساريته وماشيته
واليوم حتى الحزن ماعاد هو آبه =يمشي على النار لامني تعزويته
ارحم من اللي لضيق الناس جلابة =تموت تقرا وش بقلبي انا اخفيته
بيدين ربي ثواب الخلق وحسابه =عليه اشكي همومي كلما جيته