فصائد رثاء في الشيخ
مناحي بن ناصر الصندلي السبيعي
بنك سبيع رحمه الله
توفي يوم 27/ 2/ 1440
وهذه قصائد مختاره في رثاه رحمه الله وغفر له

قال الشاعر عبدالله بن سعد الحضبي السبيعي في الفقيد :
الفقيده يوم تطرون الفقيده.
الفقيده راح ابو ناصر مناحي
راعي الفزعات والاريا السديده
وفالكرم والجود لابسْ له وشاحي
له مزايا نادره جزله فريده
هو فقيد المرجله واهل الفلاحي
وله مواقيف ومعاريف عديده
طاح فعل المرجله من يوم راحي
تبكي سبيع الوفا شهمٍ وليده
ساعد اللي زاد همه والجراحي
كم دفع للخير من غالي رصيده
وفالجمايل فعله بكل النواحي
ياعظيم الشان يارازق عبيده
ترحم اصل الجود ابو ناصر مناحي
عبدالله بن سعد الحضبي السبيعي


وهذه ابيات للشاعر غانم بن نوار المجمعي السبيعي
في الشيخ مناحي بن ناصر الصندلي
الله يحسن عزانا فيك يامناحي
يالشايب اللي جميع سبيع يغلونه
انا اشهد انا فقدنا درع وسلاحي
مزبان من صكة الايام من دونه

وقال الشاعر ناصر بن دليقم السودة السبيعي
في الفقيد مناحي بن ناصر الصندلي
تبكي على مناحي مواريث الابطال
اللي لها في صرح الامجاد نوفه
مرحوم ياللي للصعيبات حمال
لا صعبة الدعوى تبين وقوفه
مروض نفسه على زين الافعال
ومن الوفا والجود تندا كفوفه
عسى لها في جنة الخلد منزال
روح على زين الخصال معطوفه
آمين يامنزل تبارك والانفال
وال العباد وكلبونا ضيوفه
ناصر بن دليقم السودة السبيعي

وقال الشاعر زامل بن الحميدي المجامعة السبيعي في ابيات خص بها بنك سبيع
سلام يالوافي كثير المنافيع
يادرع ربعك من جميع النواحي
بنيت للغلبا صروح ومشاريع
من حر مالك وانت أساس النجاحي
سبيع تفخر بك وتبدي بك الريع
من العفيرية لوادي رماحي
قول وفعل ماهو دعايه وتلميع
والمدح واجد وأنت فوق امتداحي
مير الكلام اللي سمعته وقد ذيع
وجهة نظر فيها يبين اقتراحي
مانته ببنك سبيع يامجمل سبيع
بنك القبايل كلها يامناحي
زامل بن الحميدي السبيعي

وقال الشاعر سيف بن راشد بن تركي الصندلي في بنك سبيع رحمه الله
وين انت ياللي من عنى الوقت مضنوك
ولا ذاقت عيونك لذيذ المراحي
حتى اقرب العالم لك اليوم خلوك
ونظراتهم في القلب مثل الرماحي
تشكي من الدنيا بملفات وصكوك
وليا قراها واحد ماستراحي
ابشر بارادة من له العرش مسموك
همك يزول ليا وصلتوا مناحي
ساعد في نشر والارتقاء بنا عبر مشاركة رأيك في الفيس بوك

وقال عجلان المكاحلة في أبو ناصر

صكات بقعا تخالف بين يوم وليل
لكن دارت وجابت صكة في الصميم
نرجي من الله منشي مردفات الغيوم
ينزل على قبر ابو ناصر سحاب وغيوم
مناحي اللي يعرفونه قرابه وقوم
يسعى لفك الرقاب ولا تكلم حكيم
يوم بعض العرب ممايحوش محروم
كم فك له من سجين وكم كفل من يتيم
وانا احمد الله عياله جو شيوخ قروم
هقواتهم فوق فوق ومشيهم في السليم
واختامها جعل ابو ناصر ليا جاء يقوم
في جنة الخلد منزاله ودار النعيم
عجلان بن دحيم المكاحلة السبيعي
شواش سبيع

الله يرحمه ويتجاوز عنه ويسكنه فسيح جناته
واحسن الله عزاكم
وصحت السنتكم

وقال الشاعر عايض البيرق في ابو ناصر رحمه الله
لا والله الا راح ذرب اليمينا
قضاي حاجات العباد المناويخ
لا والله الا راح ذخر السنينا
ركن لنا مثل الجبال الشواميخ
لا والله الا راح شوق الثمينا
منوخ كل الصعيبات تنويخ
لا والله الا بين الحزن فينا
في اكبودنا من فقدته حامي الصيخ
نبكي على مناحي ابد ماحيينا
نبكي وتبكيه الرجال المطانيخ
ياالله يامكرم نزل الاكرمينا
اكرم نزل من رسخ الطيب ترسيخ
عايض البيرق السبيعي