يازارعتني في دروب الشوق والعشق الـرؤوم
يامرويتني من احاسيس الغـلا حتـى النخـاع


ياساكنتنـي فالمنـام وقبـل انـام وبعـد اقـوم
يامالكتنـي بالملامـح والسوالـف والطـبـاع


ليتك لمحتيني وانا مكسـور خاطـر ومهـزوم
بعد اقلعت طيارتك والدمـع بعـد العـز طـاع


رجعت وانا اذكـر مرابعنـا واناظـر للنجـوم
واقول يابعد المسافـة بيـن نجـم وبيـن قـاع


ساري وانا مشاعري عزّل بلا احلام وعـزوم
وفرقاك دار ٍ موحشة واحزاني سبـاع ٍ جيـاع


احزان ما في عرفها هدنة ولا تعـرف سلـوم
تنهش خفوق ٍ عاش مترف في مسرات ومتـاع


في روضة ٍ ودانها وصلـك وطلاتـك كـروم
وشذى زهرها انفاسك وهمسك نسيم بلا انقطاع


اغصانها بعدك حطب وانسامها صارت سمـوم
والليل هاجره القمر والشمس ما فيهـا شعـاع


الهم يكبر في خفوق ٍ ما عرف طعـم الهمـوم
ويزداد مع زود الهنـا لا راح عمـق الالتيـاع


واقلبي اللي ما بقـا جوفـه محـل ٍ للوسـوم
واعيني اللي بعد عينك فلـت لدمعـي شـراع


رحتي وقلبي صار لوفود الحزن صالـة قـدوم
وعينك شحنتي فرحتي في رمشها يوم الـوداع


مع السلامة جعل همال الفـرح فوقـك يـدوم
وعسى يجيني يوم لافراحك بلـم الشمـل داع


مشعل الذيابي

ساعد في نشر والارتقاء بنا عبر مشاركة رأيك في الفيس بوك

اقتباس